កែប៖ នៅព្រឹកថ្ងៃ ទី២៤ ខែ មីនា ឆ្នាំ២០២២នេះ គណ: ប្រតិភូសមាជិកព្រឹទ្ធសភាប្រចាំភូមិភាគទី៥ ដឹកនាំដោយ ឯកឧត្តម ខៀវ មុត ប្រធានក្រុមសមាជិកព្រឹទ្ធ សភា ប្រចាំភូមិភាគទី៥ បានអញ្ជើញចុះជួបសំណេះសំ ណាលសួរសុខទុក្ខថ្នាក់ដឹកនាំខេត្ត ក្រុង ស្រុក និងឃុំ សង្កាត់ នៅខេត្តកែប។
ការចុះបំពេញបេសកកម្មរបស់គណៈប្រតិភូសមាជិក ព្រឹទ្ធសភាប្រចាំភូមិភាគទី៥ នៅខេត្តកែបនេះ ក្នុងគោល បំណងសិក្សាឈ្វេងយល់ពីបញ្ហាប្រឈមដំណោះស្រាយនិងលទ្ធផលក្នុងការអនុវត្តតួនាទីភារកិច្ចរបស់ថ្នាក់ខេត្ត ក្រុង ស្រុក ឃុំ សង្កាត់ ជាពិសេសពិភាក្សាលើដំណើរការឆ្ពោះទៅកាន់ការបោះឆ្នោតជ្រើសរើសក្រុម ប្រឹក្សា ឃុំ សង្កាត់ អាណត្តិ ទី៦ នៅថ្ងៃទី៥ ខែមិថុនា ឆ្នាំ២០២២ខាងមុខនេះ ។
បន្ទាប់ពីបានស្តាប់របាយ ការណ៍ស្វាគមន៍របស់ ឯកឧត្តមបណ្ឌិត សោម ពិសិដ្ឋ អភិបាលខេត្តកែប អំពីលទ្ធផលការងារដែលខេត្តសម្រេចបាន និងបញ្ហាប្រឈមមួយចំនួនរបស់ថ្នាក់ខេត្ត ក្រុង/ស្រុក ក្នុងការគាំទ្រការអភិវឌ្ឍនានារបស់ ឃុំ សង្កាត់ លើការងារ សន្តិសុខ សណ្តាប់ធ្នាប់សាធារណៈ ការងារមនុស្សធម៌ និងការងារកែលម្អសោភណភាព និងការអភិវឌ្ឍរួចមក ឯកឧត្តម ខៀវ មុត ប្រធានសមាជិកព្រឹទ្ធ សភាប្រចាំភូមិភាគទី៥ បានពន្យល់អំពីតួនាទីមុខងាររបស់ព្រឹទ្ធសភាមាន៣សំខាន់គឺ ការកសាងឯកសារ,ត្រួតពិនិត្យការអនុវត្តច្បាប់,តួនាទី និងមុខងារតំណាងប្រជាពលរដ្ឋទាំងមូលទូទាំងប្រទេស ពិសេសគឺតំណាងឱ្យក្រុមប្រឹក្សា ឃុំ សង្កាត់ ទូទាំងប្រទេសដែលមាន ១,៦៥២ ឃុំ សង្កាត់។
ជាមួយគ្នានោះ ឯកឧត្តម ខៀវ មុត បានស្នើឱ្យថ្នាក់ដឹកនាំខេត្ត ក្រុង/ស្រុក ឃុំ/សង្កាត់ ត្រូវបន្តយកចិត្តទុកដាក់ក្នុងការផ្ដល់សេវាសាធារណៈ ជូនប្រជាពលរដ្ឋ បង្កើតភាពយក ចិត្តទុកដាក់ជាមួយប្រជាពល រដ្ឋក្នុង ឃុំ សង្កាត់ របស់ខ្លួន ត្រូវបន្តខិតខំរៀបចំសណ្តាប់សាធារណៈ និងបរិស្ថានអនាម័យឱ្យបានល្អប្រសើរថែមទៀត៕
