MC ក្រសួងអប់រំ យុវជន និងកីឡាបានបើកវគ្គបណ្តុះ បណ្តាលគ្រូអក្ខរកម្មជាប់កិច្ចសន្យាអប់រំក្រៅប្រព័ន្ធតាមប្រព័ន្ធក្រេឌីត ដើម្បីលើក កម្ពស់គុណវុឌ្ឍិគ្រូបង្រៀន។
នាយកដ្ឋានអប់រំក្រៅប្រព័ន្ធ នៃក្រសួងអប់រំ យុវជន និងកីឡាបានរៀបចំ “វគ្គបំប៉នគ្រូអក្ខរកម្មជាប់កិច្ចសន្យាអប់រំក្រៅប្រព័ន្ធតាមប្រព័ន្ធក្រេឌីត” ដើម្បីអនុវត្តសាកល្បងលើខ្លឹមសារសៀវភៅណែនាំស្តីពីការបណ្តុះបណ្តាលគ្រូអក្ខរកម្មជាប់កិច្ចសន្យា និងអភិវឌ្ឍសមត្ថភាព គ្រូអក្ខរកម្មជាប់កិច្ចសន្យាអប់រំក្រៅប្រព័ន្ធ លើចិត្តគរុកោសល្យ ក្នុងការបង្រៀនមនុស្សពេញវ័យ ចំណេះដឹងមូលដ្ឋាន ព្រមទាំងវិធីសាស្រ្តបង្រៀនមុខវិជ្ជាភាសាខ្មែរ និងគណិតវិទ្យាសម្រាប់កម្មវិធីអក្ខរកម្ម ដោយផ្អែកលើក្របខណ្ឌកម្មវិធីអក្ខរកម្មតាមប្រព័ន្ធក្រេឌីតកាលពីថ្ងៃទី១០ ខែកុម្ភៈ ឆ្នាំ២០២១ នៅសាលសហសិក្សាសាលាគរុកោសល្យ និងវិក្រឹតការខេត្តពោធិសាត់។
ឯកឧត្តម ណុះ ស្លេះ រដ្ឋលេ ខាធិការក្រសួងអប់រំ យុវជន និងកីឡា បានចាត់ទុក វគ្គបំប៉នគ្រូអក្ខរកម្មជាប់កិច្ច សន្យាអប់រំក្រៅប្រព័ន្ធតាមប្រព័ន្ធក្រេឌីត ដែលរៀបចំ ឡើងនាពេលនេះជាការអនុវត្តសាកល្បង លើខ្លឹមសារសៀវភៅណែនាំស្តីពីការបណ្តុះបណ្តាលគ្រូអក្ខរកម្មជាប់កិច្ចសន្យា ដើម្បីឈានទៅបន្តការបណ្ដុះបណ្ដាល និងលើកកម្ពស់គុណវុឌ្ឍិគ្រូបង្រៀនកម្មវិធីអក្ខរកម្មជាប់កិច្ចសន្យាអប់រំក្រៅប្រព័ន្ធនៅតាមវិទ្យាស្ថានគរុកោសល្យ និងសាលាគរុកោសល្យ និងវិក្រឹតការរាជធានី ខេត្តផ្សេង ទៀត ស្របតាមស្តង់ដារជាតិ ទាំងខ្លឹមសារ វិធីសាស្ត្របង្រៀន ការបង្រៀន និងរៀន និងការវាយតម្លៃលទ្ធផលសិក្សារបស់សិស្ស៕
