ខេត្តកណ្តាល៖ ដីបឹងធម្មជាតិស្ថិតនៅសង្កាត់ព្រែកអំពិល និងសង្កាត់ព្រែកលួង ក្រុងអរិយក្សត្រ ដែលប្រជាពលរដ្ឋធ្លាប់តែអាស្រ័យផល រកត្រី ក្តាម ខ្យង និងបេះបន្លែដើម្បីចិញ្ចឹមជីវិត ពេលនេះត្រូវបានអាជ្ញាធរមូលដ្ឋាន ធ្វើការលក់ទៅឲ្យឈ្មួញដែលជាអ្នកមានលុយមានអំណាច ចាក់ខ្សាច់លុបធ្វើជាកម្មសិទ្ធិបុគ្គល។
តាមប្រភពព័ត៌មានបានឲ្យដឹងថា៖ ដំបូងឡើយអាជ្ញាធរនៃក្រុងអរិយក្សត្រ បាននាំគ្នាធ្វើសកម្មភាពប្រកាសប្រម៉ែប្រមូលពលរដ្ឋឲ្យធ្វើការផ្តិតមេដៃ ដើម្បីស្តារបាតបឹងផ្ទុកទឹកដើម្បីស្រោចស្រពផលដំណាំ តែការពិតត្រូវបានបែកធ្លាយថាផ្តិតមេដៃលក់បឹងឲ្យឈ្មួញទៅវិញ។
រហូតដល់ទល់បច្ចុប្បន្ននេះឃើញថា បឹងធម្មជាតិនេះ កំពុងមានការបូមខ្សាច់យ៉ាងមមាញឹកទាំងយប់ទាំងថ្ងៃ ដើម្បីចាក់លុបផ្ទៃបឹងទាំងមូលពីសំណាក់ឈ្មួញ ដែលគេដឹងថាជាមនុស្សដែលមានឥទ្ធិពល សូម្បីតែលោក ចាន់ ដារ៉ា អភិបាលក្រុងអរិយក្សត្រក៏មិនហ៊ានទប់ស្កាត់ដែរ។
យ៉ាងណាជុំវិញទៅនិងការលក់បឹងធម្មជាតិខាងលើនេះក្រុមការងារសារព័ត៌មានមិនអាចសុំការបកស្រាយបំភ្លឺពីលោក ចាន់ ដារ៉ា អភិបាលក្រុងអរិយក្សត្រ បាននោះទេ ។
ប្រជាពលរដ្ឋជាច្រើនសូមសំណូមពរយ៉ាងទទូចដល់ឯកឧត្តម គួច ចំរើន អភិបាល នៃគណៈខេត្តកណ្ដាល មេត្តាចាត់មន្ត្រីជំនាញឲ្យចុះទៅពិនិត្យ អន្តរគមករណីនេះផង ដើម្បីកុំឲ្យបាត់បង់បឹងធម្មជាតិ។
ពួកគាត់ក៏សូមអំពាវនាវទៅដល់ក្រសួងធនធានទឹកនិងឧតុនិយម ក្រសួងកសិកម្មរុក្ខាប្រមាញ់និងនេសាទ ក្រសួងបរិស្ថាន ក្រសួងរៀបចំដែនដីនគរូបនីយកម្មនិងសំណង់ រួមទាំងក្រសួងមហាផ្ទៃ សូមជួយចាត់មន្ត្រីជំនាញចុះពិនិត្យទប់ស្កាត់ករណី ខាងលើនេះផង៕
