ក្រៅពីទីកន្លែងកម្សាន្តដ៏ទាក់ ទាញ សហគមន៍អេកូទេស ចរណ៍ធម្មជាតិ ចង្ក្រានរយខេត្តសៀមរាប បានរៀបចំកន្លែងផ្តល់សេវាដល់ភ្ញៀវ ក្នុងកម្រិតស្តង់ដារបែបទំនើប

សហគមន៍អេកូទេស ចរណ៍ធម្មជាតិ ចង្ក្រានរយខេត្តសៀមរាប ក្រៅពីមានទេសភាពស្រស់ស្អាត សម្បូរទៅដោយព្រៃឈើចម្រុះ សត្វព្រៃកម្រៗ តំបន់ទឹកធ្លាក់ ពើងថ្មនៅលើភ្នំហើយនោះ បច្ចុប្បន្នទីនេះ បានរៀបចំអភិវឌ្ឍន៍ខ្លួនឱ្យទៅជាកន្លែងកម្សាន្តមានលក្ខណៈស្តង់ដារសម្រាប់ទទួលភ្ញៀវទេសចរជាតិ និងអន្តរជាតិមកលេងកម្សាន្តយ៉ាងសប្បាយរីក រាយ។ អ្នកយកព័ត៌មានយើងប្រចាំខេត្តសៀមរាបធ្វើសេចក្តីរាយការណ៍! លោកស្រីឈឿន សុឌី ប្រធានសហគមន៍អេកូទេសចរណ៍ធម្មជាតិ ចង្ក្រានរយ បានប្រាប់អ្នកយកព័ត៌មានវិទ្យុជាតិកម្ពុជាថា សហគមន៍ព្រៃឈើចង្ក្រានរយ ត្រូវបានបង្កើតឡើងនៅក្នុងឆ្នាំ២០១០ និងនៅឆ្នាំ ២០១៧ បានចុះបញ្ជីជាមួយក្រសួងកសិកម្ម ក្នុងទំហំផ្ទៃដី៩១០៤ហិកតា។ លោកស្រីបន្តថា សហគមន៍អេកូទេសចរណ៍ធម្មជាតិ នេះក្រៅពីមានទេសភាពស្រស់ស្អាត សម្បូរទៅដោយព្រៃឈើ សត្វព្រៃកម្រៗ តំបន់ទឹកធ្លាក់ ពើងថ្មនៅលើភ្នំចន្ទក្រហម ភ្នំចង្ក្រានរយ ដែលអាចទាក់ ទាញចំណាប់អារម្មណ៍ ភ្ញៀវទេសចរ ទៅកម្សាន្តហើយនោះ ថ្មីៗនេះក្រោមកិច្ចសហការជាមួយរដ្ឋបាលខេត្ត អាជ្ញាធរស្រុក និងសមាគមសហគ្រិនវ័យក្មេង សហគមន៍ បានរៀបចំសាង សង់បន្ទប់ទឹក ដោយមានបំពាក់ឧបករណ៍ប្រើប្រាស់ទំនើបៗ បំពាក់ភ្លើងសូឡាសម្រាប់បំភ្លឺ បង្កើតឱ្យមានភោជនីយដ្ឋានលក្ខណៈស្តង់ ដារ មណ្ឌលផ្តល់ព័ត៌មានអំពីសហគមន៍ កន្លែងបោះតង់សម្រាក មានផ្សារណាត់សម្រាប់សហគមន៍ និងផ្លូវធ្វើដំណើរក៏ល្អប្រសើផងដែរ។ សំឡេង៖ចាប់ពីឆ្នាំ២០២២ នេះយើងមានកន្លែងមួយទៀតគេហៅដាលរហាល នោះមានកន្លែងសម្រាប់ភ្ញៀវវីអាយភី មានកន្លែងស្នាក់នៅ មានតង់ធំៗ យើងសហការជាមួយអាជ្ញាធរខេត្ត សមាគមសហគ្រិនវ័យក្មេង ដើម្បីធ្វើការអភិវឌ្ឍន៍នៅកន្លែងនោះ ភ្ញៀវអាចទៅស្នាក់នៅលក្ខណៈស្តង់ដារ យើងមិនថាជាអាស៊ានទេ ប៉ុន្តែគាត់អាចហូបជាម្ហូបវីអាយភី អាចដើរ លេងតាមព្រៃមើលសត្វបាន ស្នាក់នៅអាច១យប់ ២យប់ឬ៣យប់បានយើងមើលសក្តានុពលនៅទីនោះអស់។ សូមជម្រាបផងដែរថា សហគមន៍អេកូទេសចរណ៍ធម្មជាតិ ចង្រ្គានរយ មានទីតាំងក្នុងភូមិបាយដុត ឃុំស្វាយស ស្រុកវ៉ារិន ខេត្តសៀមរាប មានចំងាយប្រមាណជិត១០០គីឡូម៉ែត្រ ពីក្រុងសៀមរាប ដោយត្រូវធ្វើដំណើរទៅដល់ទីប្រជុំជនឃុំល្វាក្រាំង ហើយត្រូវបន្តទៅកាន់តំបន់ទឹកធ្លាក់ មានប្រវែង៨គីឡូម៉ែត្រ រួចមក ត្រូវបន្តដំណើរដោយគោយន្តរបស់សហគមន៍ដើម្បីទស្សនាតំបន់សំខាន់ៗនៅទីនោះ៕