ក្រុមហ៊ុន ហ្វឺស យូណាយ ណេតវើក អ៊ិនឌឺធេនមិន មានគម្រោងរៀបចំពិព័រណ៍វប្បធម៌កម្ពុជា នៅតាមទីក្រុង និង ខេត្តធំៗនៅប្រទេសចិន

ក្រុមហ៊ុនហ្វឺស យូណាយ ណេតវើក អ៊ិនឌឺធេនមិន មានគម្រោងរៀបចំពិព័រណ៍វប្បធម៌កម្ពុជា នៅតាមទីក្រុង និងខេត្តធំៗនៅប្រទេសចិន ដើម្បីបង្ហាញឱ្យប្រជាជនចិនបានដឹង បានស្គាល់ពីវប្បធម៌អរិយធម៌ ដ៏ល្អផូរផង់របស់ខ្មែរ ។ ការបង្ហាញគម្រោងនេះ បានធ្វើឡើងក្នុងឱកាសលោកស្រី អ៊ីន ស៊ែរ អគ្គនាយិកាក្រុម ហ៊ុន ហ្វឺស យូណាយ ណេតវើក អ៊ិនឌឺធេនមិនចូលជួបសំដែងការគួរសម និងពិភាក្សាការងារមួយ ឯកឧត្តម ខៀវ កាញារីទ្ធ រដ្ឋមន្រ្តី ក្រសួង ព័ត៌មាន នៅព្រឹកថ្ងៃទី១៥ ខែ មីនា ឆ្នាំ២០២២ នៅទីស្តីការក្រសួង។ ឆ្លៀតក្នុងឱកាសនោះ លោក ស្រី អ៊ីន ស៊ែរ បានសំដែងនូវការចូលរួមអបអរសាទរ ចំពោះ ឯកឧត្តម ខៀវ កាញារីទ្ធ ដែលទើបទទួលបាន សញ្ញាបត្របណ្ឌិតកិត្តិយស គរុកោសល្យសារព័ត៌មាន មនុស្សសាស្រ្ត និងសង្គមសាស្រ្ត ដែលប្រទានផ្ទាល់ដោយព្រះអង្គម្ចាស់ក្សត្រីយ៍ មហាចក្រី សិរិនថន នៃព្រះរាជាណាចក្រថៃ កាលព្រឹកថ្ងៃទី០៨ ខែមីនា ឆ្នាំ២០២២ នាទីក្រុងបាងកក ប្រទេសថៃ។ លោកស្រីបានជម្រាបជូនថា ក្រៅពីកិច្ចសហការជាមួយទូរទស្សន៍ជាតិកម្ពុជា ថតកម្មវិធី ធីតាសង្ក្រាន្ត ក្រុមហ៊ុន ហ្វឺស យូណាយ ណេតវើក អ៊ិនឌឺធេនមិន មានគម្រោងរៀបចំពិព័រណ៍វប្បធម៌ កម្ពុជា នៅតាមទីក្រុង និងខេត្តធំៗនៅប្រទេសចិន នាពេលខាងមុខនេះ។ តាមរយៈកិច្ចការងារនេះ ឯកឧត្តម រដ្ឋមន្រ្តី ខៀវ កាញារីទ្ធ បានផ្តល់ជាយោបល់ដល់ក្រុម ហ្វឺស យូណាយ ធ្វើកិច្ចសហការជាមួយ ក្រសួង វប្បធម៌ ក្រសួងទេសចរណ៍ ក្រសួងពាណិជ្ជកម្ម រួមទាំងស្ថានទូតកម្ពុជា ប្រចាំនៅប្រទេសចិន ទើបអាចដំណើរ ការកម្មវិធី នោះបានទៅដោយរលូន និងជោគជ័យ៕