ឯកឧត្តម គង់ សោភ័ណ្ឌ អភិបាលខេត្តកណ្តាល អមដំណើរដោយមន្រ្តីរាជការ បាននាំយកទេយ្យវត្ថុ និងបច្ច័យ ប្រគេន ព្រះចៅអធិការវត្ដព្រះឥន្ទសាមគ្គីធម៌ នៅស្រុកអង្គស្នួល ខេត្តកណ្តាល

ខេត្ត​កណ្ដាល​ ៖ ដើម្បីចូលរួមគាំទ្រគោរពអនុវត្តវិធានការរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការប្រយុទ្ធប្រឆាំងការឆ្លងរីករាលដាល នៃជំងឺកូវីដ-១៩ តាមរយៈសេចក្តីសម្រេចលេខ ៩៥ សសរ ចុះថ្ងៃទី២៣ ខែកញ្ញា ឆ្នាំ២០២១ របស់រាជរដ្ឋាភិបាលកម្ពុជា ស្តីពីការផ្អាកការរៀបចំពិធីបុណ្យកាន់បិណ្ឌ និងភ្ជុំបិណ្ឌ ដើម្បីទប់ស្កាត់ការរីករាលដាល នៃជំងឺកូវីដ-១៩ នាព្រឹកថ្ងៃទី២៩ ខែកញ្ញា ឆ្នាំ២០២១ នេះ ឯកឧត្តម គង់ សោភ័ណ្ឌ អភិបាល នៃគណៈអភិបាលខេត្តកណ្តាល អមដំណើរដោយ ឯកឧត្តម តាំង ម៉េងលាន ឯកឧត្តម ណុប តារា អភិបាលរងខេត្ត និងមន្រ្តីរាជការពាក់ព័ន្ធមួយចំនួន បាននាំយកទេយ្យវត្ថុ និងបច្ច័យ ប្រគេន សម្ដេចព្រះមង្គលទេព្វាចារ្យ​ វង្ស​ អានេតា​ សម្ដេចព្រះសង្ឃនាយករង​ នៃគណៈធម្មយុត្ដិកនិកាយ​នៃព្រះរាជាណាចក្រកម្ពុជា​ព្រះមេគណ​គណៈធម្មយុត្តកនិកាយ​ខេត្ត​កណ្ដាល​ និងជា​ព្រះចៅអធិការ​វត្ដព្រះឥន្ទសាមគ្គីធម៌​ សម្រាប់ឧបត្ថម្ភ​ចង្ហាន់​ព្រះសង្ឃ​ និង​សិស្សានុសិស្ស​គង់​ស្នាក់នៅ​អាស្រ័យ​សិក្សា​រៀនសូត្រ​ក្នុង​វត្ដព្រះឥន្ទសាមគ្គីធម៌​ ស្ថិតនៅភូមិត្រពាំងក្រពើ ឃុំក្រាំងម្កាក់ ស្រុកអង្គស្នួល ខេត្តកណ្តាល ដោយគោរពអនុវត្តយ៉ាងម៉ឺងម៉ាត់បំផុតតាមវិធានសុខាភិបាល ជាពិសេសវិធានការ ៣.ការពារ ៣.កុំ ក្នុងការបង្ការទប់ស្កាត់ការឆ្លងរាលដាលជំងឺកូវីដ-១៩ បានយ៉ាងខ្ជាប់ខ្ជួន។

សូមជម្រាបជូនថាកន្លងទៅនេះ អាជ្ញាធរក្រុង ស្រុកបាន សម្របសម្រួល ក្នុងការនាំយកចង្ហាន់ និងទេយ្យវត្ថុចាំបាច់នានា ដើម្បីប្រគេនដល់ព្រះសង្ឃនៅតាមបណ្តាវត្តអារាម នៅទូទាំងខេត្តកណ្តាល ផងដែរ។

ក្នុងឱកាសនេះដែរ ឯកឧត្តមអភិបាលខេត្ត បានអំពាវនាវដល់ ពុកម៉ែ បងប្អូនពុទ្ធបរិស័ទទាំងអស់ ដែលខកខានមិនបានចូលរួមប្រារព្ធពិធីបុណ្យកាន់បិណ្ឌ និងភ្ជុំបិណ្ឌ បានពេញលេញតាមទំនៀមទំលាប់ប្រពៃណីនាឆ្នាំនេះ សូមមេត្តាយោគយល់ អធ្យាស្រ័យ និងចូលរួមធ្វើបុណ្យតាមបែបគន្លងថ្មី ដើម្បីជៀសផុតពីការរាតត្បាតពីជំងឺកូវីដ-១៩។ ដ៏រាបណាយើងនៅមានជីវិតរស់នៅ ដោយមិនមានការយាយីពីជំងឺកូវីដ-១៩ យើងនឹងមានឱកាសអាចធ្វើបុណ្យ ជួបជុំក្រុមគ្រួសារបានជាច្រើនឆ្នាំទៀត។

ទន្ទឹមនឹងនេះ ឯកឧត្តម គង់សោភ័ណ្ឌ ជំនួសមុខឲ្យប្រជាពលរដ្ឋទូទាំងខេត្តកណ្តាល សូមគោរពថ្លែងអំណរគុណយ៉ាងជ្រាលជ្រៅបំផុតចំពោះ ប្រមុខរាជរដ្ឋាភិបាល ជាពិសេស សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានដាក់ចេញនូវវិធានការទាន់ពេលវេលាក្នុងការទប់ស្កាត់ ការឆ្លងរាលដាលទ្រង់ទ្រាយធំទូទាំងប្រទេស នៃជំងឺកូវីដ-១៩ ជាពិសេសមេរោគបំប្លែងខ្លួនថ្មីប្រភេទដែលតា(Delta) ដែលមានកម្រិតនៃការឆ្លងរាលដាលឆាប់រហ័ស ដើម្បីធានាការពារអាយុជីវិត និងសុខភាពរបស់ប្រជាពលរដ្ឋ ខណៈដែលព្រះរាជាណាចក្រកម្ពុជា កំពុងបើកដំណើរការសាលារៀនឡើងវិញ ក៏ដូចជាកំពុងរៀបចំផែនការដើម្បីឈានឆ្ពោះទៅបើកដំណើរការប្រទេសពេញលេញឡើងវិញ នាពេលខាងមុខ។