រាជធានីភ្នំពេញ ៖ ទីតាំងហ្គេមបាញ់ត្រីចំនួន ៣ទីតាំង ស្ថិតនៅចំណុច កន្លែងទិញលក់អេតចាយ និងកន្លែងទិញ-លក់ត្រី ស្ថិតក្នុងភូមិព្រែកដើមចាន់ សង្កាត់ច្បារអំពៅ២ ខណ្ឌច្បារអំពៅ រាជធានីភ្នំពេញ បានបើកដំណើរការឡើងវិញហើយ ក្រោយពេលដែលសមត្ថកិច្ចនៅក្នុងមូលដ្ឋាន បង្ក្រាបមិនទាន់បានមួយដង្ហើមចង្រិតផងនោះ។
ប្រភពព័ត៌មានបានបញ្ជាក់ថា៖ ទីតាំងហ្គេមបាញ់ត្រី នៅចំណុចទីតាំងខាងលើ កំពុងតែបើកដំណើរការលេងយ៉ាងរលូន ទំនងជាអាជ្ញាធរនិងសមត្ថកិច្ចនៅក្នុងមូលដ្ឋានជាអ្នកបើកភ្លើងខៀវ ល្មើសនឹងបទបញ្ជាថ្នាក់ដឹកនាំ។
ប្រភពដដែលបានបញ្ចាក់ថា៖ ទីតាំងហ្គេមបាញ់ត្រីនៅចំណុចខាងលើនេះ ម្ចាស់ទីតាំងមានឈ្មោះ(ស្វា) និងឈ្មោះ(ធី) បានបើកលេងយ៉ាងរលូន ដោយពង្វក់មនុស្សម្នារអោយឆ្កួតវង្វេង គេចផ្ទះសម្បែង ឬអាចប្រើអំពើហិង្សាទៅប្រពន្ធកូនទៀតផង បើសិនជាឯកឧត្តមឃួងស្រេងអភិបាលរាជធានីភ្នំពេញ និងឯកឧត្តមសថេតស្នងការនគរបាលរាជធានីភ្នំពេញ មិនចេញបទបញ្ជារដល់មន្ត្រីថ្នាក់ក្រោមអោយបង្ក្រាបបទល្មើសទីតាំងហ្គេមបាញ់ត្រីខាងលើនេះនោះទេ។
ម្ចាស់ទីតាំងហ្គេមបាញ់ត្រីឈ្មោះ(ស្វា) គឺស្ថិតនៅចំណុចច្រាំងបាក់។ ចំណែកម្ចាស់ទីតាំងឈ្មោះ(ធី) នៅចំណុចយឿរត្រី ។
សូមបញ្ជាក់ថា កន្លងមកឯកឧត្តមឃួងស្រេង អភិបាលរាជធានីភ្នំពេញ បានដាក់បទបញ្ជាដល់អភិបាលខណ្ឌទាំង១៤ ពិសេសស្នងការរងរាជធានីភ្នំពេញទទួលបន្ទុកផ្នែកព្រហ្មទណ្ឌ កុំចាប់តែទូបាញ់ត្រី និងឧបករណ៌ល្មើសច្បាប់មួយចំនួនទៀត ត្រូវចាប់ទាំងមនុស្សបញ្ជូនទៅតុលាការដើម្បីអោយព្រះរាជអាជ្ញាចោទប្រកាន់តាមផ្លូវច្បាប់អោយខាងតែបាន។
ពាក់ព័ន្ធទៅនឹងករណី បនល្បែងខាងលើនេះ ធ្វើអោយពលរដ្ឋរស់នៅជិតបនល្បែងខាងលើនេះ កំពុងតែមានការព្រួយបារម្ភភ័យខ្លាចយ៉ាងខ្លាំង នូវអំពើចោរកម្ម និងបទល្មើសផ្សេងៗទៀត អាចនិងកើតមានឡើង ដូចជាចោរលួចចោរឆក់ និងចោរប្លន់ជាដើម។
ដូច្នេះហើយពលរដ្ឋ បាននាំគ្នាអំពាវនាវដល់ ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ ជាពិសេស លោកឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ គួរតែមានចំណាត់ការក្តៅ ចាត់កម្លាំងក្រោមឱវាទ អោយចុះមកត្រួតពិនិត្យទីតាំងបនល្បែងខាងលើងនេះ ដែលកំពុងដំណើរការ បើកលេងយ៉ាងរលូន នៅភូមិសាស្ត្រខាងលើ និងមានវិធានការទប់ស្កាត់និងបង្ក្រាបអោយបានទាន់ពេលវេលា ស្របតាមគោលនយោបាយភូមិ សង្កាត់ មានសុវត្ថិភាពរបស់រាជរដ្ឋាភិបាលកម្ពុជា៕
