រដ្ឋបាលខេត្តមណ្ឌលគិរីគ្រោងរៀបចំកែលម្អតំបន់រ៉ែមាស សម្រាប់ឱ្យភ្ញៀវទេសចរទៅលេងកម្សាន្ត

រដ្ឋបាលខេត្តមណ្ឌល គិរី គ្រោងសហការជាមួយវិស័យឯកជន រៀបចំកែលម្អតំបន់រ៉ែមាស សម្រាប់ឱ្យភ្ញៀវទេសចរទៅលេងកម្សាន្ត ដើម្បីស្វែងយល់ពីសោភ័ណ ភាពនៅទីនោះ ។ .. លោក ហៀក សុផាន អភិបាលក្រុងសែនមនោរម្យ ខេត្តមណ្ឌលគិរីបានឱ្យដឹងថា ខេត្តមណ្ឌលគិរីជាខេត្តមួយដែលមានសក្តានុពលខ្ពស់លើវិស័យទេសចរណ៍បែបធម្មជាតិ ដោយមានព្រៃភ្នំនិងវាលស្មៅខៀវស្រងាត់នារដូវវស្សា រីឯរដូវប្រាំងស្មៅនិងធម្មជាតិដទៃប្រែជាពណ៌មាសដូចកំរាលព្រំដែលទាក់ទាញក្រសែភ្នែក អ្នកទេសចរឱ្យមកកម្សាន្តមិនចេះជិនណាយ។ លោកបន្តថា ដើម្បីឱ្យអ្នក ទេសចរដែលមកលេងខេត្ត មណ្ឌលគិរីមានកន្លែងកម្សាន្តកាន់តែសម្បូរបែបនិងបង្កើនស្នាក់នៅបានយូរអង្វែង អាជ្ញាធរខេត្តគ្រោងសហការជាមួយក្រុមហ៊ុនរើណេរហ្សង់ក្នុងការរៀបចំតំបន់រ៉ែមាសឱ្យ ទៅជាកន្លែង សម្រាប់អ្នក ទេសចរចូលសម្រាកកម្សាន្តនិងទស្សនាពីការរុករករ៉ែតាំង ពីដំណាក់កាលដំបូង រហូតឈានទៅចម្រាញ់ចេញជាមាសដុំដែលគេច្នៃទៅជាគ្រឿងអលង្ការដ៏មានតម្លៃ ពិសេសជាងនោះមានអ្នកនាំភ្ញៀវចាំពន្យល់ពីការចម្រាញ់រ៉ែមាសផងដែរ។ លោកបញ្ជាក់ថា ទៅថ្ងៃអនាគត នៅតំបន់នោះ មានឱកាសការងារដល់ប្រជាពលរដ្ឋ យ៉ាងច្រើនផងដែរ។ «អនាគតគឺក្រុមហ៊ុនបានរាយការណ៍ថា នឹងដាក់តំបន់នេះជាកញ្ចប់ទេសចរណ៍កញ្ចប់ទេសចរណ៍ហ្នឹងគឺថាពេលបច្ចុប្បន្នកំពុងតែរៀបចំចេញពីខេត្តមណ្ឌលគិរីទៅគឺមានប្រវែងប្រហែល ៥០ គីឡូជាងនៅតាមដងផ្លូវក៏ជាសក្ដានុពលទេសចរណ៍ធម្មជាតិដែរហើយទៅដល់កន្លែងដែលក្រុមហ៊ុននេះអាចទស្សនានិងក្រុមហ៊ុននឹងរៀប ចំ នេះជាក្រុមហ៊ុនរាយការណ៍ទេមិនទាន់បានដំណើរការទេតែថាគេនឹងធ្វើដូចនៅប្រទេស ក្រៅដំណើរការនៃការរៀបចំរុករករ៉ែចាប់ផ្តើមពីណាទៅណាគេនឹងរៀបចំបែបបទនេះដើម្បី ឱ្យភ្ញៀវទេសចរទស្សនា»។ គួរជម្រាបថា ក្រុមហ៊ុនរើណេហ្សង់ គឺជាក្រុមហ៊ុនទី១ ដែលបានចាប់ផ្ដើមផលិតមាស ជាលើកដំបូង នៅប្រទេសកម្ពុជា។ ក្រុមហ៊ុននេះ បានចាប់ផ្ដើមសម្ពោធដាក់ឱ្យដំណើរការជាផ្លូវការអាជីវកម្មរបស់ខ្លួន នៅថ្ងៃទី២១ ខែមិថុនា ឆ្នាំ២០២១៕