មន្រ្ដីផ្នែកនាយកដ្ឋានគ្រប់គ្រងទឹកនៃអាជ្ញាធរជាតិអប្សរាបានលើកឡើងថា ដោយសារតែសោភណភាព និងសម្រស់ស្រស់ស្អាតនោះបានធ្វើឱ្យភ្ញៀវទេសចរជាតិនិងអន្តរជាតិ ដែលមកទស្សនាតំបន់ប្រាសាទអង្គរនាពេលបច្ចុប្បន្ននេះ សុទ្ធសឹងតែទទួលបាននូវការចាប់អារម្មណ៍អំពីទេសភាពខៀវខ្ចីនៃវាលស្មៅ និងព្រៃឈើនៅព័ទ្ធជុំវិញប្រាសាទ ដែលត្រូវបានដាំដុះនិងថែទាំដោយអាជ្ញាធរជាតិអប្សរា។
ក្នុងការចុះត្រួតពិនិត្យមើលប្រព័ន្ធស្រោចស្រពវាលស្មៅ នៅទីធ្លាមុខប្រាសាទអង្គរវត្ត កាលពីរសៀលថ្ងៃទី១៨ ខែកុម្ភៈ ឆ្នាំ២០២២ លោក ភឿន សុឃីម អនុប្រធាននាយកដ្ឋានគ្រប់គ្រងទឹកនៃអាជ្ញាធរជាតិអប្សរាបានមានប្រសាសន៍ថា ការងារដាំស្មៅ និងការស្រោចស្រព ក្រុមការងារបានធ្វើជាប្រចាំថ្ងៃនៅជុំវិញប្រាសាទអង្គរវត្ត ដើម្បីធ្វើយ៉ាងណាឱ្យទីនោះមានពណ៌បៃតងខៀវខ្ចីគ្រប់រដូវកាល។ លោកបានបញ្ជាក់ថា ការងារស្រោចស្រពវាលស្មៅត្រូវយកចិត្តទុកដាក់ជាខ្លាំង ពិសេសនៅក្នុងរដូវប្រាំងដោយត្រូវបង្កើនការស្រោចទឹកយ៉ាងហោចណាស់ចំនួនពីរដងក្នុងមួយថ្ងៃ។ លោកបានបន្ដថា សកម្មភាពដាំនិងថែទាំស្មៅមិនត្រឹមតែរៀបចំធ្វើនៅបរិវេណមុខប្រាសាទអង្គរវត្តប៉ុណ្ណោះទេ តែសកម្មភាពទាំងនេះ បានធ្វើនៅតាមប្រាសាទមួយចំនួនទៀតដូចជា ព្រះលានជល់ដំរី ប្រាសាទបាយ័ន ប្រាសាទបន្ទាយក្តី ប្រាសាទតាព្រហ្ម និងទីកន្លែងជាច្រើនទៀត ធ្វើយ៉ាងណាឱ្យរមណីយដ្ឋានអង្គរមានភាពបៃតងស្រស់ស្អាតទាំងខួបប្រាំងនិងវស្សា។
លោក ភឿន សុឃីម បានបន្ដទៀតថា ចាប់ពីឆ្នាំ២០២០មក ក្រោមការណែនាំពីថ្នាក់ដឹកនាំអាជ្ញាធរជាតិអប្សរា ក្រុមការងារបច្ចេកទេសបានរៀបចំដាំស្មៅឡើងវិញ និងរៀបចំប្រព័ន្ធស្រោចស្រពស្វ័យប្រវត្តិបែបទំនើប ដើម្បីកែលម្អនិងលើកកម្ពស់ភាពបៃតងខ្ចីនៅជុំវិញបរិវេណប្រាសាទអង្គរវត្ត។ លោកបានបន្ថែមថា ភាពខុសប្លែកទាំងនេះ ទទួលបានការចាប់អារម្មណ៍ និការកោតសសើរមិនដាច់ពីមាត់ពីសំណាក់ភ្ញៀវទេសចរគ្រប់រូប ដែលបានមកទស្សនាប្រា សាទអង្គរវត្ត៕
