ខេត្តកណ្ដាល ៖ រសៀលថ្ងៃទី១០ ខែកុម្ភៈ ឆ្នាំ២០២៥ នៅមន្ទីរសាធារណការ និងដឹកជញ្ជូនខេត្តកណ្តាល មានរៀបចំពិធីផ្ទេរ និងប្រកាសចូលកាន់មុខតំណែង លោក បូរី វង្សសានិត្យ ជាប្រធានមន្ទីរសាធារណការ និងដឹកជញ្ជូនខេត្តកណ្ដាល ជំនួសលោក ម៉ឹង យូឡេង ត្រូវបានតែងតាំងជាប្រធានមន្ទីរសាធារណការ និងដឹកជញ្ជូនខេត្តព្រះសីហនុ ក្រោមអធិបតីភាពឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ឯកឧត្ដម នូ សាខន ប្រធានក្រុមប្រឹក្សាខេត្តកណ្ដាល និងឯកឧត្ដម គួច ចំរើន អភិបាល នៃគណៈអភិបាលខេត្តកណ្ដាល។
មានប្រសាសន៍ក្នុងពិធីនេះដែរ ឯកឧត្ដម គួច ចំរើន អភិបាល នៃគណៈអភិបាលខេត្តកណ្ដាល បានកោតសរសើរ និងវាយ តម្លៃខ្ពស់ចំពោះលោក ម៉ឹង យូឡេង ដែលខិតខំបំពេញតួនាទី និងភារកិច្ចប្រកបដោយវិជ្ជាជីវៈ និងស្មារតីទទួលខុសត្រូវខ្ពស់ឱ្យសម្រេចបាននូវសមិទ្ធផលជាច្រើនសម្រាប់ខេត្តកណ្តាល ព្រមទាំងអបអរសាទរលោក បូរី វង្សសានិត្យ ដែលត្រូវបានរាជរដ្ឋាភិបាលផ្តល់សេចក្តីទុកចិត្ត និងតែងជាប្រធានមន្ទីរសាធារណការ និងដឹកជញ្ជូនខេត្តកណ្តាល ដើម្បីធ្វើជាសេនាធិការបច្ចេកទេសឱ្យរដ្ឋបាលខេត្តឆ្ពោះទៅសម្រេចបាន សមិទ្ធផលថ្មីៗបន្ថែមទៀតជូនប្រជាពលរដ្ឋ និងដើម្បីបន្តអនុវត្តគោលការណ៍ច្បាប់ លិខិតបទដ្ឋានគតិយុត្ត និងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា ក្រោមការដឹកនាំប្រកបដោយថាមពល ស្វាហាប់ ឈ្លាសវៃ ម៉ត់ចត់ ប៉ិនប្រសប់ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។
ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានណែនាំដល់ លោកប្រធានមន្ទីរដែលទើបតែងទាំងថ្មី និងមន្ត្រីរាជការទាំងអស់ ត្រូវខិតខំផ្ដល់សេវាសាធារណៈឱ្យបានត្រឹមត្រូវ ប្រសិទ្ធភាព តម្លាភាព និងរហ័សជៀសវាងកុំប៉ះពាល់ផលប្រយោជន៍ជាមួយប្រជាពលរដ្ឋ ជាពិសេសត្រូវប្រកាន់ភ្ជាប់នូវវប្បធម៌សាធារណៈ និងត្រូវប្រកាន់ភ្ជាប់នូវមន្ត្រីរាជការជាអ្នកបម្រើរាស្ត្រ មិនមែនជាចៅហ្វាយរាស្ត្រនោះទេ។ ត្រូវពង្រឹងការជួសជុល និងថែទាំហេដ្ឋារចនាសម្ព័ន្ធ ផ្លូវ ស្ពាន ឱ្យបានទាន់ពេលវេលា និងប្រកបដោយគុណភាពស្របតាមស្តង់ដារបច្ចេកទេស។ ត្រូវខិតខំផ្សព្វផ្សាយច្បាប់ស្ដីពីការដឹកជញ្ជូននានាដូចជា៖ ច្បាប់ស្ដីពីការដឹកជញ្ជូនផ្លូវទឹក ច្បាប់ស្ដីពីប្រព័ន្ធទឹកកខ្វក់ ជូនដល់បងប្អូនប្រជាពលរដ្ឋឱ្យបានយល់ដឹង និងវិធានការមួយចំនួនដែលត្រូវគោរព និងប្រតិបត្តិតាម។ ត្រូវជំរុញការផ្សព្វផ្សាយច្បាប់ចរាចរណ៍ផ្លូវគោក និងការលើកកម្ពស់សុវត្ថិភាពចរាចរណ៍ ពិសេសពិនិត្យលើការគូសគំនូសសញ្ញា និងការបំពាក់ស្លាកសញ្ញាចរាចរណ៍ឱ្យមានស្តង់ដារបច្ចេកទេសត្រឹមត្រូវ តាមការណែនាំរបស់ក្រសួង ដើម្បីចូលរួមការទប់ស្កាត់គ្រោះថ្នាក់ចរាចរណ៍នៅក្នុងខេត្ត។
