ក្រុមអ្នកជំនាញការចំពោះកិច្ចអាដហុក នៃគណ:កម្មាធិការអន្តរជាតិសម្របសម្រួលកិច្ចគាំពារ និងអភិវឌ្ឍន៍តំបន់រមណីយដ្ឋានប្រវត្តិសាស្រ្តអង្គរ ហៅកាត់ថា អាយស៊ីស៊ី-អង្គរ (ICC-Angkor) បន្ដចុះពិនិត្យតាមការដ្ឋានជួសជុលប្រាសាទបុរាណ ក្នុងរមណីយដ្ឋានអង្គរ។
ឯកឧត្ដមឡុង កុសល អគ្គនាយករង និងជាអ្នកនាំពាក្យអាជ្ញាធរជាតិអប្សរា មានប្រសាសន៍ថា ការបន្ដចុះពិនិត្យការដ្ឋានចាប់ពីថ្ងៃទី១៨ ខែមីនានេះ ធ្វើឡើងនូវប្រាសាទបន្ទាយក្ដី-ប្រាសាទតាព្រហ្ម-ប្រាសាទបាយ័ន្ត-ខ្លោងទ្វារតាកាវ-ប្រាសាទបន្ទាយស្រី លើការងារជួសជុល- ស្រុកបន្ទាយស្រី សាងសង់ផ្លូវបេតុង -លានជល់ដំរី- ប្រាសាទចម (ព្រះពិធូ)- ប្រាសាទមេបុណ្យខាងលិច-ប្រាសាទបាក់ខែង- ផ្លូវវាងប្រាសាទតាកែវ-ផ្លូវទស្សនារូមគ្នា រវាងប្រាសាទចៅសាយទេវតា និងធម្មនន្ទ-ផ្លូវទស្សនាថ្មើរជើងលើគំពែងក្រុងអង្គរធំ-សួនរុក្ខជាតិអង្គរ- ប្រាសាទនាគព័ន្ធ-ប្រាសទព្រះខ័ន- ប្រាសាទបន្ទាយប្រី-សសរ នៅថែវព្រះពាន់ (អង្គរវត្ត)- រួតបាកាន (អង្គរវត្ត)- ពិដានឈើ(អង្គរវត្ត)- បាវីសអង្គរ- ស្ថានីយបណ្ដុះកូនឈើ- វង់ទស្សនាថ្ងៃលិច ថ្ងៃរះ ភ្នំក្រោម។ ឯកឧត្ដម បានបន្ដថា ការចុះត្រួតពិនិត្យ ផ្លាស់ប្តូរយោបល់គឺជាសកម្មភាពចាប់ផ្តើមមុននឹងដំណើរការ នៃកិច្ចប្រជុំអាយស៊ីស៊ី-អង្គរ ទាំងគម្រោងរបស់អាជ្ញាធរជាតិអប្សរា និងគម្រោងដៃគូអន្តរជាតិ ដើម្បីឱ្យអ្នកជំនាញផ្តល់អនុសាសន៍ រាល់ចំណុចដែលត្រឹមត្រូវ ឬចំណុចត្រូវកែលម្អ សំដៅឱ្យការងារទាំងនោះដំណើរការល្អ និងស្របតាមលក្ខខណ្ឌនៃធម្មនុញ្ញអង្គរ។ បន្ថែមពីនេះ ក្រុមអ្នកជំនាញនឹងរៀបចំជារបាយការណ៍នៃការចុះត្រួតពិនិត្យនេះ សម្រាប់ពិភាក្សា និងផ្តល់យោបល់បន្ថែម ក្នុងកិច្ចប្រជុំធំ នៃគណ:កម្មាធិការអន្តរជាតិ អាយស៊ីស៊ី-អង្គរ។ ការចុះពិនិត្យនេះ មានរយ:ពេល ៧ថ្ងៃ គឺចាប់ពីថ្ងៃទី១៦ ដល់ថ្ងៃទី២២ ខែមីនា ឆ្នាំ២០២២នេះ បន្ទាប់ពីខកខានរយ:ពេលឆ្នាំ ដោយសាររាត្បាតនូវជំងឺកូវីដ-១៩ ។
សូមបញ្ជាក់ថា គណ:កម្មាធិការអន្តរជាតិអាយស៊ីស៊ី-អង្គរ នឹងរៀបចំកិច្ចប្រជុំបច្ចេកទេសលើកទី៣៥ និងកិច្ចប្រជុំពេញអង្គលើកទី២៨ នៅថ្ងៃទី២៤ និង២៥ ខែមីនា ឆ្នាំ២០២២ នៅសណ្ឋាគារសូហ្វីតែលអង្គរភូគីត្រា ដែលមានសហប្រធានបារាំង និងជប៉ុន ក្រោមអធិបតីភាពលោកជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្ប: និងជាប្រធានក្រុមប្រឹក្សាភិបាលអាជ្ញាធរជាតិអប្សរា៕
