ពិធីប្រគល់ និងទទួលមណ្ឌលព្យាបាលជំងឺកូវីដ-១៩ កម្រិតស្រាលមួយកន្លែងនៅ មជ្ឈមណ្ឌល ស៊ូនឹង ស្ថិតនៅក្រុងខេមរភូមិន្ទ ខេត្តកោះកុង

ខេត្តកោះកុង៖ ឯកឧត្តម នាយឧត្តមសេនីយ៍ យន្ត មីន រដ្ឋលេខាធិការ ក្រសួងការពារជាតិ និងលោកជំទាវ មិថុនា ភូថង អភិបាល នៃគណៈអភិបាលខេត្តកោះកុង ថ្ងៃទី២៤ ខែកក្កដា ឆ្នាំ២០២១ បានអញ្ជើញប្រគល់ ទទួលមណ្ឌលព្យាបាលជំងឺកូវីដ-១៩ កម្រិតស្រាលមួយកន្លែង ស្ថិតនៅសង្កាត់ស្ទឹងវែង ក្រុងខេមរភូមិន្ទ ខេត្តកោះកុង មានគ្រែនិងសម្ភារសម្រាប់អ្នកជំងឺចំនួន៦០០ឈុត និងមានបន្ទប់ទឹកគ្រប់គ្រាន់សម្រាប់អ្នកជំងឺ។

មណ្ឌលព្យាបាលជំងឺកូវីដ-១៩មួយកន្លែងនេះដែរ ក៍ជាការផ្តួចផ្តើមដ៏ខ្ពង់ខ្ពស់ពីសំណាក់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងលោកជំទាវ ព្រមទាំងមានការជួយជ្រោមជ្រែងពីឯកឧត្តម នាយឧត្តមសេនីយ៍ ប៊ុន លើត ឯកឧត្តម នាយឧត្ដមសេនីយ៍ យន្ត មីន រដ្ឋលេខាធិការ ក្រសួងការពារជាតិ ព្រមទាំងឯកឧត្តម លោកជំទាវ លោក លោកស្រី សប្បុរសជនជាច្រើនរូបទៀត ដោយមានកិច្ចសហការយ៉ាងជិតស្និទ្ធ ជាមួយអាជ្ញាធរខេត្ត ក្រុង មន្ទីរ អង្គភាព និងមន្ត្រីរាជការពាក់ព័ន្ធក្នុងខេត្ត។ ទីតាំងមួយនេះពិតជាមានសារសំខាន់ណាស់ក្នុងស្ថានភាពជំងឺកូវីដ-១៩កំពុងតែរាលដាលឥឈប់ឈរ ជាកន្លែងមួយសមរម្យក្នុងការត្រៀមទទួលអ្នជំងឺ ឱ្យមកសម្រាកព្យាបាលស្របតាមគោលការណ៍ណែនាំរបស់ក្រសួងសុខាភិបាល នៃព្រះរាជាណាចក្រកម្ពុជាផងដែរ៕