ទ្រព្យសកម្មរបស់ធនាគារ ជីប ម៉ុង បានកើនឡើងយ៉ាងឆាប់រហ័សរហូតដល់ ១ពាន់លានដុល្លារអាមេរិកគិតត្រឹមខែមេសា ឆ្នាំ២០២២ នេះបើតាមការឱ្យដឹងពីលោក ចន ប៊ែល អគ្គនាយកធនាគារ ជីប ម៉ុង។ លោក ចន ប៊ែល បានមានប្រសាសន៍ថា៖ «កំណើនទ្រព្យសកម្មយ៉ាងឆាប់រហ័សត្រឹមរយៈពេល៣ឆ្នាំនេះ គឺដោយសារការផ្តល់ទំនុកចិត្តខ្ពស់ពីអតិថិជនគាំទ្រសេវាប្រាក់បញ្ញើ និងប្រាក់កម្ចីរបស់ធនាគារជាពិសេស កម្ចីទិញផ្ទះ កម្ចីអាជីវកម្ម កម្ចីសម្រាប់អាជីវកម្មខ្នាតតូចនិងមធ្យម ដើម្បីចូលរួមបង្កើតការងារដល់ប្រជាពលរដ្ឋកម្ពុជាក៏ដូចជាចូលរួមអភិវឌ្ឍសេដ្ឋកិច្ចកម្ពុជា»។
លោក ចន ប៊ែល បន្ថែមថា ធនាគារ ជីប ម៉ុង តែងតែវិនិយោគត្រឡប់ទៅវិញដើម្បីបន្តពង្រីកខ្លួន និងចាក់ឫសកាន់តែជ្រៅទៅក្នុងទីផ្សារធនាគារ និងហិរញ្ញវត្ថុស្របតាមចក្ខុវិស័យវែងឆ្ងាយក្នុងការកា្លយខ្លួនជាធនាគារពាណិជ្ជឈានមុខគេមួយនៅកម្ពុជា។ លោកក៏បានសម្តែងភាពរំភើបរីករាយនឹងលទ្ធផលពេលនេះ ដើម្បីចូលរួមចំណែកពង្រីកវិស័យធនាគារនិងហិរញ្ញវត្ថុនៅកម្ពុជាកាន់តែរឹងមាំ។ ជាក់ស្តែង កាលពីខែមករាឆ្នាំ២០២២ ធនាគារ ជីប ម៉ុង បានបន្ថែមដើមទុនចំនួន១០លានដុល្លារអាមេរិក និងបើកសាខាចំនួន២បន្ថែមទៀតនៅផ្សារទំនើប ជីប ម៉ុង ៥៩៨ម៉ល និងផ្សារទំនើប ជីប ម៉ុង សែនសុខ ម៉ល ក្នុងរាជធានីភ្នំពេញដើម្បីឆ្លើយតបនឹងតម្រូវការអតិថិជន និងពង្រីកប្រតិបត្តិការធនាគារបន្ថែមទៀត។ ក្រៅពីនេះ ធនាគារ ជីប ម៉ុង តែងតែបន្តអភិវឌ្ឍសេវាកម្មឌីជីថលរបស់ខ្លួនឱ្យកាន់តែមានភាពងាយស្រួល និងសម្បូរបែបដើម្បីបំពេញតម្រូវរបស់អតិថិជន។
ជាមួយគ្នានេះដែរ ធនាគារ ជីប ម៉ុង ក៏បានចូលរួមលើកកម្ពស់ចំណេះដឹងផ្នែកហិរញ្ញវត្ថុដល់និស្សិតតាមរយៈការផ្តល់ឱកាសចូលរួមកម្មវិធីកម្មសិក្សាការងារ និងវគ្គបណ្តុះបណ្តាលនានា។ គួរបញ្ជាក់ថា បច្ចុប្បន្ន ធនាគារ ជីប ម៉ុងមានសាខាប្រតិបត្តិការសរុបចំនួន១៣ ក្នុងនោះ១០សាខានៅភ្នំពេញ និង ៣សាខាទៀតនៅខេត្តកំពង់ចាម បាត់ដំបង និងសៀមរាប និងភា្នក់ងារធនាគារជាង១៣០ទីតាំង។ ធនាគារ ជីប ម៉ុងក៏មានផែនការពង្រីកសាខា និងភ្នាក់ងារធនាគារបន្ថែមទៀតនាពេលខាងមុខផងដែរ។
