រាជធានីភ្នំពេញ ៖ មន្រ្តីជាន់ខ្ពស់នៃក្រសួងសុខាភិបាល បន្តអំពាវនាវឱ្យប្រជាពលរដ្ឋរស់នៅខណ្ឌបឹងកេងកង និងខណ្ឌសែនសុខ កុំទាន់មកចាក់វ៉ាក់សាំងបើមិនទាន់ដល់វេន ឬការអញ្ជើញពីអាជ្ញាធរភូមិសង្កាត់ ដើម្បីការពារកុំឱ្យមានការកកស្ទះនៅកន្លែងចាក់វ៉ាក់សំាង និងទប់ស្កាត់ការចម្លងជំងឺកូវីដ១៩ ផងដែរ។
លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងជំងឺកូវីដ-១៩ ក្របខណ្ឌទូទាំងប្រទេស ហៅកាត់ថា គ.វ.ក-១៩ បានមានប្រសាសន៍ថា ប្រជាពលរដ្ឋដែលរស់នៅខណ្ឌបឹងកេងកង ដែលតាមស្ថិតិមានចំនួនជាង ០៨ម៉ឺននាក់ និងនៅខណ្ឌសែនសុខ មានចំនួនប្រមាណជិត ១៦ម៉ឺននាក់ សរុបទៅមានចំនួនប្រមាណ ២៤ម៉ឺននាក់ ដែលត្រូវចាក់វ៉ាក់សំាងនាពេលនេះ ដោយប្រើប្រាស់វ៉ាក់សាំងដែលបានមកដល់ចំនួនកន្លះលានដូស កាលពីពេលកន្លងមកដែលមានលក្ខណៈគ្រប់គ្រាន់។
លោកជំទាវវេជ្ជបណ្ឌិត ឱ វណ្ណឌីន ក៏បានអំពាវនាវដល់ប្រជាពលរដ្ឋទាំងអស់ សូមកុំឱ្យមានការព្រួយបារម្ភ ជាពិសេសអ្នកដែលនៅខណ្ឌទាំង២នេះ សូមអញ្ជើញមកចាក់វ៉ាក់សាំងតាមវេនរបស់ខ្លួន ដើម្បីធ្វើយ៉ាងណាចូលរួមចំណែកកុំឱ្យមានការកកស្ទះ ដែលនេះគឺជាចំណុចធំណាស់ ។
សូមរំលឹកហើយរំលឹកទៀតថា បងប្អូនមានបំណងមកចាក់វ៉ាក់សាំង ក៏ប៉ុន្តែសូមឱ្យការដែលមកចាក់វ៉ាក់សាំងមានសុវត្ថិភាពល្អ ចៀសវាងការមកបង្កការកកស្ទះច្រើន ដែលនាំឱ្យមានលទ្ធភាពនៃការឆ្លងជំងឺកូវីដ១៩។
លោកជំទាវវេជ្ជបណ្ឌិត ឱ វណ្ណឌីន បញ្ជាក់ថា អ្វីដែលធ្លាប់បានជំរាបជូនហើយ យើងត្រូវតែប្រុងប្រយ័ត្ន កុំឱ្យមកទទួលយកវីរុសកូវីដ១៩ មុនទទួលបាននូវវ៉ាក់សាំងកូវីដ១៩ ដែលជារឿងចាំបាច់ ដូច្នេះត្រូវតែរួមគ្នា អនុវត្តនូវវិធានការការពារ ៣ការពារនិង៣កុំ ដែលបានដាក់ចេញដោយសម្តេចតេជោនាយករដ្ឋមន្រ្តី ។
« សំខាន់ទៀតត្រូវអនុវត្តតាមការណែនាំរបស់អាជ្ញាធរមូលដ្ឋាន បើគាត់ជម្រាបជូនថា វេនយើងម៉ោងប៉ុន្មានយើងត្រូវទៅម៉ោងនោះ បើមិនមែនជាវេនរបស់យើងទេ យើងកុំអញ្ជើញមក ត្រូវរង់ចាំវេន ហើយអ្នកខ្លះគាត់អន្ទះសាដែលគាត់ឮថាបានចាក់វ៉ាក់សាំងគាត់សប្បាយអរ សូមបងប្អូនធ្វើការទំនាក់ទំនងជាមួយអាជ្ញាធរមូលដ្ឋាន ព្រោះអាជ្ញាធរមូលដ្ឋាន គាត់គឺជាអ្នកទទួលបន្ទុកនៅក្នុងការសម្របសម្រួលជាមួយបងប្អូនប្រជាពលរដ្ឋ ឱ្យអញ្ជើញមកចាក់វ៉ាក់សាំងដែលមានការ ចែកលេខត្រឹមត្រូវ » ។
យោងតាមបទបញ្ជារបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កាលពីព្រឹកថ្ងៃទី០៥ ខែឧសភា កន្លងទៅនេះក៏បានដាក់បទបញ្ជាទៅអង្គភាពកងទ័ព និងក្រុមការងារចាក់វ៉ាក់សាំង ត្រូវចាក់វ៉ាក់សាំងជូនពលរដ្ឋរស់នៅតំបន់ក្រហមឱ្យបាន ៥២ម៉ឺននាក់ ឬលើសពីនេះ ដើម្បីឈានទៅទប់ស្កាត់ការរីករាលដាលជំងឺកូវីដ១៩ ឱ្យមានប្រសិទ្ធភាពធានាបានសុវត្ថិភាពសុខភាពរបស់ប្រជាពលរដ្ឋ៕
