ឯកឧត្ដម ស សុខា រដ្ឋលេខាធិការក្រសួងអប់រំ យុវជន និងកីឡាបានដឹកនាំកិច្ចប្រជុំជាមួយតំណាង សហព័ន្ធកីឡាជាតិនានា កាលពីល្ងាចថ្ងៃទី០២ ខែមីនា ឆ្នាំ២០២២ នៅទីស្នាក់ការគណៈកម្មាធិការជាតិអូឡាំពិកម្ពុជា ដើម្បីត្រៀមលក្ខណៈសម្បត្តិរៀបចំប្រតិភូកីឡាកម្ពុជាចូលរួមស៊ីហ្គេម លើកទី៣១ នៅវៀតណាម នាខែឧសភា ឆ្នាំ២០២២។
ឯកឧត្ដម ស សុខា បានគូសបញ្ជាក់ថា ការប្រមូលផ្តុំហ្វឹកហាត់បិទខ្ទប់របស់កីឡាករ កីឡា ការិនី ជម្រើសជាតិទាំងអស់ត្រូវគោរពឱ្យបានខ្ជាប់ខ្ជួន ដើម្បីការពារពីជំងឺកូវីដ-១៩ ដើម្បីត្រៀមចូលរួមប្រកួត កីឡាស៊ីហ្គេម ឆាប់ៗខាងមុខនេះឱ្យទទួលបានលទ្ធផលល្អ។ ឯកឧត្ដមបន្ដថា នៅក្នុងឱកាសទៅលេងស្រុកកំណើត ពេលបុណ្យចូលឆ្នាំ ឯកឧត្តមស្នើឱ្យឯកឧត្ដម លោកជំទាវតំណាងសហព័ន្ធ ឬក្រសួងពាក់ព័ន្ធ ក៏ដូចជាមជ្ឈមណ្ឌលជាតិហ្វឹកហ្វឺនកីឡាសូមពិនិត្យលើការដើរហើររបស់កីឡាករជម្រើសជាតិឱ្យបានខ្ពស់បំផុត។ ជាមួយគ្នានោះ ឯកឧត្តមប្រធានអង្គប្រជុំក៏បានលើកឡើងនូវតួនាទី ភារកិច្ចរបស់អនុគណៈកម្មការបច្ចេកទេស ដែលមានតួនាទីយ៉ាងសំខាន់ ក្នុងការត្រួតពិនិត្យ វាយតម្លៃទៅលើប្រភេទកីឡា វិញ្ញាសា និងសមាសភាព គុណផលកីឡា និងវិន័យកីឡាករ-កីឡាការិនី។ ទន្ទឹមនេះ គណៈកម្មការទទួលខុសត្រូវ សម្រេចឱ្យបានមុន និងអនុគណៈកម្មការរដ្ឋបាល ដើម្បីទំនាក់ទំនងផ្ញើជូនគណៈកម្មការរៀបចំការប្រកួត។ គណៈកម្មការនេះមានសារៈសំខាន់ណាស់ ក្នុងការត្រួតពិនិត្យហើយជាពិសេសតាមដាន និងវាយតម្លៃទៅលើកីឡាករ-កីឡាការិនី ហើយមួយទៀតផ្អែកទៅលើវិញ្ញាសាដែលកម្ពុជាបញ្ជូនទៅចូលរួមប្រកួតស៊ីហ្គេមលើកទី៣១នៅប្រទេសវៀតណាម។
ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជាលើកឡើងដែរថា នៅក្នុងកិច្ចប្រជុំអនឡាញកន្លងមក គឺម្ចាស់ផ្ទះស៊ីហ្គេម វៀតណាម តែងតែពីការលំបាកច្រើនក្នុងដំណាក់កាលរីករាលដាលខ្លាំងនៃកូវីដ-១៩ ជាពិសេស ភាគីវៀតណាមបានស្នើសុំឱ្យបណ្តាប្រទេសទាំងអស់ ក្នុងអាស៊ីអាគ្នេយ៍ មានការអត់ធ្មត់ខ្ពស់និងជួយគ្នាក្នុងស្មារតីសាមគ្គីភាពឱ្យបានល្អប្រសើរ។ មកដល់ពេលនេះ ម្ចាស់ផ្ទះវៀតណាមនៅមានបញ្ហាច្រើនមួយចំនួនមិនទាន់រួចរាល់នៅឡើយ។
ទោះយ៉ាងនេះ ឯកឧត្តមអគ្គលេខាធិការក៏ចាត់ទុកថា ស៊ីហ្គេម ២០២២ នៅវៀតណាម គឺព្រឹត្តិការណ៍យុទ្ធសាស្ត្ររបស់កម្ពុជា ក្នុងការឆ្ពោះមកធ្វើម្ចាស់ផ្ទះបន្តវេនលើកទី៣២ នាឆ្នាំ២០២៣។ ឯកឧត្តមស្នើឱ្យសហព័ន្ធកីឡាជាតិនានាពិនិត្យលើ Technical Handbook ដែលជាការកំណត់បច្ចេកទេស ក៏ដូចជាកាលបរិច្ឆេតនៃការប្រកួតវិញ្ញាសានីមួយៗ ដើម្បីងាយស្រួលក្នុងការត្រៀមខ្លួនចូលរួមប្រកួតប្រជែងមេដាយ ស៊ីហ្គេម ឆ្នាំ២០២២នេះ ឱ្យមានភាពច្បាស់លាស់។
លោក ប៉ុន សុខ ប្រធានមជ្ឈមណ្ឌលជាតិហ្វឹកហ្វឺនកីឡាបានជម្រាបជូនថា តាមគម្រោង ស៊ីហ្គេម លើកទី៣១ ឆ្នាំ២០២២ នៅប្រទេសវៀតណាម គ្រោងចាប់ផ្ដើមនៅថ្ងៃទី១២ រហូតដល់ថ្ងៃទី២៣ ខែឧសភា ឆ្នាំ២០២២ ដោយគ្រោងនឹងបញ្ជូនប្រតិភូកីឡាកម្ពុជា សរុប ៥៩៤ នាក់ ក្នុងនោះ មាន៣០ប្រភេទកីឡា ស្ថិតក្នុងការប្រមូលផ្តុំក្រុមជម្រើសជាតិ សរុប៥៧៣នាក់ មានកីឡាករចំនួន ២៨៣នាក់ កីឡាការិនីចំនួន១៦៩នាក់ គ្រូបង្វឹកចំនួន ៨២នាក់ អាជ្ញាកណ្តាល ៨នាក់ និង អ្នកដឹនាំ ក្រុមចំនួន ៣១នាក់៕
