ខេត្តកណ្តាល៖ ព្រឹកថ្ងៃទី២៥ ខែកុម្ភៈ ឆ្នាំ២០២៥ ឯកឧត្តម គួច ចំរើន អភិបាល នៃគណៈអភិបាលខេត្តកណ្ដាល អញ្ជើញដឹកនាំកិច្ចប្រជុំស្ដីពីការពិនិត្យ និងផ្តល់យោបល់ លើសេចក្តីព្រាង ផែនការអភិវឌ្ឍន៍៥ឆ្នាំ (២០២៥-២០២៩) របស់គណៈកម្មាធិការសម្របសម្រួលបច្ចេកទេស របស់ក្រុមប្រឹក្សាខេត្ត និងគណៈអភិបាលខេត្ត ដែលកិច្ចប្រជុំនេះដែរមានការអញ្ជើញចូលពី ឯកឧត្ដម លោកជំទាវ សមាជិកក្រុមប្រឹក្សាខេត្ត អភិបាលរងខេត្ត កងកម្លាំងទាំងបី អភិបាលក្រុង-ស្រុកទាំង១៣ និងមន្ទីរជំនាញជុំវិញខេត្ត។
មានប្រសាសន៍ក្នុងកិច្ចប្រជុំ ឯកឧត្ដម គួច ចំរើន អភិបាល នៃគណៈអភិបាលខេត្តកណ្ដាល បានលើកឡើងថា៖ ផែនការអភិវឌ្ឍន៍៥ឆ្នាំ (២០២៥-២០២៩) គឺជាឯកសារគោល ដ៏មានសារសំខាន់ សម្រាប់ការអភិវឌ្ឍខេត្តកណ្តាលរបស់យើង ដើម្បីរួមចំណែកឈានទៅសម្រេចបានគោលនយោបាយយុទ្ធសាស្ត្រ បញ្ចកោណ ដំណាក់កាលទី១ របស់រាជរដ្ឋាភិបាល។
ក្នុងកិច្ចប្រជុំនេះដែរ ឯកឧត្តមអភិបាលខេត្តកណ្ដាល បានណែនាំដល់ មន្ទីរ អង្គភាពជុំវិញខេត្ត អភិបាលក្រុង-ស្រុកទាំង១៣ ត្រូវលើកយកគម្រោងផែនការអាទិភាពរបស់ខ្លួន សម្រាប់ការអនុវត្តក្នុងរយៈពេល ៥ឆ្នាំខាងមុខ ដើម្បីដាក់ចូលក្នុងផែនការអភិវឌ្ឍន៍៥ឆ្នាំ (២០២៥-២០២៩) របស់គណៈគម្មាធិការសម្របសម្រួលបច្ចេកទេស របស់ក្រុមប្រឹក្សាខេត្ត និងគណៈអភិបាលខេត្តកណ្ដាល អោយស្របតាមចក្ខុវិស័យ ដែលខេត្តកណ្តាលប្រែក្លាយជា “ខ្សែក្រវាត់គាំទ្រវិស័យសន្តិសុខ សណ្តាប់ធ្នាប់សាធារណៈ ឧស្សាហកម្ម ឡូជីស្លឹក(ភស្តុភារ) ស្បៀង និងលំនៅឋាន”។
សូមបញ្ជាក់ផងដែរថា៖ សម្រាប់គម្រោងវិនិយោគប្រើប្រាស់ថវិកាគុណប្រយោជន៍ខេត្តកណ្ដាល ឆ្នាំ២០២៥ មាន ៣២គម្រោង ក្នុងនោះ ផ្នែកសេដ្ឋកិច្ច ១៤គម្រោង ,ផ្នែកសង្គមកិច្ច ០៧គម្រោង ,ផ្នែកធនធានធម្មជាតិ បរិស្ថាន និងការបន្សំនឹងការប្រែប្រួលអាកាសធាតុ ១០គម្រោង និងផ្នែករដ្ឋបាល និងសន្តិសុខសណ្តាប់ធ្នាប់សាធារណៈ ០១គម្រោង។
