មជ្ឍមណ្ឌលជាតិកម្ចាត់រោគរបេងនិងហង់សិនសហការជាមួយអង្គការKhaNa ប្រារព្ធកម្មវិធីទិវាពិភពលោកកម្ចាត់ រោគរបេងនៅស្រុកអូររាំងឪ

នៅរសៀលថ្ងៃទី២៤ ខែមីនា ឆ្នាំ២០២២ មជ្ឍមណ្ឌលជាតិកម្ចាត់រោគរបេងនិងហង់សិន សហការជាមួយអង្គការសម្ព័ន្ធ ភាពខ្មែរប្រយុទ្ធនឹងជំងឺអេដស៍ (KhaNa) បានប្រារព្ធកម្មវិធីទិវាពិភពលោកកម្ចាត់រោគរបេង នៅក្នុងបរិវេណវត្តសុវណ្ណបព្វតារាមស្រែស្ពៃ ភូមិស្រែស្ពៃ ឃុំគង់ជ័យ ស្រុកអូររាំងឪ ខេត្តត្បូងឃ្មុំ ក្នុងគោលបំណងបន្តបំផុសឱ្យប្រជាពលរដ្ឋទូទៅមានការយល់ដឹងបន្ថែម និងរួមគ្នាឱ្យមានលក្ខណៈសកម្មជាងមុន ដើម្បីឱ្យកម្ពុជា សម្រេចបានគោលដៅអភិវឌ្ឍន៍ប្រយុទ្ធប្រឆាំងជំងឺរបេងនៅឆ្នាំ ២០៣០ ។ ក្នុងពិធីនេះ មានការអញ្ជើញចូលរួមដោយ លោក កេង ប៊ុណ្ណា អភិបាលរងខេត្តត្បូងឃ្មុំ លោកវេជ្ជបណ្ឌិត ហួត ចាន់យុដា ប្រធានមជ្ឍមណ្ឌលជាតិកម្ចាត់រោគរបេងនិងហង់សិន លោក ជួប សុខចំរើន នាយកប្រតិបត្តិអង្គការ KHANAនិងជាតំណាងអង្គការសង្គមស៊ីវិល កញ្ញា ឡេ ណានាទ អារ៉ាន់ហ្វូ ប្រធានក្រុមនៃជំងឺឆ្លង USAID ប្រចាំកម្ពុជា ក្រុមប្រឹក្សាឃុំ និងប្រជាពលរដ្ឋជាច្រើនរូប ។ ក្នុងឱកាសនោះ លោកវេជ្ជបណ្ឌិត ហួត ចាន់យុដា ប្រធានមជ្ឍមណ្ឌលជាតិកម្ចាត់រោគរបេងនិងហង់សិន បានអានសុន្ទរកថារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងការអបអរសាទរទិវាពិភពកម្ចាត់ រោគរបេង ២៤ មីនា ២០២២ ក្រោមប្រធានបទ «វិនិយោគ ដើម្បីបញ្ចប់ការរាតត្បាតជំងឺ របេងគឺសង្គ្រោះជីវិត» ដើម្បីឱ្យព្រះរាជាណាចក្រកម្ពុជាអាចធ្វើដំណើរឆ្ពោះទៅកាន់អនាគតដ៏ភ្លឺស្វាង ត្រចះត្រចង់ និងជាទឹកដីមួយដែលគ្មានជំងឺរបេង ។ លោក កេង ប៊ុណ្ណា អភិបាល រងខេត្ត តំណាងដ៏ឯកឧត្តមបណ្ឌិត ជាម ច័ន្ទសោភណ្ឌ័ អភិបាល នៃគណអភិបាល ខេត្តត្បូងឃ្មុំ បានថ្លែងអំពីការប្តេជ្ញាចិត្ត និងផែនការជាយុទ្ធ សាស្ត្ររបស់រដ្ឋបាលខេត្ត ដើម្បីរួមចំណែកឆ្ពោះទៅរកការបញ្ចប់ការរាតត្បាតជំងឺ របេងក្នុងមូលដ្ឋាន ជាពិសេសក្នុងព្រះរាជាណាចក្រកម្ពុជាទាំងមូល ។ លោកបានបន្តថា កម្មវិធីក្នុង ថ្ងៃនេះ នឹងបង្កើនការយកចិត្តទុកដាក់អំពីការបង្ការនិងការ ពារ ដើម្បីជំរុញនិងបង្កើនកិច្ចសហប្រតិបត្តិការភាពជាដៃគូជាមួយភាគីពាក់ព័ន្ធគ្រប់លំដាប់ថ្នាក់ អាជ្ញាធរដែនដី សាធារណជន បណ្ដាញព័ត៌ មាន ទីភ្នាក់ងារសហប្រជា ជាតិ អង្គការសង្គមស៊ីវិល សហគមន៍ និងអ្នករងគ្រោះ ដែលរងផលប៉ះពាល់ដោយ សារជំងឺរបេង ដើម្បីរួមគ្នាបន្តមុនអនុវត្តជាបន្ទាន់ឆ្លើយតប ទៅនឹងជំងឺរបេង ។ ជាងនេះទៅទៀត លោក ជួប សុខចំរើន នាយកប្រតិបត្តិអង្គការ KHANA និងជាតំណាងអង្គការសង្គមស៊ីវិល ក៏បានថ្លែងអំពីការចូលរួមរបស់អង្គការសង្គមស៊ីវិលនិងភាពជាដៃគូ ក្នុងការរួម ចំណែកដល់ការស្វែងរកករណីជំងឺរបេង និងជួយពួកគេទទួលបានការធ្វើតេស្ត និងការថែទាំព្យាបាល ។ ជាមួយគ្នានោះ កញ្ញា ឡេ ណានាទ អារ៉ាន់ហ្វូ ប្រធានក្រុមនៃជំងឺឆ្លង USAID ប្រចាំកម្ពុជា បានមានចំណាប់អារម្មណ៍ស្តីពីយុទ្ធនាការសកលរបស់សហរដ្ឋអាមេរិកក្នុងការពន្លឿន ការឆ្លើយតបទៅនឹងជំងឺរបេងនិងការចូលរួម ផ្ដល់ការគាំទ្ររបស់សហរដ្ឋ អាមេរិក ។ សូមបញ្ជាក់ថា អត្រាឈឺនិងស្លាប់ដោយសារជំងឺរបេងនៅ ក្នុងប្រទេសកម្ពុជា មានការធ្លាក់ចុះយ៉ាងខ្លាំងច្រើនជាងប្រទេសដទៃ ជាក់ស្តែងអត្រាស្លាប់បានថយចុះពី ៤២ ករណី ក្នុងចំណោមប្រជាជន ១០០ ០០០នាក់ នៅឆ្នាំ ២០០០ មកត្រឹម ២០ករណី ក្នុងចំណោមប្រជាជន ១០០ ០០០នាក់ក្នុងឆ្នាំ២០២០ ដែលមានអត្រាធ្លាក់ចុះស្មើ នឹង៥២ភាគរយ ។ រីឯអត្រាកើតមានជំងឺថ្មី (អាំងស៊ីដង់) បានធ្លាក់ចុះពី៥៧៩ករណីក្នុងចំណោមប្រជាជន ១០០ ០០០នាក់នៅឆ្នាំ២០០០ មក ដល់២៧៤ករណី ក្នុង ចំណោមប្រជាជន ១០០ ០០០នាក់ នៅឆ្នាំ២០២០ ដែលស្មើនឹង ៥៣ភាគរយ ៕