គ្រប់វត្តអារាមទូទាំងប្រទេសកម្ពុជា ប្រារព្ធពិធីបុណ្យមាឃបូជាតាមកន្លងព្រះពុទ្ធសាសនា ដោយអនុវត្តវិធានការ សុខាភិបាលបានត្រឹមត្រូវ

គ្រប់វត្តអារាមនៅទូទាំងប្រទេសកម្ពុជាបានប្រារព្ធពិធីបុណ្យមាឃបូជាតាមគន្លងព្រះពុទ្ធសាសនា ហើយបាន អនុវត្តវិធានការសុខាភិបាលបានត្រឹមត្រូវ ដើម្បីធ្វើយ៉ាងណាការពារពីការឆ្លងនូវជំងឺរាតត្បាតកូវីដ១៩ ។ មាឃបូជា ជាបុណ្យជាតិដ៏ធំមួយក្នុងចំណោមបុណ្យជាតិដទៃទៀត ដែលពុទ្ធសាសនិកជនតែងគោរពបូជាមិនដែលខាន នៅពេល ដល់ថ្ងៃពេញបូណ៌មីខែមាឃ ។ ឆ្នាំនេះបុណ្យមាឃបូជាបានប្រព្រឹត្តិទៅ នៅថ្ងែពុធ ១៥កើត ខែមាឃ ឆ្នាំឆ្លូវត្រីស័ក ពស២៥៦៥ ត្រូវនឹងថ្ងៃទី១៦ ខែកុម្ភៈ ឆ្នាំ២០២២ ដែលពុទ្ធបរិស័ទជាច្រើនបានមកកាន់ទីវត្តអារាមដោយមានយកនូវចង្ហាន់មកប្រគេនព្រះសង្ឃដើម្បីឧទ្ទិសកុសលផលបុណ្យដល់ញាតិការទាំងប្រាំសន្ដានដែលបានចែកឋានទៅលោកខាងមុខផងនិងសុំសេចក្តីសុខដល់ក្រុមគ្រួសារផង ។ ដោយឡែកនៅពេលរសៀលនៅតាមវត្តក៏មានការហែក្បូន ដង្ហែព្រះពុទ្ធរូប ផ្កាភ្ញី ដើម្បីទទួលបានកុសលផលបុណ្យ សម្រាប់ បច្ចុប្បន្នជាតិ និងអនាគតជាតិ។ ព្រះភិក្ខុសង្ឃ កុយ សុខណាង គង់នៅវត្តសិរីមង្គលបានមានសង្ឃដីកាថា ពិធីបុណ្យមាឃបូជា គឺជាពិធីបុណ្យសាសនាដ៏ធំមួយ នៅក្នុងព្រះពុទ្ធសាសនា ប្រជាជនខ្មែរយើងភាគច្រើន ដែលជាពុទ្ធសាសនិក តែងតែបានប្រារព្ធធ្វើពិធីបុណ្យនេះឡើង ជារៀងរាល់ឆ្នាំ ក្នុងគោលបំណងធំបំផុត ដើម្បីរលឹកនឹកទៅដល់ឧបការគុណដ៏ធំធេងរបស់ព្រះសម្មាសម្ពុទ្ធនិង ចំពោះមនុស្សជាតិផងទាំងឡាយ ដែលគោរពបូជា និងជឿជាក់លើព្រះធម៌។ ព្រះភិក្ខុសង្ឃបានមានសង្ឃដីកាបន្តថា សម្រាប់វត្តអារាមសិរីមង្គលបានរៀបចំសណ្ដាប់ធ្នាប់ឱ្យបានល្អ មានអនាម័យ បរិស្ថានល្អ ដោយមានសារអប់រំ តាមរយៈ ចងបដា ទង់ជ្វាលា ពាក្យស្លោក នៅទីធ្លាវត្ត ដើម្បីអបអរសាទរបុណ្យមាឃបូជា ។ «ពិធីបុណ្យមាឃបូជានេះគេធ្វើរំលឹកនខតសម័យកាលបីយ៉ាងគោលសំខាន់ទីមួយធ្វើរំលឹកដែលព្រះអង្គធ្វើចតុរង្គសនិ្នបាតគឺប្រជុំនូវភិក្ខុសង្ឃទាំង១២៥០រូបដែលជាព្រះអរហន្តភ័យណាស្របសុទ្ធតែជាអហិភិក្ខុគ្រប់រូបទាំងអស់អត់មានការណាត់ជួបគ្នាទេគឺដោយព្រះអង្គឯងផ្ទាល់នេះចំណុចទីមួយ។ រីឯចំណុចទីពីព្រះអង្គសម្តែងឱវាទបដិមោក្ខមកចំពោះព្រះភិក្ខុសង្ឃ មួយវិញទៀតចំណុចទីបីគឺព្រះអង្គដាក់អាយុសង្ខាចំពោះមុខថាបីខែខាងមុខទៀតតថាគតនិងបរិនិព្វានហើយ»។ ជាមួយគ្នានោះដែរ លោកយា ចាន់ មាន ជាពុទ្ធបរិស័ទ ដែលបានចូលរួមពិធីបុណ្យមាឃបូជា បានបង្ហាញអារម្មណ៍សប្បាយរីករាយ ដោយបានមកធ្វើបុណ្យទាននៅក្នុងឱកាសបុណ្យមាឃបូជានេះ បានយកចង្ហាន់មកវត្តប្រគេនព្រះសង្ឃ និងជួបជុំញាតិមិត្តជិតឆ្ងាយ ដោយក្នុងថ្ងៃនេះពុទ្ធបរិស័ទបានប្រជុំគ្នាស្តាប់ព្រះធម៌ទេសនា និងបានស្តាប់ព្រះសង្ឃសូត្រស្វាធ្យាយរៀបរាប់អំពីគុណ របស់ព្រះពុទ្ធ ជាអនេកសម្រាប់មនុស្សលោកទូទៅ ។ លោកយាយ បានបន្ថែមថា ថ្វីត្បិតតែពិធីបុណ្យមាឃបូជាមានការជួបជុំមនុស្សច្រើនក៏ពិតមែន តែលោកយាយក៏មិនបានភ្លេច តាមការណែនាំរបស់រាជរដ្ឋាភិបាលនិងក្រសួងសុខាភិបាលស្តីវិធានការការពារផងដែរ ដោយបានពាក់ម៉ាស់ បាញ់អាល់កុល រក្សាគម្លាតសុវត្ថិភាព ក្នុងគោលដៅទប់ស្កាត់ពីការឆ្លងជំងឺកូវីដ១៩ ពីមនុស្សម្នាក់ទៅមនុស្សម្នាក់ទៀត។ សូមបញ្ជាក់ថា បុណ្យមាឃបូជា ប្រារព្ធឡើងដើម្បីរំលឹកដល់ថៃ្ងដែលព្រះសម្មាសម្ពុទ្ធទ្រង់ប្រកាសបង្កើត ព្រះពុទ្ធសាសនា ឡើង ក្នុងលោក នៅប្រទេសឥណ្ឌា កាលពី ៥៨៨ ឆ្នាំមុនគ្រិស្តសករាជ នាថៃ្ងទី ១៥ កើតខែមាឃ ក្រោយពីការត្រាស់ដឹង របស់ព្រះអង្គ ចំនួន ៩ ខែគត់ ។ ការបង្កើត ព្រះពុទ្ធសាសនា ក្នុងឋានៈជាអង្គការសាសនាមួយនេះ ធ្វើឡើងនៅក្នុងចំណោមព្រះសង្ឃចំនួន ១.២៥០ អង្គ ជាសមាជិកក្នុងអង្គមហាសន្និបាតមួយដែលបាននិមន្តមកពីគ្រប់ស្រទាប់វណ្ណៈទាំងអស់៕