ខេត្តកំពង់ចាម ៖ នាព្រឹកថ្ងៃទី១៨ ខែមិថុនា ឆ្នាំ២០២០១ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម និងលោកជំទាវ ឯកឧត្តម ខ្លូត ផន ប្រធានក្រុមប្រឹក្សាខេត្ត អមដំណើរដោយឯកឧត្តម លោកជំទាវអភិបាលរងខេត្ត លោក លោកស្រីប្រធានមន្ទីរ អង្គភាពជុំវិញខេត្ត អាជ្ញាធរមូលដ្ឋាន និងមន្ត្រីរាជការមន្ទីរ-អង្គភាពជុំវិញខេត្ត បានអញ្ជើញនាំយកចង្ហាន់ ទេយ្យទាន និងបច្ច័យ វេរប្រគេនព្រះសង្ឃគង់នៅវត្តភ្នំជ័យគិរី (ហៅភ្នំហាន់ជ័យ) ក្នុងឃុំហាន់ជ័យ ស្រុកកំពង់សៀម ដើម្បីឧទ្ទិសព្រះរាជកុសលថ្វាយ សម្តេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ក្នុងឱកាសព្រះរាជពិធីបុណ្យចម្រើនព្រះជន្ម ៨៥ យាងចូល ៨៦ព្រះវស្សាដែលនឹងប្រព្រឹត្តទៅ នាថ្ងៃទី ១៨ ខែមិថុនា ឆ្នាំ២០២១ នេះ ។
ក្នុងនាមមន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋក្នុងខេត្តកំពង់ចាម ឯកឧត្តម អ៊ុន ចាន់ដា អភិបាលនៃគណៈអភិបាលខេត្ត បានអានសារថ្វាយព្រះសព្ទសាធុការពរជ័យ បវរសួស្តី សិរីវឌ្ឍនមង្គល គ្រប់ប្រការ ថ្វាយសម្តេចព្រះមហាក្សត្រី នរោត្តម មុនិនាថសីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ជាទីគោរពសក្ការៈដ៏ខ្ពង់ខ្ពស់បំផុត សូមព្រះអង្គមានព្រះរាជសុខភាពល្អបរិបូរណ៍ ព្រះបញ្ញាញាណភ្លឺថ្លា ព្រះកាយពលមាំមួន និងព្រះជន្មាយុយឺនយូរជាងរយព្រះវស្សា ដើម្បីគង់ប្រថាប់ជាម្លប់ដ៏ត្រជាក់ត្រជុំដល់ប្រជានុរាស្រ្ត ជាកូន ចៅ ចៅទួត របស់ព្រះអង្គ ជារៀងដរាបតទៅ ។
បន្ទាប់ពីព្រះសីលសំវរ ប៊ត តាំងឆេង ព្រះមេគណខេត្ត និងព្រះសង្ឃ ៧អង្គ បានសូត្រពុទ្ធជ័យមង្គល ចម្រើនព្រះបរិត្តទៅតាមទំនៀមទំលាប់ប្រពៃណីយសាសនា រួចមកឯកឧត្តម អ៊ុន ចាន់ដា និងឯកឧត្តម ប្រធានក្រុមប្រឹក្សាខេត្ត ព្រមទាំងថ្នាក់ដឹកនាំ មន្ត្រីរាជការ បានអញ្ជើញវេរភត្តហារ ប្រគេនព្រះសង្ឃចំនួន ៧អង្គ ដោយក្នុងមួយអង្គ៖ ចង្ហាន់, ផ្លែឈើ, សាដក និងបច្ច័យចំនួន ៥ម៉ឺនរៀល ព្រះចៅអធិការវត្ត បច្ច័យ ២០ម៉ឺនរៀល។ ជាមួយគ្នានេះ ឯកឧត្តមអភិបាលខេត្ត បានប្រគេនទៀនវស្សា ១គូ, អង្ករ ២៥០ គក្រ ,មី ១០កេស ,ត្រីខ ១២០កំប៉ុង , ទឹកក្រូច ១០កេស, ទឹកសុទ្ធ ១០ កេស និងបច្ច័យចំនួន ១,៦០០,០០០ រៀល និងបានរៀបចំចង្ហាន់ប្រគេនព្រះសង្ឃ ចំនួន ១០០ អង្គ គង់នៅវត្តភ្នំហាន់ជ័យ។ ឧបត្ថម្ភ យុវជនកាកបាទក្រហមកម្ពុជា ១១នាក់ និងចាស់ព្រឹទ្ធាចារ្យ ចំនួន ៥០នាក់ ក្នុងម្នាក់ៗ ថវិកា ២០,០០០រៀល៕
