សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាបានសម្រេចឱ្យចាក់វ៉ាក់សាំងសម្រាប់កុមារនិងយុវវ័យដែល មានអាយុចន្លោះពី១២ ដល់ ១៧ឆ្នាំ ចំនួន១លាន៩សែននាក់ ខណៈដែលតម្រូវការវ៉ាក់សាំងប្រមាណជា៤លានដូស សម្រាប់ចាក់ជូនដល់កុមារនិងយុវវ័យ ។
ថ្លែងសារពិសេសជូនជនរួមជាតិ ពាក់ព័ន្ធការសម្រេចឱ្យចាក់វ៉ាក់សាំងកូវីដ១៩ជូនកុមារ និងយុវវ័យ ដែលមានអាយុចាប់ពី១២ ដល់ ១៧ឆ្នាំ នាពេលឆាប់ៗខាងមុខ សម្តេចតេជោ បានមានប្រសាសន៍ថា កម្ពុជាមានតម្រូវការនៃការចាក់វ៉ាក់សាំងសម្រាប់កុមារនិងយុវវ័យ ចាប់ពីអាយុ១២ឆ្នាំដល់១៧ឆ្នាំ ដែលតាមស្ថិតិឯកឧត្តម អូន ព័ន្ធមុនីរ័ត្ន មានប្រមាណជា១.៩ លាននាក់ គឺជុំវិញ២លាននាក់ ដែលយើងត្រូវការវ៉ាក់សាំងចំនួន៤លានដូស សម្រាប់ការចាក់ជូនកុមារនិងយុវវ័យរបស់យើង ។
សម្តេចតេជោបន្តទៀតថា ក្នុងស្ថានភាពបែបនេះសម្តេចបានបញ្ជាឱ្យរៀបចំរកវ៉ាក់សាំងដែលមកដល់ពេលនេះ វ៉ាក់សាំងដែលយើងអាចនឹងប្រាកដប្រជាទទួលបានចំនួន២២លានដូស ប៉ុន្តែបើគិតតាមជំនួយផងនោះ គឺមានប្រមាណជាង៣១លានដូស តែទោះបីយ៉ាងណា ក៏ដោយការសន្យា ដែលមិនទាន់បានឃើញជារូបរាងយើងមិនអាចចាត់ទុកថា ជារបស់ដែលយើងមាននៅក្នុងដៃនោះទេ ។ ដូច្នេះហើយ សម្តេចបានបញ្ជា ទៅឯកឧត្តម វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល គឺខិតខំរក្សាទុកនូវវ៉ាក់សាំងដែលអាចចាក់ព្រមគ្នាជាមួយនឹងពេលវេលានៃការចាក់ សម្រាប់ប្រជាពលរដ្ឋរបស់យើង ដែលកំពុងតែដំណើរការ នៅត្រង់ថា ការចាក់របស់យើងកំពុងតែបន្តទៅលើមនុស្ស ប្រមាណជាង៤លាននាក់ទៀត ដើម្បីឱ្យគ្រប់១០លាននាក់ ។
« ប៉ុន្តែក៏មានជម្រើសមួយទៀតយើងអាចបើកការចាក់វ៉ាក់សាំង សម្រាប់កុមារនិងយុវវ័យរបស់យើង ក្នុងពេលដែលដំណាលគ្នា គឺចាប់ផ្តើមពីទីក្រុងភ្នំពេញនិងខេត្តកណ្តាល ដូចដែលយើងធ្វើកន្លងទៅនេះចំណុចនេះគឺជាចំណុចងាយស្រួល សម្រាប់យើងនៅក្នុងកិច្ចដំណើរការនៃការចាក់វ៉ាក់សាំង។ យើងអាចមានជម្រើស២ ជម្រើសទី១គឺការចាក់វ៉ាក់សាំងឱ្យរួចរាល់សម្រាប់មនុស្សពេញវ័យពីអាយុ១៨ឆ្នាំឡើងចំនួន១០លាននាក់ រួចហើយទើបចាប់ផ្តើម អនុវត្តន៍ការចាក់វ៉ាក់សាំងសម្រាប់កុមារនិងយុវវ័យជាបន្ត នេះជាជម្រើស ទី១ គឺធ្វើរឿងមួយឱ្យចប់ហើយទើបបន្តរឿងមួយទៀត ។ ប៉ុន្តែជម្រើសទី២ នៅក្នុងពេលដែលបន្តការចាក់នៅតាមបណ្តាខេត្តសម្រាប់មនុសប្រមាណ៤លាននាក់បន្តទៀតនោះ យើងក៏អាចចាប់ផ្តើម នូវដំណើរការចាក់វ៉ាក់សាំងដោយចាប់ផ្តើមចេញពីទីក្រុងភ្នំពេញ និងខេត្តកណ្តាលជាពិសេស គឺយើងធ្វើសកម្មភាពដូចកន្លងទៅ រួមមានភ្នំពេញ កណ្តាល ខេត្តព្រះសីហនុ ដែលយើងធ្វើតាមទម្រង់ដែលយើងធ្លាប់ធ្វើកន្លងទៅនេះ »៕
