វិទ្យាល័យអប់រំពិសេសក្រុងតាខ្មៅ មានគម្រោងអភិវឌ្ឍន៍ហេដ្ឋារចនាសម្ព័ន្ធបន្ថែមនៅឆ្នាំ២០២២ខាងមុខ ដើម្បីឱ្យ កុមារដែលខ្សោយសតិបញ្ញានិងអូទីស្សឹមទាំងអស់ទទួលបាននូវការបណ្តុះបណ្តាលអប់រំ វិជ្ជាជីវៈគ្រប់ៗគ្នាដូចកុមារដទៃទៀត។
លោក ចាន់ សារិន នាយកវិទ្យាល័យអប់រំពិសេសក្នុងតាខ្មៅ បានឱ្យដឹងថា បច្ចុប្បន្ននេះវិទ្យាល័យអប់រំពិសេសក្រុងតាខ្មៅ មានលទ្ធភាពទទួលកុមារបាត់បង់សតិបញ្ញានិងអូទីស្សឹមប្រមាណជាង២០០នាក់ ឱ្យទទួលបានការបង្ហាត់បង្រៀនពីរបៀបទំនាក់ទំនងមនុស្ស ជុំវិញខ្លួន របៀបសរសេរ ការអប់រំផ្លូវចិត្តផ្សេងៗពីលោកគ្រូអ្នកគ្រូ ហើយក៏មានអាណាព្យាបាលកុមារអូទីស្សឹមជាង៦០០នាក់បន្ថែមទៀតផងដែរ ដែលកំពុងស្នើសុំយកកូនមកទទួលការបណ្តុះបណ្តាល។ លោកបន្តថា ដោយមានការគាំទ្រ ពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន និងលោកជំទាវ រួមជាមួយសប្បុរសជនផង វិទ្យាល័យអប់រំពិសេសក្រុងតាខ្មៅ នឹងរៀបចំផែនការមេសម្រាប់អភិវឌ្ឍន៍សាលារៀន រួមជាមួយការសាងសង់អគារសិក្សាចំនួន២ខ្នងបន្ថែមទៀត ដែលមាន២៨បន្ទប់ អគារស្នាក់នៅមួយខ្នងមាន១០បន្ទប់ អគារទីចាត់ការមួយខ្នង រួមជាមួយនឹងហេដ្ឋារចនាសម្ព័ន្ធរូបវន្តនានា ដែលសរុបថវិកាអស់ប្រមាណ៧៥ម៉ឺន ដុល្លារអាមេរិក ដើម្បីបំពេញតម្រូវការរបស់កុមារ។
« នៅឆ្នាំ ២០២២ រាជរដ្ឋាភិបាលនឹងរៀបចំអគារឱ្យបន្ថែមទៀតដើម្បីទទួលកុមារទាំងអស់បានចូលរៀនហើយ ការឧបត្ថម្ភកន្លងទៅ ការឧបត្ថម្ភដែលខ្ពស់ជាងគេមានសម្ដេចតេជោនិងសម្ដេចកិត្តិព្រឹទ្ធបណ្ឌិតព្រមទាំងឯកឧត្តមរដ្ឋមន្ត្រីក្រសួងព័ត៌មាន ឯកឧត្តមរដ្ឋមន្រ្តីក្រសួង សង្គមកិច្ច ឯកឧត្តមរដ្ឋមន្ត្រីក្រសួងអប់រំ លោកជំទាវរដ្ឋមន្ត្រីក្រសួងកិច្ចការនារី ដែលមានអន្តរក្រសួងជាសេនាធិការ»។
លោកបានបញ្ជាក់ថា បច្ចុប្បន្ន វិទ្យាល័យមួយនេះ អាចចុះឈ្មោះកុមារចាប់ពីកម្រិតមតេ្តយ្យសិក្សា ដល់វិទ្យាល័យបាន ចំនួនជាង ៤០០ទៅ៤៥០នាក់ ខណៈការបង្កើតនូវអគារថ្មីៗ ក៏ដូចជាថ្នាក់រៀនបន្ថែមទៀតនោះ នឹងឆ្លើយតបបានគ្រប់គ្រាន់ ចំពោះកុមារខ្សោយសតិបញ្ញា និងអូរទីស្សឹមឱ្យបានទទួលការបណ្ដុះបណ្ដាលគ្រប់ៗគ្នានិងទាន់ពេលវេលាដើម្បីឱ្យពួកគេអាចសម្របខ្លួនរស់នៅក្នុងសង្គម៕
