ព្រះវិហារ៖ នៅព្រឹកថ្ងៃ១៥ ខែមករា ឆ្នាំ២០២២ នៅសាលាខេត្តព្រះវិហារ ឯកឧត្តម ប្រាក់ សុវណ្ណ អភិបាលនៃគណៈអភិបាលខេត្ត បានអញ្ជើញជាអធិបតីក្នុងពិធីសំណេះសំ ណាល និងផ្តល់រង្វាន់លើក ទឹកចិត្ត ដល់សិស្សានុសិស្សប្រឡងជាប់សញ្ញាបត្រមធ្យម សិក្សាទុតិយភូមិទទួលបាននិទ្ទេសA សម័យប្រឡងថ្ងៃទី២៧ ខែធ្នូ ឆ្នាំ២០២១ ដែលពិធីនេះមានការអញ្ជើញចូលរួមពីសំណាក់អភិបាល រងខេត្ត ថ្នាក់ដឹកនាំមន្ទីរអង្គភាពជុំវិញខេត្ត លោកគ្រូ អ្នកគ្រូ និងអាណាព្យាបាលសិស្សជាច្រើនរូប ។
ឯកឧត្តម ប្រាក់ សុវណ្ណ អភិបាលខេត្តព្រះវិហារ បានឱ្យដឹងថា មធ្យមសិក្សាទុតិយភូមិ ឆ្នាំសិក្សា២០២០ -២០២១ មានបេក្ខជនប្រឡងសរុបចំនួន ១៥៧៣នាក់ ស្រី ៨៣៥នាក់ បេក្ខជន បានមកប្រឡងសរុបចំនួន ១៥២២ នាក់ ស្រី ៨១២នាក់ ស្មើនឹង ៩៦,៧៦% ស្រី ៩៧,២៥% ចែកចេញជា ២ផ្នែក គឺផ្នែកវិទ្យាសាស្ត្រ បេក្ខជនចំនួន ៣៣៦នាក់ ស្រី ១៩៤នាក់ និងផ្នែកវិទ្យាសាស្ត្រសង្គមចំនួន ១១៨៦ ស្រី ៦១៨នាក់ ។
ចំពោះលទ្ធផលប្រឡងសញ្ញា បត្រមធ្យមសិក្សាទុតិយភូមិ ឆ្នាំសិក្សា២០២០-២០២១ មានបេក្ខជនប្រឡងជាប់ចំនួន ១០៧៥នាក់ ស្រី ៦២០នាក់ ក្នុងនោះនិទ្ទេស A ០៤នាក់ ស្រី ០៤ និទ្ទេស B ចំនួន ២៩នាក់ ស្រី ១៥នាក់ និទ្ទេស C ចំនួន ១៤៥នាក់ ស្រី ៩០នាក់ និទ្ទេស D ចំនួន ៣៨៤នាក់ ស្រី ២៣១នាក់ និងនិទ្ទេស E ចំនួន ៥១៣ នាក់ ស្រី ២៨០នាក់ ។ ឯកឧត្តមអភិបាលខេត្តបានសំដែងនូវការកោតសរសើរដល់សិស្សនិទ្ទេស A ទាំង ៤នាក់ ដែលបានខិតខំរៀន សូត្ររហូតទទួលបាននិទ្ទេសល្អ និងបានថ្លែងអំណរគុណទៅដល់លោកគ្រូ អ្នកគ្រូ ដែលបានយកចិត្តទុកដាក់បង្ហាត់ បង្រៀននាពេលកន្លងមក ។
ឯកឧត្តមក៏បានផ្តាំផ្ញើដល់សិស្សានុសិស្សទាំងអស់ ត្រូវចេះតស៊ូ អំណត់ព្យាយាមដោយយកចិត្តទុកដាក់រៀនសូត្រ ឱ្យបានពូកែថែមទៀត ត្រូវធ្វើអំពើណាដែលល្អ និងមានប្រយោជន៍ដល់សង្គម ហើយត្រូវការពារខ្លួនកុំឱ្យឆ្លងជំងឺកូវីដ-១៩ ដោយគោរពតាមការណែនាំរបស់រាជរដ្ឋាភិបាល បីកុំ បីការពារ ។
បន្ទាប់មក ឯកឧត្តមប្រាក់ សុវណ្ណ អភិបាលខេត្ត បានឧបត្ថម្ភដល់សិស្សនិទ្ទេស A ទាំង ៤នាក់ ទទួលបានម៉ូតូ ZoomerX ស៊េរីឆ្នាំ២០២២ ក្នុងម្នាក់ៗមួយគ្រឿង និងថវិកា ៨ម៉ឺនរៀល ផ្ដល់ជូនលោកគ្រូ អ្នកគ្រូ ២៤នាក់ ម្នាក់ៗទទួលបានថវិកា ២០ម៉ឺនរៀល និងបានផ្ដល់ជូនមណ្ឌលកុមារកំព្រានូវថវិកា ៤០ម៉ឺនរៀល ៕
