កែប៖ រយៈពេលពីរថ្ងៃ គឺចាប់ពីថ្ងៃទី០៩ និងទី១០ ខែមីនា ឆ្នាំ២០២២នេះ រដ្ឋបាលខេត្តកែប បានរៀបចំ សន្និបាតបូកសរុបលទ្ធផលការងារប្រចាំឆ្នាំ២០២១ និងលើកទិសដៅបន្ត សម្រាប់ឆ្នាំ២០២២ ក្រោមអធិបតីភាព ឯកឧត្តម សំ សារីន ប្រធានក្រុមប្រឹក្សាខេត្ត ឯកឧត្តម សោម ពិសិដ្ឋ អភិបាលនៃគណៈអភិបាលខេត្តកែប និងមានការចូលរួមពី ឯកឧត្ដម លោកជំទាវ សមាជិក សមាជិកា ក្រុមប្រឹក្សាខេត្ត អភិបាលរងខេត្ត លោកឧត្ដមសេនីយ៍ វរសេនីយ៍ តំណាងកងកម្លាំងទាំងបី លោក លោកស្រី នាយក នាយករងរដ្ឋបាលសាលាខេត្ត ប្រធាន អនុប្រធាន មន្ទីរ អង្គភាព ជុំវិញខេត្ត នាយក នាយករងទីចាត់ការ ចំណុះរចនាសម្ព័ន្ធ សាលាខេត្ត អភិបាល អភិបាលរងក្រុង ស្រុក មេឃុំ ចៅសង្កាត់ និងមន្ត្រីជំនាញពាក់ព័ន្ធជាច្រើននាក់។
អង្គសន្និបាត បានដំណើរ ការដោយមានបទអន្តរាគមន៍ ពីអង្គភាពជំនាញចំនួនប្រាំគឺ ស្នងការដ្ឋាននគរបាលខេត្ត មន្ទីរទេសចរណ៍ខេត្ត រដ្ឋបាល អភិបាលក្រុង ស្រុក និង មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត និងបានលើកយកនូវប្រធាន បទសំខាន់ៗចំនួនប្រាំ ដើម្បីចែកក្រុមពិភាក្សាយ៉ាងផុល ផុសដែលរួមមាន ប្រធានបទទី១៖ សន្តិសុខ សណ្ដាប់ធ្នាប់ សាធារណៈ ការគ្រប់គ្រងធនធានធម្មជាតិ ដីធ្លី និងការអនុវត្តគោលនយោបាយ ភូមិឃុំមានសុវត្ថិភាព , ប្រធាន បទទី២ ពិភាក្សាលើជំងឺកូវីដ- ១៩ និងជំងឺឆ្លងនានា និងវិស័យអប់រំ, ប្រធានបទទី៣ គឺការផ្ដល់សេវាសាធារណៈ, ប្រធានបទទី៤ ការអភិវឌ្ឍវិស័យទេសចរណ៍, ប្រធានបទទី៥ ការអភិវឌ្ឍឃុំ-សង្កាត់។
នៅក្នុងរបាយការណ៍ស្វា គមន៍ ការអញ្ជើញបិទអង្គ សន្និបាតនាព្រឹកថ្ងៃទី១០ ខែមីនា ឆ្នាំ ២០២២
ក្រោមវត្ថមានដ៏ខ្ពង់ខ្ពស់ ឯកឧត្តម ជិន ប៊ុនស៊ាន ទេសរដ្ឋមន្រ្តីទទួលបន្ទុកបេសកកម្មពិសេស និងជាប្រធានក្រុម ការងាររាជរដ្ឋាភិបាលចុះជួយខេត្តកែប ឯកឧត្តមបណ្ឌិត សោម ពិសិដ្ឋ អភិបាលខេត្តកែប បានជំរុញដល់អាជ្ញាធរមូលដ្ឋានយកចិត្តទុកដាក់អនុវត្តការងារ ដោយត្រូវ:
-អនុវត្តឱ្យមានប្រសិទ្ធភាពនូវកម្មវិធីវិនិយោគបីឆ្នាំរំកិល ដើម្បីបំពេញតម្រូវការជាក់ ស្តែង។
-យកចិត្តទុកដាក់លើការងារផ្តល់សេវាផ្សេងៗជូនប្រជាព លរដ្ឋ ឱ្យមានប្រសិទ្ធភាព តម្លាភាព គណនេយ្យភាព និងក្រមសីលធម៌
-លើកកម្ពស់ចលនាភូមិឃុំមានសុវត្ថិភាព ដើម្បីធានាបាននូវសុខសុវត្ថិភាព និងសណ្តាប់ធ្នាប់សាធារណៈ ជូនប្រជាពលរដ្ឋ។
-ជំរុញការអនុវត្តច្បាប់ ស្តីពី ការគ្រប់គ្រងធនធានធម្មជាតិ, ច្បាប់ចរាចរណ៍ផ្លូវគោគ ឱ្យមានប្រសិទ្ធភាព។
-យកចិត្តទុកដាក់ដោះស្រាយទំនាស់ក្រៅប្រព័ន្ធតុលាការជូនប្រជាពលរដ្ឋ
-អន្តរាគមន៍ដោះស្រាយបញ្ហាគ្រោះមហន្តរាយជូនប្រជា ពលរដ្ឋឱ្យបានទាន់ពេលវេលា ។
ក្នុងឱកាសនោះ ឯកឧត្តម ជិន ប៊ុនស៊ាន បានបញ្ជាក់ថា សន្និបាតបូកសរុបប្រចាំឆ្នាំ ពិតជាមានសារសំខាន់ក្នុងការ ឆ្លុះបញ្ចាំងចំណុចខ្សោយ ខ្លាំង និងបញ្ហាប្រឈម ដែលបានជួបប្រទះ រយៈពេលពេញមួយឆ្នាំ២០២១ និងពិភាក្សាដាក់ចេញទិសដៅបន្ត។ក្នុងនោះឯកឧត្តមទេសរដ្ឋមន្ត្រី ជំរុញឱ្យរដ្ឋបាលក្រុង ស្រុក ត្រូវខិតខំយកចិត្តទុកដាក់អនុវត្តតួនាទីភារកិច្ចស្របតាមច្បាប់ និងលិខិតបទដ្ឋានពាក់ ព័ន្ធ ក្នុងស្មារតីទទួលខុសត្រូវ ទាំងការងារសន្តិសុខ សណ្តាប់ធ្នាប់ សុវត្ថិភាព របៀបរៀបរយ សាធារណៈ ក្នុងភូមិសាស្ត្ររបស់ខ្លួន ឱ្យមានភាពកាន់តែល្អប្រសើរ ជាមួយនេះមន្រ្តីរាជការត្រូវមានការ ផ្លាស់ប្ដូរផ្នត់គំនិត ឥរិយាបថ និងគោរពវិន័យបានល្អ ត្រូវផ្តល់សេវាសាធារណៈជូនប្រជាពលរដ្ឋឱ្យល្អប្រសើរ ដោយឈរលើមូលដ្ឋានលើកកម្ពស់ប្រសិទ្ធ ភាពការងារ ការគោរពច្បាប់ គោលការណ៍នានារបស់រដ្ឋ និងពង្រឹងរបៀបរបបធ្វើការ ដើម្បីលើកកម្ពស់ការទទួល ខុសត្រូវ ក្នុងការបំពេញតួនាទី ភារកិច្ចរបស់ខ្លួនសំដៅអភិវឌ្ឍមូលដ្ឋាន និងឆ្លើយតបចំពោះតម្រូវការរបស់ប្រជាពលរដ្ឋ ឱ្យទាន់ពេលវេលា ស្របតាមកម្ម វិធីនយោបាយ និងយុទ្ធ សាស្ត្រចតុកោណដំណាក់ កាលទី៤ របស់រាជរដ្ឋាភិ បាល។
ក្នុងនាមរាជរដ្ឋាភិបាល និងក្នុងនាមខ្លួនឯកឧត្តមផ្ទាល់ សូមសំដែងនូវការអបអរ សាទរ កោតសរសើរ និងវាយតម្លៃខ្ពស់ រដ្ឋបាលខេត្តកែប ដែលបានខិតខំប្រឹង ប្រែងបំពេញការងារ បំពេញតម្រូវការរបស់ប្រជាពលរដ្ឋកន្លងមក និងការអភិវឌ្ឍមូលដ្ឋានរបស់ខ្លួនឱ្យកាន់តែរីកចម្រើនលើគ្រប់វិស័យ រហូតទទួលបានលទ្ធផលល្អប្រសើរគួរជាទីមោទនៈ៕
