ខេត្តសៀមរាប ៖ គណៈបញ្ជាការឯកភាពខេត្តសៀមរាបបានអនុវត្តផែនការរឹតបន្តឹង បន្ថែមលើវិធានការទប់ស្កាត់ការរាតត្បាតជំងឺកូវីដ-១៩ ក្នុងក្រុងសៀមរាប ដើម្បីបង្កើនប្រសិទ្ធភាពសុវត្ថិភាពជូនប្រជាពលរដ្ឋ។
លោកឧត្តមសេនីយ៍ត្រី តេង ច័ន្ទណាត ស្នងការនៃស្នងការដ្ឋាននគរបាលខេត្តសៀមរាបបានឱ្យដឹងថា កម្លាំងសមត្ថកិច្ចបាន អនុវត្តផែនការ រឹតបន្តឹងបន្ថែមលើវិធានការទប់ស្កាត់ការរាតត្បាតជំងឺកូវីដ-១៩ក្នុងក្រុងសៀមរាប ក្នុងនោះកម្លាំងប្រតិបត្តិការកំពុងធ្វើសកម្មភាព យាមល្បាតយ៉ាងតឹងរ៉ឹង នៅតាមទីតាំងគោលដៅជាង១០០កន្លែង។
លោកបន្តថា អនុវត្តតាមបទបញ្ជារបស់ឯកឧត្តម ទៀ សីហា អភិបាលខេត្ត និងជាប្រធានគណៈបញ្ជាការឯកភាពខេត្តសៀមរាប កម្លាំងសមត្ថកិច្ចទាំង៣ រួមមានកងកម្លាំងរបស់ស្នងការដ្ឋាននគរបាលខេត្ត កងរាជអាវុធហត្ថខេត្ត កងកម្លាំងយោធាមកពីតំបន់ ប្រតិបត្តិការសឹករងខេត្តសៀមរាប សហភាពសហព័ន្ធយុវជនកម្ពុជាខេត្ត រួមទាំងកម្លាំងប្រជាការពារភូមិ ដែលជាកងកម្លាំងសហការ នៅតាមមូលដ្ឋាន បានបន្ថែមមធ្យោបាយល្បាតចល័តយ៉ាងតឹងរ៉ឹង ដោយប្រើប្រាស់កម្លាំងសមត្ថកិច្ចបំពាក់ដោយម៉ូតូជាង៩០គ្រឿង និង រថយន្តចំនួន ៥គ្រឿងបន្ថែមទៀត ព្រមទាំងសម្ភារឧបករណ៍ឃាត់ស្ទាក់មួយចំនួនទៀតផងដែរ។ ទាំងនេះ គឺជាយន្តការរឹតបន្តឹងចាំបាច់ នៅក្នុងតំបន់ក្រហមនិងតំបន់លឿងទុំ លើមូលដ្ឋានសង្កាត់ទាំង១២នៃក្រុងសៀមរាប ដើម្បីកាត់បន្ថយហានិភ័យ និងឈានទៅកាត់ផ្តាច់ខ្សែ ចម្លងជំងឺកូវីដ-១៩ ក្នុងសហគមន៍នៅភូមិសាស្ត្រខេត្តសៀមរាប។
លោកបន្តទៀតថា ដើម្បីកាត់ផ្តាច់ចរន្តនៃការចម្លងជំងឺកូវីដ១៩នេះបាន លុះត្រាតែបងប្អូនប្រជាពលរដ្ឋទាំងអស់ចូលរួមអនុវត្តឱ្យបាន ខ្ជាប់ខ្ជួននូវវិធានការរដ្ឋបាល ដែលរដ្ឋបាលខេត្តបានដាក់ចេញ និងអនុវត្តទៅតាមការណែនាំរបស់ក្រសួងសុខាភិបាល។
ក្នុងនាមគណបញ្ជាការឯកភាពខេត្តសំណូមពរដ៏ទទួច ដល់បងប្អូនប្រជាពលរដ្ឋក្នុងខេត្តសៀមរាបរស់នៅក្នុង តំបន់បិតខ្ទប់ តំបន់លឿងទំ តំបន់ក្រហម សូមមេត្តាចូលរួមអនុវត្តឱ្យបានខ្ជាប់ខ្ជួនតាមវិធានរដ្ឋបាលដែលសាលាខេត្តបានដាក់ចេញមក ការពាក់ម៉ាស់ ការលាងដៃនឹងអាល់កុល ការមិនជូបជុំគ្នា ការរស់ដាច់ដោយឡែកពីគ្នាមួយរយៈ ហើយកត្តាទាំងនេះហើយជាវិធានការ ដើម្បីទប់ស្កាត់ការ រីករាលដាលនៃជំងឺកូវីដ១៩នៅក្នុងខេត្តយើងនេះ ។ចំណែកកងកម្លាំងរបស់យើងគឺអនុវត្តទៅតាមតួនាទីនិងភារៈកិច្ច ដែលសាលាខេត្ត បានចេញជាគោលការណ៍រួចហើយ គឹយើងមានការផាកពិន័យនិងអាចឈានទៅដាក់ពន្ធនាគារថែមទៀត។
សូមរំឭកថា កាលពីថ្ងៃទី១៧ ខែកញ្ញា ឆ្នាំ២០២១កន្លងមក រដ្ឋបាលខេត្តសៀមរាប សម្រេចកំណត់តំបន់ក្រហម ក្នុងភូមិសាស្ត្រ នៃសង្កាត់ និងភូមិខ្លះ នៃក្រុងសៀមរាប ខេត្តសៀមរាប ជាបណ្តោះអាសន្ន ក្នុងគោលបំណងធានាដល់ប្រសិទ្ធភាព នៃការគ្រប់គ្រងការឆ្លងរាលដាល នៃជំងឺកូវីដ-១៩ នៅក្នុងភូមិសាស្រ្តដែលត្រូវបិទ និងទប់ស្កាត់ជំងឺនេះមិនឱ្យឆ្លងរាលដាលទៅតំបន់ផ្សេងទៀត រហូតមានការចេញសេចក្ដី សម្រេចជាថ្មី ក្នុងនោះគណៈបញ្ជាការឯកភាពរដ្ឋបាលខេត្ត បានអនុវត្តវិធានការចាំបាច់មួយចំនួន ចំពោះបុគ្គលដែលមិនគោរពតាមបម្រាម ដែលរដ្ឋបាលខេត្តបានដាក់ចេញ៕
