មានតែគណបក្សប្រជាជនកម្ពុជាមួយប៉ុណ្ណោះដែលជាប់ឆ្នោត ក្នុងការប្រកួតប្រជែងដណ្តើមកៅអីជាសមាជិកក្រុមប្រឹក្សាក្រុងបូកគោ សម្រាប់ការបោះឆ្នោតលើកទី១

ភ្នំពេញ ៖ គណៈកម្មាធិការជាតិរៀបចំការបោះឆ្នោត ហៅកាត់ គ.ជ.ប បានឱ្យដឹងថា មានតែគណបក្សប្រជាជនកម្ពុជាមួយប៉ុណ្ណោះដែលជាប់ឆ្នោត ក្នុងការប្រកួតប្រជែងដណ្តើមកៅអីជាសមាជិកក្រុមប្រឹក្សាក្រុងបូកគោ សម្រាប់ការបោះឆ្នោតលើកទី១។

លទ្ធផលបឋមរបស់គ.ជ.ប ដែល ប្រកាសក្រោយការបោះឆ្នោតជ្រើសរើសក្រុមប្រឹក្សាក្រុងបូកគោ នៃខេត្តកំពត នៅថ្ងៃអាទិត្យ ទី២៥ ខែកក្កដា ឆ្នាំ២០២១ បានបញ្ជាក់ថា គណបក្សប្រជាជនកម្ពុជា បានទទួលសន្លឹកឆ្នោតចំនួន១៧សំឡេង ក្នុងចំណោមគណបក្សនយោបាយផ្សេងទៀតដែលមិនទទួលបានការគាំទ្រទាល់តែសោះ។

ការបោះឆ្នោតដណ្តើមអាសនៈជាក្រុមប្រឹក្សាក្រុងបូកគោនៃខេត្តកំពត លើកទី១នេះ មានគណបក្សនយោបាយចំនួន៤ចូលរួមគឺ៖ គណបក្សហ៊្វិនស៊ិនប៉ិច គណបក្សយុវជនកម្ពុជា គណបក្សប្រជាជនកម្ពុជា និងគណបក្សសញ្ជាតិកម្ពុជា។

ចំនួនសមាជិកក្រុមប្រឹក្សាក្រុងបូកគោសម្រាប់អាណត្តិទី១ ដែលត្រូវបានជ្រើសរើសនេះ មានចំនួន១៣នាក់ ហើយអ្នកបោះឆ្នោត គឺជាសមាជិកក្រុមប្រឹក្សាសង្កាត់ក្នុងមុខតំណែងដែលមានចំនួន១៧រូប នៅក្នុងសង្កាត់ចំនួន៣ នៃក្រុងបូកគោ គឺសង្កាត់បឹងទូក សង្កាត់កោះតូចនិងសង្កាត់ព្រែកត្នោត។

សេចក្តីប្រកាសព័ត៌មានរបស់គ.ជ.ប បានឱ្យដឹងថា ការបោះឆ្នោតជាអសកលនេះ បានរៀបចំឡើងដោយរលូន មានសន្តិសុខ សុវត្ថិភាព និងមានសណ្តាប់ធ្នាប់ របៀបរៀបរយល្អ ខណៈស្ថិតក្នុងបរិបទនៃការរីករាលដាលជំងឺកូវីដ-១៩។

ការិយាល័យបោះឆ្នោត បានចាប់ផ្តើមបើកនៅវេលាម៉ោង៧ព្រឹកគត់ និងបានបិទទៅវិញនៅវេលាម៉ោង៧:៤១នាទីព្រឹក បន្ទាប់ពីអ្នកបោះឆ្នោតចំនួន១៧រូប ដែលជាសមាជិកក្រុមប្រឹក្សាសង្កាត់បឹងទូក សង្កាត់ព្រែកត្នោត និងសង្កាត់កោះតូច បានចូលទៅបោះឆ្នោតរួចរាល់។

ការបោះឆ្នោត និងរាប់សន្លឹកឆ្នោត បានអនុវត្តនីតិវិធីនៅនឹងការិយាល័យ ប្រកប ដោយភាពត្រឹមត្រូវ និងមានតម្លាភាព ដោយមានការឃ្លាំមើលពី ភ្នាក់ងារគណបក្សនយោបាយ អ្នកសង្កេតការណ៍បោះឆ្នោត និងអ្នកសារព័ត៌មានជាតិ។

សូមបញ្ជាក់ថា ការរៀបចំ បោះឆ្នោតជ្រើសរើសក្រុមប្រឹក្សាក្រុងបូកគោនេះ ធ្វើឡើងបន្ទាប់ពីរាជរដ្ឋាភិបាលកម្ពុជា បានសម្រេចបង្កើតក្រុងបូកគោ នៃខេត្តកំពត ដើម្បីងាយស្រួលគ្រប់គ្រងរដ្ឋបាលដែនដី សំដៅធ្វើការអភិវឌ្ឍន៍ឱ្យកាន់តែមានការរីកចម្រើនបន្ថែមទៀត និងបង្ខិតសេវាការងាររដ្ឋបាលជូនប្រជាពលរដ្ឋ៕