រាជធានីភ្នំពេញ ៖ ឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានឱ្យដឹងថា ក្រសួងបានចែកចាយ គ្រឿងចក្រទំនើបៗជាង២០០គ្រឿង ទៅតាមមន្ទីរខេត្តក្រុងទាំង ២៥ ក្នុងការសាងសង់និងជួសជុលហេដ្ឋារចនាសម្ព័ន្ធនៅកម្ពុជា ឱ្យមានភាពរឹងមាំ ជាប់បានយូរតាមពេលវេលាដែលបានកំណត់ ។
ក្នុងពិធីបើកសន្និបាតបូក សរុបសមិទ្ធផលការងារសាធារណការ និងដឹកជញ្ជូន ឆ្នាំ ២០២១ និងលើកទិសដៅការងារឆ្នាំ២០២២ នៅព្រឹកទី២៧ ខែមករា ឆ្នាំ២០២២ នាទីស្តីការក្រសួង ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានមានប្រសា សន៍ ពីការខិតខំប្រឹងប្រែង រួម គ្នាយ៉ាងសកម្មរបស់ថ្នាក់ដឹក នាំ និងមន្ដ្រីរាជការក្រសួងក្នុងការអនុវត្តនូវការស្តារ និងកសាងហេដ្ឋារចនាសម្ព័ន្ធដឹកជញ្ជូនដូចជា ផ្លូវថ្នល់ ផ្លូវដែក ផ្លូវទឹក និងកំពង់ផែ និងក្នុងការលើកកម្ពស់ការផ្តល់សេវាសាធារណៈគ្រប់ផ្នែកនៅគ្រប់ថ្នាក់ជូនប្រជា ពលរដ្ឋនិងគ្រប់មជ្ឈដ្ឋាន សំដៅរួមចំណែក ជំរុញកំណើន សេដ្ឋកិច្ចនិងអភិវឌ្ឍន៍សង្គម តភ្ជាប់ផ្ទៃក្នុងប្រទេសនិងសមាហរណកម្មតំបន់ ព្រមទាំងផ្តល់នូវសេវាសាធារណៈទៅកៀកប្រជា ពលរដ្ឋប្រកបដោយភាពប្រសើរឡើងទាំងគុណភាព ប្រសិទ្ធភាព និងវិសាលភាព និងទទួលបានការជឿទុកចិត្ត ស្របតាមការកំណត់របស់ប្រមុខរាជរដ្ឋាភិបាល។
ឯកឧត្តមទេសរដ្ឋមន្ត្រី បានបន្តថា ចំពោះកិច្ចខិតខំប្រឹង ប្រែងក្នុងការស្តារ និងកសាងហេដ្ឋារចនាសម្ព័ន្ធដឹកជញ្ជូន នេះ ក្រសួងបានបញ្ជាទិញ គ្រឿងចក្រទំនើបៗជាច្រើនគ្រឿងផងដែរ ដែលមានដូច ជា រថយន្តដើម្បីត្រួតពិនិត្យស្ពាន ម៉ាស៊ីនមើលនិងសម្អាតលូ ម៉ាស៊ីនកាំរស្មីមើលស្រទាប់កៅស៊ូម៉ាស៊ីន FWDនិងLWD ជាដើម ក្នុងការជួសជុលនិងកសាងហេដ្ឋារចនាសម្ព័ន្ធឱ្យមានគុណភាព។
« ចំពោះការងារទាក់ ទងនឹងសម្ភារឆ្នាំ២០២១ ជាឆ្នាំប្រវត្តិសាស្រ្តដែលក្រសួង សាធារណការនិងដឹកជញ្ជូន មានគ្រឿងចក្រសម្ភាររាប់រយគ្រឿង គឺជាង២២០គ្រឿងដែលយើងបានទិញមកចែក ចាយ ជូនដល់មន្ទីរសាធារណ ការនិងដឹកជញ្ជូន ទាំង២៥ ខេត្តក្រុង នេះជាប្រវត្តិសាស្រ្តដែលយើងមិនដែលមាន ។យើងចេះតែឱ្យមន្ទីរធ្វើការ ប៉ុន្តែមន្ទីរគ្មានគ្រឿងសម្ភារនោះទេ មានតែជួលនិងខិតខំប្រឹងប្រែងទិញខ្លួនឯង។ ប៉ុន្តែក្នុងប្រវត្តិសាស្រ្តក្រសួង សាធារណការនិងដឹកជញ្ជូនបានចែកចាយសម្ភារនេះ ជូនទៅមន្ទីរសាធារណការនិងដឹក ជញ្ជូន ខេត្តក្រុងទាំង២៥ » ។
សូមជម្រាបជូនថា គិតមក ទល់បច្ចុប្បន្ន បណ្តាញផ្លូវជាតិ និងផ្លូវជនបទរបស់កម្ពុជា បានស្ថាបនាដោយចាក់កៅស៊ូ និងបេតុងរួច ប្រមាណជាង ១៥ ០០០គីឡូម៉ែត្រ ហើយបាន និងកំពុងលើកកម្រិតគុណភាពពីកៅស៊ូពីរស្រទាប់ (DBST) ទៅបេតុងកៅស៊ូ (AC) និងពង្រីកពី២គន្លង ទៅ៤គន្លង នៅតាមខ្សែផ្លូវអាទិភាពមួយចំនួន ៕
