សាខាកាកបាទក្រហមកម្ពុជាខេត្តព្រៃវែង ចុះសួរសុខទុក្ខ និងនាំយកអំណោយមនុស្សធម៌ប្រគល់ជូនដល់អ្នកជំងឺកូវីដ-១៩ ដែលកំពុងសម្រាកព្យាបាលនៅទីតាំងព្យាបាលក្រុង ស្រុក នៃខេត្តព្រៃវែង

ខេត្តព្រៃវែង ៖ នៅថ្ងៃទី ១០ – ១១ ខែកក្កដា ឆ្នាំ២០២១ ឯកឧត្តម ឧកញ៉ា សុខ ផេង អនុប្រធានអចិន្រ្តៃយ៍គណៈកម្មាធិការសាខាខេត្ត តំណាង ឯកឧត្តម ជា សុមេធី ប្រធានគណៈកម្មាធិការសាខាខេត្ត បានដឹកនាំគណៈកម្មាធិការសាខា ក្រុមប្រតិបត្តិសាខា អមដំណើរដោយក្រុមការងារអនុសាខាក្រុង ស្រុក និងក្រុមគ្រូពេទ្យប្រចាំការទីតាំងព្យាបាល អញ្ជើញចុះសួរសុខទុក្ខ និងនាំយកអំណោយមនុស្សធម៌ប្រគល់ជូនដល់អ្នកជំងឺកូវីដ-១៩ ដែលកំពុងសម្រាកព្យាបាលនៅទីតាំងព្យាបាល ចំនួន ១២ ទីតាំង ទាំង១៣ ក្រុង ស្រុក នៃខេត្តព្រៃវែង។

នៅក្នុងឱកាសនោះដែរ ឯកឧត្តម ឧកញ៉ា អនុប្រធានអចិន្រ្តៃយ៍ បាននាំមកនូវប្រសាសន៍ផ្តាំផ្ញើសាកសួរសុខទុក្ខពីសំណាក់ឯកឧត្តម ជា សុមេធី ប្រធានគណៈកម្មាធិការសាខាខេត្ត ជាពិសេសសម្ដេចគតិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដល់បងប្អូនប្រជាពលរដ្ឋ កំពុងសម្រាកព្យាបាលជំងឺកូវីដ-១៩ ដែលជំងឺនេះ កំពុងតែរាតត្បាតពាសពេញពិភពលោក ក៏ដូចជានៅក្នុងប្រទេសកម្ពុជាយើងនេះ ដែលមានអ្នកឆ្លង និងស្លាប់ផងដែរ។

ឯកឧត្តម អនុប្រធានអចិន្ត្រៃយ៍ បានមានប្រសាសន៍ផ្តាំផ្ញើដល់បងប្អូនប្រជាពលរដ្ឋដែលកំពុងសម្រាកព្យាបាលត្រូវហាត់ប្រាណជាប្រចាំ ចេះការពារខ្លួន និងបង្ការពីការរីករាលដាលពីជំងឺកូវីដ-១៩ និងអនុវត្តតាមការណែនាំរបស់ក្រសួងសុខាភិបាល និងវិធានការ ៣កុំ ៣ការពារ និង២ចូលរួម របស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ស្តីពីការទប់ស្កាត់ការរីករាលដាលនៃជំងឺកូវីដ-១៩។

សម្រាប់រយៈពេលពីថ្ងៃនេះ សាខាបានផ្តល់ជូនសម្ភារៈបានចំនួន ៨ ទីតាំង ដែលស្មើនឹង ៨ ក្រុង ស្រុក រួមមានៈ មី ៤៣៥ កេស និងត្រី ខ ៤៣៥ យួរ។ នាឱកាសនោះ សាខាខេត្ត បានឧបត្ថម្ភដល់ក្រុមគ្រូពេទ្យប្រចាំទីតាំងព្យាបាល ១ទីតាំងថវិកា ២០០,០០០រៀល។ ដោយឡែកចំពោះស្រុក ចំនួន ៥ ដែលស្មើនឹង ៥ ទីទាំងទៀត សាខានឹងបន្តចុះសួរសុខទុក្ខជាបន្តបន្ទាប់ទៀត។

ក្នុងនោះដែរ ក្រុមហ៊ុន ស៊ីស៊ី ប្លូស៊ី ត្រាវែល ធួ ខូ អិលធីឌី CC Blue Sea Travel Tour Co Ltd. បានឧបត្ថម្ភ ទឹកប្លូស៊ីអង់ទីអុកស៊ីដង់ ចំណុះ ១,៥ លីត្រ ចំនួន ១៨៥១ ដប និងទឹកសម្លាប់មេរោគ LH-CLEAN-19 ចំណុះ ៥ លីត្រ ចំនួន ៦១៧ ពិដុង ដល់ឯកឧត្តម ឧកញ៉ា សុខ ផេង អនុប្រធានអចិន្ត្រៃយ៍គណៈកម្មាធិការសាខាខេត្តដើម្បីចែកជូនដល់បងប្អូនប្រជាពលរដ្ឋដែលកំពុងសម្រាកព្យាបាលជំងឺកូវី19 នៅតាមទីតាំងព្យាបាលទាំង ១៣ ក្រុង ស្រុក នៃខេត្តព្រៃវែងផងដែរ។

សូមបញ្ជាក់ផងដែរថា៖ បើគិតត្រឹមថ្ងៃទី១០ ខែកក្កដា ឆ្នាំ២០២១ ខេត្តព្រៃវែងមានអ្នកឆ្លងជំងឺកូវីដ-១៩ សរុប ២,១៧១នាក់ បានព្យាបាល ជាសះស្បើយ ១,៣៧២នាក់ កំពុងសំរាកព្យាបាល ៧៦៤នាក់ និងស្លាប់ ៣៥នាក់៕