រថយន្ដដឹកវ៉ាក់សាំង ចំនួន១០គ្រឿងត្រូវបាន រាជរដ្ឋាភិបាល និងប្រជាជនកម្ពុជា ប្រគល់ជូនទៅរដ្ឋាភិបាល និងប្រជាជន នៃសាធារណរដ្ឋប្រជាធិបតេយ្យប្រជាមានិតឡាវដើម្បីចូលរួមចំណែកក្នុងការបម្រើសេវាសុខាភិបាលឱ្យមានប្រសិទ្ធភាពប្រយុទ្ធប្រឆាំងនិងជំងឺកូវីដ១៩។
ក្នុងពិធីប្រគល់រថយន្តធ្វើឡើងនៅ ព្រំដែនច្រកទ្វារអន្តរជាតិត្រពាំងក្រៀល ក្នុងខេត្តស្ទឹងត្រែង ជាប់ព្រំដែនខេត្តចំប៉ាសាក់ នៃប្រទេសឡាវ កាលពី ព្រឹកថ្ងៃទី១២ ខែមីនា ឆ្នាំ២០២២កន្លងមកថ្មីៗលោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស និងជាតំណាងសម្តេចតេជោហ៊ុនសែននាយករដ្ឋមន្រ្តីមានប្រសាសន៍ថា៖ ការសម្រេចផ្តល់រថយន្តដឹកវ៉ាក់សាំងរបស់រាជរដ្ឋាភិបាល និងប្រជាជនកម្ពុជា ជូនរដ្ឋាភិបាល និងប្រជាជន នៃសាធារណរដ្ឋប្រជាធិបតេយ្យប្រជាមានិតឡាវនាពេលនេះ បានបង្ហាញឱ្យឃើញពីការយកចិត្តទុកដាក់ខ្ពស់បំផុត របស់សម្តេចតេជោនាយករដ្ឋមន្ត្រី ចំពោះសុខភាពនិងសុខុមាលភាពរបស់ប្រជាជនឡាវ ។
លោកជំទាវ រដ្ឋលេខាធិការ មានប្រសាសន៍បន្តថា៖នេះជាការយកចិត្តទុកដាក់ចំពោះការរស់នៅរបស់ប្រជាពលរដ្ឋនៃប្រទេសទាំងពី និងជាកាយវិការមនុស្សធម៌ប្រកបដោយបេះដូងដ៏ល្អប្រពៃពិតប្រាកដរបស់ សម្តេចតេជោនាយករដ្ឋមន្ត្រី ក្នុងន័យ កម្ពុជាជាប្រទេសតូចតាចតែមានបេះដូងធំទូលាយ។
លោកជំទាវមានប្រសាសន៍ទៀតថា៖ ក្នុងនាមជាប្រទេសជិតខាងភូមិផងរបងជាមួយគ្នា ប្រទេសកម្ពុជាបាន និងកំពុងធ្វើ កិច្ចសហប្រតិបត្តិការល្អ ប្រកបដោយការគិតគូរខ្ពស់ រួមគ្នាដោះស្រាយវិបត្តិនៃការឆ្លងរីករាលដាលជំងឺកូវីដ-១៩ នៅក្នុងប្រទេសជិតខាង និងនៅក្នុងតំបន់។
ឯកឧត្តមមបណ្ឌិតសាស្ត្រាចារ្យ ប៊ុ នហ្វែង ភូម៉ាឡៃ ស៊ីតរដ្ឋមន្រ្តីសុខាភិបាលប្រទេសឡាវ មានប្រសាសន៍ចាត់ទុកថា៖ អំណោយមនុស្សធម៌ដ៏ថ្លៃថ្លារបស់កម្ពុជានេះពិតជាបានរួមចំណែកមួយកម្រិតបន្ថែមទៀតក្នុងការបង្កលក្ខណៈងាយស្រួលដល់មន្ត្រីសុខាភិបាលឡាវ ដើម្បីធ្វើប្រតិបត្តិការឆ្លើយតបទៅនឹងការប្រយុទ្ធប្រឆាំងនឹងជំងឺកូវីដ-១៩ ជាពិសេសលើកិច្ចការចាក់វ៉ាក់សាំងកូវីដ-១៩ ជូនដល់ប្រជាជនឡាវឱ្យកាន់តែមានភាពល្អប្រសើរឡើង។
ឯកឧត្តមបណ្ឌិតសាស្ត្រាចារ្យ មានប្រសាសន៍បន្ថែមថា៖តំណាងឱ្យរដ្ឋាភិបាលនិងប្រជាជនឡាវសូមសំដែងការដឹងគុណចំពោះ រាជរដ្ឋាភិបាលកម្ពុជា ជាពិសេសសម្តេចតេជោដែលបានផ្តល់ ជំនួយសម្ភារៈគ្រឿងបរិក្ខារពេទ្យ វ៉ាក់សាំង រថយន្តនេះ បានបង្ហាញពីសណ្តានចិត្តដ៏ល្អនិងមានតម្លៃមិនអាចកាត់ថ្លៃបាន ជួយមកប្រជាជនឡាវការពារលើកកម្ពស់សុខភាពក្នុងការបង្ការជំងឺកូវីដ១៩ ។
សូមបញ្ជាក់ថា ៖ នេះជាលើកទី៤ហើយក្នុងការផ្ដល់ជំនួយពាក់ព័ន្ធ ទៅនឹងការប្រយុទ្ធប្រឆាំងជំងឺកូវីដ១៩ជូនរដ្ឋាភិបាលនិងប្រជាជនឡាវ ក្នុងនោះនៅថ្ងៃទី១៦វិច្ឆិកា ឆ្នាំ២០២០ រាជរដ្ឋាភិបាលកម្ពុជា បានផ្តល់ជំនួយមនុស្សធម៌ជាម៉ាស់ ២លានម៉ាស់ និងបរិក្ខារវេជ្ជសាស្ត្រចំនួន ១២មុខ នៅថ្ងៃទី២៩ ខែកញ្ញា ឆ្នាំ២០២១ ផ្តល់ជំនួយជាវ៉ាក់សាំងប្រភេទស៊ីណូវ៉ាក់ ចំនួន២០ម៉ឺនដូស-នៅថ្ងៃ ទី០៣ ខែធ្នូ ឆ្នាំ២០២១ ជំនួយជាវ៉ាក់សាំងបង្ការជំងឺកូវីដ១៩ ចំនួន៥០ម៉ឺន ដូស និងរថយន្តដឹកវ៉ាក់សាំងចំនួន៣គ្រឿងរួមនិងថវិកា១៣លានដុល្លារនិងលើកទី០៤នេះនៅថ្ងៃទី១២មីនាឆ្នាំ២០២២ផ្ដល់រថយន្ដដឹកវ៉ាក់សាំងចំនួន១០គ្រឿងបន្ថែមទៀត៕
