ឈ្មួញឈើខ្នាតយក្ស អុិន ស្រីម៉ៅ កំពុងប្រព្រឹត្តបទល្មើសយ៉ាងពេញបន្ទុកនៅខេត្តព្រះវិហារ ខណៈអាជ្ញាធរនិងមន្ត្រីជំនាញមិនចាត់វិធានការទប់ស្កាត់ និងបង្ក្រាបឱ្យមានប្រសិទ្ធភាព 

សកម្មភាពទាំងនេះ បានប្រព្រឹត្តទៅជាច្រើនខែមកហើយ ខណៈអាជ្ញាធរនិងមន្ត្រីជំនាញ ស្ពឹកសសៃមើលមិនឃើញ ស្ដាប់មិនឮ បង្កភាពងាយស្រួលដល់ឈ្មួញរកស៊ីឈើខុសច្បាប់។

សេចក្ដីរាយការណ៍បានឱ្យដឹងថា៖ ឃ្លាំងស្តុកឈើដ៏ធំនោះ ស្ថិតនៅភូមិភារកិច្ច សង្កាត់ប៉ាលហាល ក្រុងព្រះវិហារ ខេត្តព្រះវិហារ ដែលមានថៅកែឈ្មោះ អុិន ស្រីម៉ៅ ។

បច្ចុប្បន្ន៖ មេឈ្មួញឈ្មោះ អុិន ស្រីម៉ៅ កំពុងប្រព្រឹត្តបទល្មើសព្រៃឈើ យ៉ាងពេញបន្ទុក នៅខេត្តព្រះវិហារ និងក្នុងដែនជម្រកសត្វព្រៃគូលែនព្រហ្មទេព, ព្រៃព្រះរកា និងតំបន់ព្រៃឡង់ ខណៈមេឈ្មួញឈ្មោះ អុិន ស្រីម៉ៅ បានដាក់កម្លាំងដៃជើងរបស់ខ្លួនជាច្រើននាក់ ឱ្យចាំឈរជើង ទិញឈើពីពលរដ្ឋទាំងថ្ងៃទាំងយប់គ្មានស្រាកស្រាន។

ហេតុនេះហើយ បណ្ដាលឱ្យពលរដ្ឋនាំគ្នាសម្រុក កាន់ម៉ាស៊ីត្រង់ស៊ីន័រ ចូលកាប់ព្រៃនៅក្នុងតំបន់ខាងលើ យ៉ាងទ្រហឹងរំពងពេញព្រៃ។ ក្នុងនោះ អ្នកខ្លះប្រើរថយន្តកែច្នៃ ខ្លះគោយន្ត ខ្លះទៀតប្រើកាឡេថង សម្រាប់ជាមធ្យោបាយ ដឹកជញ្ជូនឈើពីក្នុងព្រៃ មកលក់ឱ្យឃ្លាំងស្តុកឈើ ត្រង់ចំណុចខាងលើ គ្មានឈប់ឈរ។

ប្រភពបន្តថា៖ មេឈ្មួញឈ្មោះ អុិន ស្រីម៉ៅ បានប្រើរថយន្តធំៗសុទ្ធតែប្រភេទយីឌុបនិងវេអង ក្នុងការដឹកឈើចេញពីឃ្លាំង យកទៅលក់បន្តតាមបណ្ដារាជធានីខេត្តនានា ជាប្រចាំ ពិសេសភ្នំពេញ កំពង់ចាម កំពង់ធំ និងខេត្តកណ្ដាលតែម្ដង។

សកម្មភាពរកស៊ីឈើខុសច្បាប់ខ្នាតធំ ហើយអាចប្រព្រឹត្តទៅបានយ៉ាងរលូនបែបនេះ ជាហេតុនាំឱ្យមហាជនដាក់ការសង្ស័យថា៖ មេឈ្មួញឈើ អុិន ស្រីម៉ៅ ប្រាកដជាមានភាគហ៊ុនចែកប្រយោជន៍ គ្នាជាមួយមន្ត្រីថ្នាក់ដឹកនាំក្នុងខេត្តព្រះវិហារមិនខានឡើយ។

ក្នុងនោះគេសង្ស័យថា៖ មេឈ្មួញឈើ អ៊ិន ស្រីម៉ៅ មានភាគហ៊ុនជាមួយមន្ត្រីចំនួន៣រូប៖១. លោក រស់ ធី ប្រធានមន្ទីរសេដ្ឋកិច្ចនិងហិរញ្ញវត្ថុ ខេត្តព្រះវិហារ, ២. លោក ខិត សុធារ៉ា អភិបាលរងក្រុងព្រះវិហារ, ៣. លោក នួន សុខុម នាយខណ្ឌរដ្ឋបាលព្រះខេត្តព្រះវិហារ។

ប្រភពបន្ថែមថា៖ ភាពអនាធិបតេយ្យនៃបទល្មើសព្រៃឈើ នៅខេត្តព្រះវិហារ ពុំមែនមានតែឈ្មោះ អុិន ស្រីម៉ៅ អ្នកប្រព្រឹត្តប៉ុណ្ណោះទេ ពោលគឺមានឈ្មួញប្រមាណជា០៥នាក់ទៀត កំពុងសម្រុកដឹកជញ្ជូនឈើ ដោយប្រើរថយន្តសាំយ៉ុង, ធុនដ្រា និងរថយន្តកែច្នៃគ្រប់ប្រភេទ ដឹកចេញពីខេត្តព្រះវិហារ យកទៅលក់នៅខេត្តកំពង់ធំ និងកំពង់ចាម យ៉ាងគគ្រឹកគគ្រេង ហើយក្រុមឈ្មួញទាំងនោះ រួមមាន៖ ទី១.ឈ្មោះ ចែផល្លា, ២. លោក បញ្ញា, ៣. លោក វ៉ុន, ៤. ចែឡែន, ៥. លោកភាក់ ។

ជុំវិញការករណីខាងលើ ក្រុមការងារយើងមិនអាចទាក់ទងទៅបាន ព្រោះគ្មានលេខទូរស័ព្ទ។ ក្រុមការងារយើងនឹងរង់ចាំការបកស្រាយពីមន្ត្រីជំនាញ។