សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃប្រទេសកម្ពុជា បានគាំទ្រការរៀបចំកិច្ចប្រជុំកំពូលរបស់អង្គការ សហព័ន្ធសន្តិភាពសកលដែលផ្តោតយកប្រធានបទសំខាន់ពាក់ព័ន្ធនឹងសន្តិភាពនៅក្នុងតំបន់អាស៊ីប៉ាស៊ីហ្វិក

រាជធានីភ្នំពេញ ៖  នាព្រឹកថ្ងៃទី០៨ ខែកក្កដា ឆ្នាំ២០២១នេះ ប្រមុខរាជរដ្ឋាភិបាកម្ពុជា សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានគាំទ្រការរៀបចំកិច្ចប្រជុំកំពូលរបស់អង្គការ សហព័ន្ធសន្តិភាពសកលដែលផ្តោតយកប្រធានបទសំខាន់ពាក់ព័ន្ធនឹងសន្តិភាពនៅក្នុងតំបន់អាស៊ីប៉ាស៊ីហ្វិក ដោយសម្តេចតេជោបានមានប្រសាសន៍ថា សន្តិភាព គឺជាប្រធានបទដ៏សំខាន់សម្រាប់ប្រទេសនៅក្នុងតំបន់អាស៊ីប៉ាស៊ីហ្វិក ក៏ដូចជាពិភពលោកដែរ។

ឯកឧត្ដម កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី បានឱ្យដឹងដូច្នេះ បន្ទាប់ពីសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងកិច្ចប្រជុំជាមួយនឹង អង្គការសហព័ន្ធសន្តិភាពសកល(UPF) ដែលដឹកនាំដោយឯកឧត្ដមបណ្ឌិត Yun Young-ho តាមប្រព័ន្ធវីដេអូនៅភូមិគ្រឹះក្រុងតាខ្មៅ ខេត្តកណ្តាល ។ នៅក្នុងកិច្ចប្រជុំតាមប្រព័ន្ធវីដេអូនេះដែរ សម្តេចតេជោក៏បានទទួល យកការអញ្ជើញរបស់អង្គការសហព័ន្ធសន្តិភាពសកល(UPF) ធ្វើជាសហប្រធានកិត្តិយសម្រាប់កិច្ចប្រជុំកំពូលសន្តិភាពសកលនៅ ឆ្នាំ២០២១ និងជាបេក្ខភាពពានរង្វាន់សន្តិភាពស៊ុនហាក់។ ឯកឧត្ដម រដ្ឋមន្ត្រីប្រតិភូអមនាយករដ្ឋមន្ត្រីបានឱ្យដឹងទៀថា នៅក្នុងកិច្ចពិគ្រោះយោបល់នោះភាគីទាំងពីរបានលើកឡើងរួមមាន ទី១ៈ ពាក់ព័ន្ធការរៀបចំកិច្ចប្រជុំកំពូលសន្តិភាពនៅខែវិច្ឆិកា ឆ្នាំ២០២១ នៅសាធារណរដ្ឋកូរ៉េ ដោយផ្តោតយកប្រធានបទសំខាន់ពាក់ព័ន្ធនិងសន្តិភាពនៅក្នុងតំបន់អាស៊ីប៉ាស៊ីហ្វិក។ ទី២ៈ គឺការអញ្ជើញសម្ដេចតេជោនាយករដ្ឋមន្ត្រីធ្វើជាសហប្រធានកិត្តិយសនៃកិច្ចប្រជុំកំពូលនេះ និងទី៣ៈ ពាក់ព័ន្ធនឹងការស្នើសុំសម្តេចតេជោធ្វើជាបេក្ខភាពពានរង្វាន់សន្តិភាពស៊ុនហាក់ និងបញ្ហាផ្សេងៗទៀតពាក់ព័ន្ធទៅនឹងយន្តការឆ្នាំ២០២២ សម្រាប់ការស្រាវជ្រាវ។ ឯកឧត្ដមបណ្ឌិត Yun Young-ho បានស្នើសុំអញ្ជើញសម្តេចតេជោ ហ៊ុន សែន ធ្វើជាសហប្រធានកិត្តិយសសម្រាប់កិច្ចប្រជុំកំពូលនោះ ដោយសារសម្តេចមានបទពិសោធន៍និងបានចូលរួមយ៉ាងច្រើនក្នុងការគាំទ្រសន្តិភាពនៅក្នុងតំបន់និងពិភពលោក និងស្នើសុំសម្តេចតេជោជាបេក្ខភាពពានរង្វាន់សន្តិភាពស៊ុនហាក់។

សម្ដេចតេជោនាយករដ្ឋមន្ត្រីក៏បានមានប្រសាសន៍ គាំទ្រទៅលើផែនការសកម្មភាពនេះ ហើយបានផ្ដល់ជាយោបល់មួយចំនួនពាក់ព័ន្ធនឹងការរៀបចំកិច្ចប្រជុំនេះ។ សម្ដេចតេជោទទួលយក ការស្នើឱ្យសម្តេចធ្វើជាសហប្រធានកិត្តិយស ហើយក៏បានជម្រាប ជូនភ្ញៀវថាសន្តិភាព គឺជាប្រធានបទដ៏សំខាន់សម្រាប់ប្រទេសនៅក្នុងតំបន់អាស៊ីប៉ាស៊ីហ្វិក ក៏ដូចជាពិភពលោកដែរ។ ជាមួយនេះសម្ដេចតេជោក៏បានទទួលយកជាបេក្ខភាពពានរង្វាន់សន្តិភាពស៊ុនហាក់។ សម្ដេចតេជោ ហ៊ុន សែន ក៏បានចាត់តាំងលោកជំទាវ ឃួន សូដារី និង ឯកឧត្តម សួស យ៉ារ៉ា ធ្វើការងារជាមួយនឹងអង្គការសហព័ន្ធសន្តិភាពសាកល (UPF) បន្តទៀត។ សម្ដេចតេជោក៏បានលើកជាយោបល់ថា សហព័ន្ធសន្តិភាពសាកល(UPF)អាចចូលរួមក្នុងសកម្មភាពជាមួយនឹងគណៈកម្មការទន្លេមេគង្គ ដែលជាប្រភពមួយដ៏សំខាន់ទាក់ទងនឹងបញ្ហាស្បៀង ដូច្នេះយើងអាចសហការគ្នាដោយសារកន្លងមកយើងមានយន្តការកិច្ចសហប្រតិបត្តិការរវាងរដ្ឋាភិបាលនិងរដ្ឋាភិបាលក្នុងក្របខ័ណ្ឌមេគង្គ-កូរ៉េ។

គួរបញ្ជាក់ដែរថា ពានរង្វាន់សន្តិភាពស៊ុនហាក់ ត្រូវបានបង្កើតឡើងដោយលោកស្រីបណ្ឌិត Hak Ja Han Moon ភរិយារបស់លោក Sun Myung Moon ដើម្បីបន្តមរតកនៃការលះបង់អស់មួយជីវិតរបស់ស្វាមីលោកជំទាវចំពោះសន្តិភាព។ ពាន់រង្វាន់នេះផ្តល់ជូនរៀងរាល់២ឆ្នាំម្តង ដល់បុគ្គលដែលមានស្នាដៃលេចធ្លោលើផ្នែកអភិវឌ្ឍន៍មនុស្សប្រកបដោយចីរភាព ដោះស្រាយជម្លោះ និងការអភិរក្សអេកូឡូស៊ី ហើយមានតម្លៃទឹកប្រាក់១លានដុល្លារ៕