ក្លឹបកីឡាប្រដាល់គុនខ្មែរក្រសួងការពារជាតិដណ្តើមបានចំណាត់ថ្នាក់លេខ១ ដោយដណ្តើមបានមេដាយមាសច្រើនជាងគេ នៅក្នុងចំណោមក្លឹបសរុបចំនួន១៤ ដែលចូលរួមប្រកួតប្រជែងកីឡាប្រដាល់គុនខ្មែរជ្រើសរើសជើងឯកថ្នាក់ជាតិ ប្រចាំឆ្នាំ២០២១ ដោយបាន បញ្ចប់ដោយជោគជ័យ កាលពីល្ងាចថ្ងៃទី១៨ ខែកុម្ភៈ ឆ្នាំ២០២២ នៅពហុកីឡដា្ឋនស្តាតចាស់។
នៅក្នុងការរប្រកួតប្រដាល់គុនខ្មែរ ដែលដំណើររយៈពេល៥ថ្ងៃ ចាប់ពីថ្ងៃ១៤-១៨ ខែកុម្ភៈ ឆ្នាំ២០២២ កីឡាករ ក្រសួងការពារជាតិឈ្នះមេដាយសរុប១១គ្រឿង ក្នុងនោះមេដាយមាស ៨ ប្រាក់៣ ខណៈខេត្តស្វាយរៀងឈរ លេខ២ មេដាយមាស ២ និងសំរឹទ្ធិ៤ និងក្រសួងមហាផ្ទៃ មេដាយមាស១ ប្រាក់១ និងសំរឹទ្ធិ២។ ក្រៅពី នេះក្លឹប១០ផ្សេងៗទៀត ក៏ទទួលបានមេដាយតិចតួចដែរ លើកលែងតែខេត្តកណ្តាលមួយប៉ុណ្ណោះ ដែល មិនឈ្នះមេដាយសោះ។
លោក ហេង សុខឃន អគ្គលេខាធិការ សហព័ន្ធកីឡាប្រដាល់គុនខ្មែរបានឱ្យដឹងថា ការប្រកួតជើងឯកលើកនេះមានសមាគម ក្រសួង រាជធានី-ខេត្ត ចូលរួមសរុបចំនួន ១៤ និងមានកីឡាករ កីឡាការិនី ១១៣ នាក់ (នារី១៣នាក់) ប្រតិភូ គ្រូបង្វឹក ៣២នាក់ មន្រ្តីបច្ចេកទេស អាជ្ញាកណ្តាល ចៅក្រមចំនួន ១១៥នាក់ សរុបរួមចំនួន ២៩៨នាក់។ លោកបានលើកឡើងថា នៅឆ្នាំ២០២១នេះ ផ្នែកកីឡាការិនីមានការកើនឡើងទាំងបរិមាណ និងគុណភាព គួរឱ្យកត់សម្គាល់។ ចំពោះវិញ្ញាសាសរុបចំនួន១៣ប្រភេទទម្ងន់ ក្នុងនោះមានផ្នែគនារី៤ប្រភេទទម្ងន់ចន្លោះ ៤៨ គីឡូក្រាម ដល់៦០ គីឡូក្រាម ខណៈផ្នែកបុរសមាន៩ប្រភេទទម្ងន់ ពី៤៥ គីឡូក្រាម ដល់៧១ គីឡូក្រាម។ ការប្រកួតអនុវត្តន៍ ទៅតាមរូបមន្តជម្រុះ សរុបមានចំនួន ៧៥ ប្រកួត។
ឯកឧត្តម តែម ម៉ឺន ប្រធានសហព័ន្ធកីឡាប្រដាល់គុនខ្មែរបានថ្លែងថា កីឡាករ កីឡាការិនីជ័យលាភី ក្នុងការប្រកួតជ្រើសរើសជើងឯកថ្នាក់ជាតិឆ្នាំ២០២១នេះ សុទ្ធតែជាបេក្ខភាព ដែលត្រូវជ្រើសរើសប្រមូលផ្តុំ ជាកីឡាករជម្រើសជាតិ ដើម្បីហ្វឹកហាត់ត្រៀមចូលរួមប្រកួតកីឡាស៊ីហ្គេម លើកទី៣១ នៅប្រទេស វៀតណាម និងស៊ីហ្គេម លើកទី៣២ ឆ្នាំ២០២៣ នៅកម្ពុជា និងត្រៀមចូលរួមប្រកួតអន្តរជាតិនានា ក្នុង និងក្រៅប្រទេស។ ឯកឧត្ដមប្រធានសហព័ន្ធប្រដាល់គុនខ្មែរក៏បានលើកបង្ហាញនូវការដឹងគុណចំពោះដល់រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខដឹកនាំប្រកបដោយគតិ បណ្ឌិត និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលសម្តេចទាំងទ្វេតែងតែបានផ្តល់អនុសាសន៍ ដ៏ខ្ពង់ខ្ពស់អំពីនយោបាយដឹកនាំ ការឧបត្ថម្ភគាំទ្រ ទាំងសម្ភារ និងថវិកាមកដល់មន្រ្តីសហព័ន្ធ គ្រូបង្វឹក កីឡាករជាបន្តបន្ទាប់។ ឯកឧត្តមប្រធានក៏ដឹងគុណចំពោះក្រសួងអប់រំ យុវជន និងកីឡា ដែលបានផ្តល់ នូវកញ្ចប់ថវិកាគាំទ្រប្រចាំឆ្នាំដល់សហព័ន្ធកីឡាប្រដាល់គុនខ្មែរ និងគណៈកម្មាធិការជាតិអូឡាំពិកកម្ពុជា និងដៃគូអភិវឌ្ឍន៍វិស័យកីឡាប្រដាល់គុនខ្មែរ ដើម្បីបន្តដំណើរការអភិវឌ្ឍន៍ឆ្ពោះទៅប្រជែងមេដាយមាសឱ្យបាន៣គ្រឿង ក្នុងឋានៈជាម្ចាស់ ផ្ទះស៊ីហ្គេម ឆ្នាំ២០២៣ ជាប្រវត្តិសាស្ត្រផងដែរ។
ក្នុងនាមក្រសួងអប់រំ យុវជន និងកីឡា, ឯកឧត្តម អ៊ុក សិទ្ធិជាតិ អគ្គនាយក អគ្គនាយកដ្ឋានកីឡាបានកោតសរសើរ និងវាយតម្លៃខ្ពស់ ចំពោះគណៈកម្មការរៀបចំការប្រកួត អង្គភាពពាក់ព័ន្ធ ប្រតិភូកីឡាក្រសួង រាជធានី-ខេត្ត ដែលបានសហការគ្នារៀបចំការប្រកួតកីឡាប្រដាល់គុនខ្មែរ ជ្រើសរើសជើងឯកថ្នាក់ជាតិ ប្រចាំឆ្នាំ២០២១ ឱ្យប្រព្រឹត្តទៅដោយរលូន តាមការគ្រោងទុកប្រកបដោយភាពជោគជ័យ។ ឯកឧត្តមអគ្គនាយកកីឡាក៏បានលើកទឹកលើកចិត្តដល់គ្រូបង្វឹក កីឡាករ កីឡាការិនីទាំងអស់ ដែលបានខិតខំប្រកួតអស់ពីសមត្ថភាព គោរពបាននូវបទបញ្ជានៃការប្រកួត និងទទួលបានលទ្ធផលល្អប្រសើរនាពេលនេះ។ ឯកឧត្ដមបានបន្ថែមថា រឿងសំខាន់មួយទៀត គឺគណៈកម្មការបច្ចេកទេសទាំងអស់បានដឹកនាំការប្រកួតតាមគោលការណ៍ បច្ចេកទេស ប្រកបដោយយុត្តិធម៌ និងតម្លាភាព ដោយបានរកឃើញកីឡាករ កីឡាការិនីឆ្នើមៗប្រចាំឆ្នាំ នាពេលនេះ៕
