ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាអនុប្រធានអចិន្ត្រៃយ៍ គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) បានដឹកនាំកិច្ចប្រជុំប្រចាំសប្តាហ៍ នៅព្រឹកថ្ងៃទី០៣ ខែមីនា ឆ្នាំ២០២២ ដើម្បីត្រៀមទទួលរៀបចំធ្វើម្ចាស់ផ្ទះនៃកិច្ចប្រជុំផ្ទាល់ ក្នុងក្របខ័ណ្ឌក្រុមប្រឹក្សាកីឡាអាស៊ីអាគ្នេយ៍ ដែលគ្រោងធ្វើ ឡើងពីថ្ងៃទី០៨-១០ ខែមេសា ឆ្នាំ២០២២ នៅទីក្រុងសៀមរាប ខេត្តសៀមរាប។
ឯកឧត្តម វ៉ាត់ ចំរើន អគ្គលេខាធិការ CAMSOC មានប្រសាសន៍ថា ឯកឧត្តមបណ្ឌិត ថោង ខុន ដែលទទួលបានការប្រគល់សិទ្ធិជាប្រធានក្រុមប្រឹក្សាកីឡាអាស៊ីអាគ្នេយ៍ ចាប់ពីថ្ងៃទី០៧ ខែធ្នូ ឆ្នាំ២០២១មក ហើយឯកឧត្តមបណ្ឌិតបានកោះហៅសមាជិកអាស៊ីអាគ្នេយ៍ទាំងអស់ ត្រៀមចូលរួមកិច្ចប្រជុំ នាខែមេសាខាងមុខ។ មូលហេតុចម្បង ដែលកម្ពុជាបានជ្រើសរើសយកខេត្តសៀមរាបធ្វើកិច្ចប្រជុំជាលើកដំបូងនេះ គឺដោយសារនេះជាខេត្តគោលដៅទេសរណ៍ប្រកបដោយសុវត្ថិភាព។ «អ្វីដែលពិសេសគឺកម្ពុជាក៏នឹងបង្ហាញចេញពីការរត់ភ្លើងគប់ ស៊ីហ្គេម ២០២៣ គឺយកពីភ្លើងអទិទេព ដែលយកចេញពីប្រសាទអង្គរវត្តនៃខេត្តសៀបរាបផ្ទាល់តែម្តងមានន័យថា យកភ្លើងគប់នេះចេញពីបារមី វត្ថុស័ក្តិសិទ្ធប្រាសាទអង្គរវត្ត ដើម្បីយកទៅរត់នៅកម្ពុជា និងបន្តធ្វើពិធីរត់ភ្លើងគប់ នៅគ្រប់បណ្តាប្រទេសអាស៊ីគ្នេយ៍ រួចបន្តចូលមករត់នៅពហុកីឡដ្ឋានជាតិមរតកតេជោ ដើម្បីធ្វើពិធីបើកសម្ពោធការប្រកួតកីឡាស៊ីហ្គេម ឆ្នាំ២០២៣ ជាផ្លូវការជាប្រវត្តិសាស្ត្រដំបូងរបស់ព្រះរាជាណាចក្រកម្ពុជា»។ នេះជាការបញ្ជាក់បន្ថែមរបស់ឯកឧត្ដម វ៉ាត់ ចំរើន។
ឯកឧត្តម វ៉ាត់ ចំរើន បានបន្ថែមថា គោលបំណងសំខាន់មួយទៀត គឺចង់បង្ហាញជូនដល់ប្រតិភូក្រមប្រឹក្សាកីឡាអាស៊ីអាគ្នេយ៍ទាំង១១ប្រទេសអាចមើលឃើញពីភាពប្រែប្រួលមុខមាត់ថ្មីនៃហេដ្ឋារចនាសម្ព័ន្ធនៅខេត្តសៀមរាបផងដែរ។ នៅក្នុងកិច្ចប្រជុំក្រុមប្រឹក្សាកីឡាអាស៊ីអាគ្នេយ៍ នាខែមេសា ខាងមុខនេះ ក្នុងឋានៈជាម្ចាស់ផ្ទះ គឺកម្ពុជាមានកិច្ចការច្រើនណាស់ ដែលត្រូវពិភាក្សាជាមួយអាស៊ាន ដើម្បីឱ្យបណ្តាប្រទេសទាំងនោះផ្តល់ការគាំទ្រដល់ម្ចាស់ផ្ទះ ស៊ីហ្គេម ២០២៣ ក៏ដូចជាស្នើឱ្យផ្តល់ជូននូវដំបូន្មាន បទពិសោធល្អៗដែលបណ្តាប្រទេសទាំងអស់ធ្លាប់ធ្វើម្ចាស់ផ្ទះ ស៊ីហ្គេម កន្លងមក ដោយនៅសល់តែកម្ពុជា ១ប៉ុណ្ណោះ ដែលទទួលធ្វើម្ចាស់ផ្ទះ ស៊ីហ្គេម ជាលើកទី១ ដែលកម្ពុជាជាស្ថាបនិកស៊ីហ្គេម និងមួយទៀត លើកលែងតែ ប្រទេសទីម័រខាងកើត ដែលទើបចូលជាសមាជិកអាស៊ាន (កីឡា)។
ឯកឧត្ដមអគ្គលេខាធិការបន្ដថា ការរៀបចំស៊ីហ្គេម បើប្រទេសជាសមាជិកមិនចូលរួម គឺជាបរាជ័យ ដូច្នេះទើបយើងត្រូវយកចិត្តទុកដាក់ខ្ពស់ ថ្នាក់ថ្នម និងជំរុញលើកទឹកចិត្តឱ្យ១០ប្រទេសផ្សេងទៀតក្នុងអាស៊ីអាគ្នេយ៍មកចូលរួមមកកិច្ចប្រជុំ នាខែមេសា ២០២២ គឺមកដើម្បីផ្តល់ក្តីសង្ឃឹម ផ្តល់ការគាំទ្រឲ្យពេញទំហឹងដល់ដំណើរការរៀបចំធ្វើម្ចាស់ផ្ទះ ស៊ីហ្គេម ២០២៣ របស់កម្ពុជាយើង។ ឯកឧត្តមអគ្គលេខាធិការលើកឡើងទៀតថា កិច្ចប្រជុំក្រុមប្រឹក្សាកីឡាអាស៊ីអាគ្នេយ៍ ក្រោមវត្តមានដ៏ខ្ពង់ខ្ពស់របស់ឯកឧត្តមបណ្ឌិត ថោង ខុន ក្នុងនាមជាប្រធានក្រុមប្រឹក្សាកីឡាអាស៊ីអាគ្នេយ៍ក៏នឹងបង្ហាញការនិពន្ធបទភ្លេងគោរពទង់ស៊ីហ្គេម ដោយម្ចាស់ផ្ទះ កម្ពុជា ហើយចេញពីស៊ីហ្គេម របស់កម្ពុជាតទៅ ភ្លេងគោរពទង់ស៊ីហ្គេមនេះនឹងប្រើប្រាស់សម្រាប់ស៊ីហ្គេម ជាបន្តបន្ទាប់ទៀត។ ក្នុងពេលនោះ កម្ពុជាក៏នឹងលើកបង្ហាញនូវការកំណត់ប្រភេទកីឡាមានប៉ុន្មាន មានប៉ុន្មានវិញ្ញាសា ដើម្បីផ្តល់ព័ត៌មានជូនអាស៊ាន ហើយក៏នឹងពិភាក្សាគ្នា តស៊ូមតិជាមួយគ្នា ក្នុងការស្នើនូវប្រភេទកីឡាអ្វីខ្លះ វិញ្ញាសាអ្វីខ្លះ ហើយចុងក្រោយគឺម្ចាស់ផ្ទះកម្ពុជាជាអ្នកអនុម័តថាត្រូវទទួលយក ឬមិនទទួលយក។
ត្រង់ចំណុចនេះ ឯកឧត្តម វ៉ាត់ ចំរើន សង្កត់ធ្ងន់ថា ទោះម្ចាស់ផ្ទះកម្ពុជាមានសិទ្ធិក្តី ក៏យើងឈរលើគោលការណ៍ស្មារតីគោរពស្រឡាញ់ក្នុងនាមជាសមាជិកអាស៊ានដូចគ្នា ហើយប្រសិនការស្នើសុំលើប្រភេទកីឡាណាមួយ ដែលកម្ពុជាមានសក្តានុពលតិចតួច ក៏យើងត្រូវសម្របសម្រួល ដោយឈរលើស្មារតីភាពសាមគ្គីភាព ផ្តល់ភាពកក់ក្តៅ ក្តីសង្ឃឹម ដើម្បីឱ្យកម្ពុជាទទួលបានកិត្តិយស ការស្ញើចសរសើរនៃសមត្ថភាពក្នុងការរៀបចំស៊ីហ្គេម ដើម្បីចារទុកជាប្រវត្តិសាស្ត្ររបស់កម្ពុជា ក៏ដូចជាស៊ីហ្គេម ដូចគ្នាផងដែរ៕
