ខេត្តកែបនៃព្រះរាជាណាចក្រកម្ពុជា បានទទួលពានរង្វាន់ទីក្រុងស្អាតនិរន្តរភាព បរិស្ថានអាស៊ាន ដោយពិធីប្រគល់ពានរង្វាន់នេះប្រព្រឹត្តទៅនៅថ្ងៃទី២១ ខែតុលា ឆ្នាំ២០២១ នៅទីក្រុងហ្សាកាតា ប្រទេសឥណ្ឌូណេស៊ី ក្នុងឱកាសនៃកិច្ចប្រជុំថ្នាក់រដ្ឋមន្ត្រីបរិស្ថានអាស៊ាន ដែលខេត្តកែបទទួលបានវិញ្ញាបនបត្រ ទទួលស្គាល់ជាទីក្រុងនិរន្តរភាពបរិស្ថានអាស៊ាន លើកទី៤ ឆ្នាំ២០២១ លើសូចនាករ “ខ្យល់ស្អាត”។
ដោយសារការរីករាលដាលនៃជំងឺកូវីដ-១៩ ពិសេសវីរុសបំប្លែងខ្លួនថ្មី អូមីក្រុង ការអញ្ជើញទទួលពានរង្វាន់ទីក្រុងនិរន្តរភាពបរិស្ថានអាស៊ាន និងកិច្ចប្រជុំថ្នាក់រដ្ឋមន្ត្រី បរិស្ថានអាស៊ាននេះ ត្រូវបានធ្វើឡើងតាមប្រព័ន្ធបញ្ជូនរូបភាព និងសំឡេង ដោយមាន តំណាងទទួលផ្ទាល់ពីឯកឧត្តម ឯកអគ្គរាជទូតនៃព្រះរាជាណាចក្រកម្ពុជា ប្រចាំប្រទេស ឥណ្ឌូណេស៊ី ប្រកបដោយក្តីមោទនភាពក្រៃលែង។
ដើម្បីឱ្យស័ក្តិសម និងកិត្តិយសដែលខេត្តកែបទទួលបានជ័យលាភីនេះ នៅថ្ងៃទី០១ ខែមីនា ឆ្នាំ២០២២ ថ្នាក់ដឹកនាំខេត្ត មន្ត្រីរាជការ រួមទាំងប្រជាពលរដ្ឋ ក្រុមយុវជន និងសិស្សានុ សិស្សជាច្រើនរយនាក់បានមកជួបជុំគ្នា ដង្ហែក្បួនព្យុហយាត្រា អបអរសាទរ តាមដងផ្លូវ សំខាន់ៗ ចាប់ពីសួនច្បារមុខសាលាខេត្តកែប កាត់តាមដងផ្លូវ ៣៣A និង ៣៣ កាត់តាម ទីប្រជុំជនផ្សារកែប ផ្សារដំណាក់ចង្អើរ ផ្សារសេះស និងផ្សារក្តាម ឆ្ពោះមកមុខ សាលាខេត្តវិញ។
ក្នុងពិធីជួបជុំគ្នា ឯកឧត្តមបណ្ឌិត សោម ពិសិដ្ឋ អភិបាល នៃគណ:អភិបាលខេត្តកែប បានគូសបញ្ជាក់ថា វិញ្ញាបនបត្រនេះ បញ្ជាក់អំពីកិច្ចខិតខំប្រឹងប្រែងរួមគ្នា របស់រដ្ឋបាលខេត្ត និងមន្ទីរអង្គភាព ជុំវិញខេត្ត រួមទាំងប្រជាពលរដ្ឋ ព្រះសង្ឃ វិស័យ ឯកជនទាំងអស់ លើការសម្អាតអនាម័យបរិស្ថាន ការរៀបចំ ទុកដាក់សំរាមបានត្រឹមត្រូវ ទើបធ្វើឱ្យយើងនៅ តែរក្សាបាននូវជ័យលាភីដ៏មានកិត្តិយសនេះ។
ឯកឧត្តមបន្ថែមថា កន្លងមកខេត្តកែប ទទួលបានពានរង្វា់ជាច្រើនដូចជា៖ ពានរង្វាន់ ទីក្រុងស្អាត ផ្ការំដួលបីទងលើកទី១ នៅថ្ងៃទី២៨ ខែកុម្ភៈ ឆ្នាំ២០១៥, ពានរង្វាន់ទីក្រុង និរន្តភាពបរិស្ថានអាស៊ាននៅប្រទេសព្រុយណេ នាថ្ងៃទី១៣ ខែកញ្ញា ឆ្នាំ២០១៧ លើ សូចនាករ ដីស្អាត ទឹកស្អាត និងខ្យល់ស្អាត, ពានរង្វាន់ទីក្រុងទេសចរណ៍ស្អាតអាស៊ាន នៅទីក្រុងឈៀងមៃ ប្រទេសថៃ កាលពីថ្ងៃទី២៦ ខែកញ្ញា ឆ្នាំ២០១៨, ពានរង្វាន់ទីក្រុងស្អាត ផ្ការំដួលបីទងលើកទី២ នៅថ្ងៃទី២៨ ខែកុម្ភៈ ឆ្នាំ២០១៨, វិញ្ញាបនបត្រទីក្រុងឈាន មុខអាស៊ាន លើគោលដៅអភិវឌ្ឍន៍ប្រកបដោយចីរភាព ត្រូវទទួលនៅឆ្នាំ២០២០ នៅប្រទេស ជប៉ុន តែត្រូវពន្យារពេលដោយសារវិបត្តិជំងឺកូវីដ-១៩ -និងពានរង្វាន់ចលនាប្រឡងប្រណាំង ឆ្នេរខ្សាច់កម្សាន្តស្អាតរបស់ក្រសួងទេសចរណ៍។
ចំពោះថ្ងៃនេះយើងទទួលបាន វិញ្ញាបនបត្រ និរន្តរភាពបរិស្ថានអាស៊ាន លើសូចនាករ ” ខ្យល់ស្អាត ” ។ឯកឧត្តមអភិបាលខេត្តបន្ថែមទៀតថា បណ្តាជ័យលាភីធំៗដែលខេត្តកែប ទទួល បានផ្ទួនៗគ្នានេះ គឺមកពីការយកចិត្តទុកដាក់ខ្ពស់ ពីថ្នាក់ដឹកនាំខេត្ត និងការចូលរួមយ៉ាង សកម្មពីបណ្តា មន្ទីរអង្គភាព មន្ត្រីរាជការ និងបងប្អូន ប្រជាពលរដ្ឋ រួមគា្នក្នុងកិច្ចអភិរក្ស និងអភិវឌ្ឍន៍ទីក្រុងរបស់ខេត្តកែប ចេញជាលទ្ធផលផ្លែផ្កា ដូចពេលនេះ។
ជាក់ស្តែង សោភណភាព ហេដ្ឋារចនាសម្ព័ន្ធក្នុងខេត្ត មានការរីកចម្រើនគួរឱ្យកត់សម្គាល់ ព្រៃឈើ សំណង់ អាគាររដ្ឋ ផ្ទះសំណាក់ សណ្ឋាគារ អាហារដ្ឋាន ភោជនីយដ្ឋាន សេវាម្ហូបអាហារ ឆ្នេរសមុទ្រ បណ្ដាកោះ និងទីតាំងល្អ ទាំងអស់នេះសុទ្ធសឹងជាផ្នែកមួយជំរុញឱ្យខេត្តទទួល បានជ័យជម្នះក្នុងការប្រឡងប្រណាំដណ្តើមបានជ័យលាភីជាបន្តបន្ទាប់៕
