ខេត្តរតនគិរី៖ នៅថ្ងៃទី៣០ ខែសីហា ឆ្នាំ២០២៦ នេះ ប្រជាពលរដ្ឋមូលដ្ឋានបានបញ្ជូនរូបភាព និងផ្តល់ព័ត៌មានច្បាស ដោយបង្ហាញពីសកម្មភាពបនល្បែងស៊ីសងខុសច្បាប់ទ្រង់ទ្រាយធំមួយកន្លែង ដែលកំពុងបើកលេងយ៉ាងគគ្រឹកគគ្រេង និងជារៀងរាល់ថ្ងៃដោយគ្មានខ្លាចញញើតនឹងច្បាប់ឡើយ។
យោងតាមប្រភពប្រជាពលរដ្ឋបានបញ្ជាក់ថា ទីតាំងបនល្បែងខាងលើនេះ គឺស្ថិតនៅត្រង់ចំណុចចន្លោះព្រំប្រទល់ស្រុកអូរជុំ និងស្រុកបរកែវ ក្នុងភូមិថ្មី ឃុំទីងចាក់ ស្រុកបរកែវ ខេត្តរតនគិរី។ នៅទីនោះមានប្រមូលផ្តុំល្បែងស៊ីសងច្រើនប្រភេទដូចជា ជល់មាន់ អាប៉ោង និងយូគី ជាដើម។
ប្រភពដដែលបានលម្អិតថា ក្រុមអ្នកញៀនល្បែងបានយកទ្បាន (ឡាន) ទៅចតលាក់ទុកក្នុងព្រៃកៅស៊ូ ចំណែកឯសង្វៀនជល់មាន់គឺត្រូវបានរៀបចំឡើងនៅក្នុងព្រៃចន្ទីក្បែរនោះផ្ទាល់តែម្តង។ អ្វីដែលគួរឱ្យកត់សម្គាល់ គឺការដាក់ប្រាក់ភ្នាល់ (ដើមផាន់) ក្នុងមួយគូៗ គឺមានទឹកប្រាក់ចាប់ពី ៥០ម៉ឺនរៀល ឡើងរហូតដល់រាប់ពាន់ដុល្លារ ដែលទាក់ទាញអ្នកចូលរួមលេងរាប់រយនាក់។
សូមបញ្ជាក់ជូនថា រូបភាពនិងវីដេអូនានាដែលបានទទួលនេះ គឺត្រូវបានផ្តល់ឱ្យដោយផ្ទាល់ពីអ្នកដែលបានចូលរួមលេងក្នុងវង់ល្បែងនោះ ដែរក្នុងនោះមានទាំងវីដេអូសង្វៀនជល់មាន់ និងហ្វូងមនុស្សចូលរួមលេងយ៉ាងច្រើនកុះករ។
មហាជន និងប្រជាពលរដ្ឋមូលដ្ឋាន សង្ឃឹមយ៉ាងមុតមាំថា អាជ្ញាធរ និងសមត្ថកិច្ចពាក់ព័ន្ធក្នុងខេត្តរតនគិរី ពិសេសអធិការដ្ឋាននបាលស្រុកទាំងពីរ នឹងចាត់វិធានការចុះត្រួតពិនិត្យ និងបង្ក្រាបជាបន្ទាន់។ ពលរដ្ឋបានលើកឡើងដោយចម្ងល់ថា៖ (បនល្បែងនេះបើកលេងយូរមកហើយ ហេតុអ្វីបានជាសមត្ថកិច្ចមិនដឹង មិនបង្រ្កាប)។
