ជើងឯកថ្នាក់ជាតិកីឡាបាល់បោះ ប្រចាំឆ្នាំ២០២១ សម្រួចគុណភាពលើវិញ្ញាសា ៣នាក់ទល់៣នាក់

ការប្រកួតកីឡាបាល់បោះ ជ្រើសរើសជើងឯកថ្នាក់ជាតិ ប្រចាំឆ្នាំ២០២១ កំពុងដំណើរប្រកួតជម្រុះស្វែងរកធនធានប្រកបដោយគុណភាព រយៈពេល៤ថ្ងៃ ពីថ្ងៃទី ១៨ ដល់ថ្ងៃទី២១ ខែកុម្ភៈ ឆ្នាំ២០២២ នៅទីលានវិទ្យាល័យវត្តកោះ រាជធានីភ្នំពេញ ដោយសម្រួចគុណភាពតែ លើវិញ្ញាសា ៣នាក់ទល់៣នាក់។

លោក ដូង ឌីម អគ្គលេខាធិការរង សហព័ន្ធកីឡាបាល់បោះកម្ពុជាគូសបញ្ជាក់ថា ការប្រកួតកីឡា បាល់បោះជ្រើសរើសជើងឯកថ្នាក់ជាតិ ប្រចាំឆ្នាំ២០២១នេះមានក្រុមចូលរួមសរុបចំនួន ២៤ក្រុម ក្នុងនោះ ផ្នែកបុរសមាន១៧ក្រុម និងផ្នែកនារីមាន៧ក្រុម ដោយសរុបទាំងប្រតិភូដឹកនាំមកពីក្លឹបរាជធានី ខេត្តចំនួន ១២០នាក់។ លោកបានបន្ដថា អ្វីដែលសំខាន់ក្នុងព្រឹត្តិការណ៍ប្រកួតកម្រិតខ្ពស់នេះ គឺសហព័ន្ធរៀបចំការប្រកួតទម្រង់ ៣នាក់ទល់៣នាក់ ខុសប្លែកពីរៀងរាល់ឆ្នាំ ដែលប្រកួត ៥ទល់៥នាក់។ លោកបានឱ្យដឹងទៀតថា ការរៀបចំប្រកួតទម្រង់ ៣នាក់ទល់ ៣នាក់នេះ គឺសហព័ន្ធកីឡាបាល់បោះអន្តរជាតិ (FIBA) ជំរុញ និងបំផុសឱ្យបណ្តាប្រទេសនានារៀបចំទម្រង់ ៣ទល់៣នាក់នេះ ស្របពេលដែលប្រភេទវិញ្ញាសាអំណោយផលល្អផងដែរ ក្នុងការកាត់បន្ថយហានីភ័យ ក្នុងបរិបទវិបត្តិជំងឺកូវីដ-១៩ ដោយវាត្រូវការលេងលើទីលានតូច និង១ជំហៀងតារាងប៉ុណ្ណោះ។

អគ្គលេខាធិការរងរូបនេះបន្ថែមថា នេះជាការជំហានថ្មីមួយ ដែលសហព័ន្ធកីឡាបាល់បោះកម្ពុជា កំពុងជំរុញសកម្មភាពបណ្តុះបណ្តាលធនធាន ស្របតាម FIBA ដោយ៣ទល់៣នេះ ក្នុង១ក្រុមមានតែ៤នាក់ ប៉ុណ្ណោះ ពោលគឺកីឡាករ៣នាក់ក្នុងទីលាន បម្រុងម្នាក់ និងមេដឹកនាំក្រុមម្នាក់ ដោយមិនមានគ្រូបង្វឹកទេ។ ចំពោះវិញ្ញាសា ៥ទល់៥ គឺត្រូវការទីលានធំតាមស្តង់ដារ។ សហព័ន្ធបាល់បោះបានបំផុសការលេង ៣ទល់ ៣នេះ ចាប់តាំងពីឆ្នាំ២០១៤មកម្លេះ ប៉ុន្តែមិនសូវមានសកម្មភាពផុសផុលខ្លាំងទេ ទើបតែនៅ ឆ្នាំ២០១៨ មកដល់ពេលបច្ចុប្បន្ននេះ សហព័ន្ធធ្វើការងារនេះបានខ្លាំងក្លា ដើម្បីពង្រឹងគុណភាពរបស់កីឡាករ កីឡាការិនី ដែលវិញ្ញាសានេះគឺជាទម្រង់អតិភាពនៃគោលដៅដណ្តើមមេដាយ ក្នុងការប្រកួតកីឡា ស៊ីហ្គេម លើកទី៣១ នាខែឧសភា ឆ្នាំ២០២២ នៅប្រទេសវៀតណាម ជាពិសេសស៊ីហ្គេម លើកទី៣២ ឆ្នាំ២០២៣ ជាប្រវត្តិសាស្ត្រ ដំបូងរបស់ព្រះរាជាណាចក្រកម្ពុជា។

លោក ដូង ឌីម បានសង្កត់ធ្ងន់ថា ងាកមកការប្រកួតជើងឯកថ្នាក់ជាតិ ប្រចាំឆ្នាំ២០២១ ដែលកំពុងដំណើរ ការប្រកួតនេះវិញ គឺប្រើប្រាស់កញ្ចប់ថវិកាគាំទ្ររបស់ក្រសួងអប់រំ យុវជន និងកីឡា ចំនួន ៤៥លានរៀល នៅក្នុងចំណោមថវិកាគាំទ្រសរុបចំនួន (សម្រាប់ឆ្នាំ២០២១) ១០០លានរៀល ដែលប្រើប្រាស់ សម្រាប់៣ មុខសញ្ញាសំខាន់ៗ ដូចជាផ្នែករដ្ឋបាល ២០ភាគរយ ផ្នែកបណ្តុះបណ្តាល ៣៥ភាគរយ និងការប្រកួតជើងឯកថ្នាក់ជាតិ ៤៥ភាគរយ៕