ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុបានអញ្ជើញចូលរួមបុណ្យផ្កាប្រាក់រស្មីសាមគ្គី ដើម្បីប្រមូលបច្ច័យកសាងបង្ហើយសាលាវិបស្សនាធុរៈ នៅក្នុងបរិវេណមជ្ឈមណ្ឌលវិបស្សនាធុរៈគរីនាគវ័ន (ហៅវត្តភ្នំសមាធិ) ស្ថិតនៅភូមិរាម ឃុំរាម ស្រុកព្រៃនប់ ខេត្ដព្រសីហនុ កាលពីរសៀលថ្ងៃសៅរ៍ ១៣កើត ខែបុស្ស ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី ១៥ ខែមករា ឆ្នាំ២០២២។
ឯ
កឧត្តម គួច ចំរើន មានប្រសាសន៍ថា បុណ្យផ្កាប្រាក់រស្មីសាមគ្គី ដែលប្រារព្ធធ្វើនៅមជ្ឈមណ្ឌលវិបស្សនាធុរៈគរី នាគវ័ន (ហៅវត្តភ្នំសមាធិ) ស្ថិតនៅភូមិរាម ឃុំរាម ស្រុកព្រៃនប់ នាពេលនេះ គឺដើម្បីបង្ហើយវិបស្សនាធុរៈ មានទំហំទទឹង២១ម៉ែត្រ បណ្តោយ៣៩ម៉ែត្រ ដែលនៅខ្វះដំបូល និងក្រាលការ៉ូបាត សម្រាប់ជាសម្បត្តិព្រះពុទ្ធសាសនា និងជូនសីលវន្ត សីលវតី្ត ពុទ្ធបរិស័ទ បានបំពេញបុណ្យកុសល និងធ្វើការប្រតិបត្តិព្រះធម៌វិបស្សនាជាផ្លូវរំលត់ទុក្ខ និងជាផ្លូវឆ្ពោះទៅកាន់ឋានសួរ និងព្រះនិព្វាន។ ឯកឧត្តមអភិបាលខេត្តបានបញ្ជាក់ថា ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាបានណែនាំឱ្យគ្រប់រាជធានី ខេត្ត ត្រៀមលក្ខណៈគិតគូររកកន្លែង ដើម្បីបូជាសពជនរួមជាតិរបស់យើង ដែលស្លាប់ដោយជំងឺកូវីដ-១៩។
ឯកឧត្ដមអភិបាលខេត្ដបានរម្លឹក និងនៅចាំអនុស្សាវរីយ៍ក្នុងគ្រាដ៏លំបាក នៅពេលដែលព្រះរាជាណាចក្រកម្ពុជាក៏ដូចខេត្តព្រះ សីហនុ រងនូវការរាតត្បាតដ៏ធ្ងន់ធ្ងរដោយជំងឺកូវីដ-១៩នាពេលកន្លងមក។ ឯកឧត្ដមអភិបាលខេត្ដបន្ដថា ក្នុងដំណាក់កាលដ៏លំបាកនោះ សម្រាប់ទីអារាមនានាមានឈាបនដ្ឋាន តែកន្លែងខ្លះមិនសាកសម ដោយទីធ្លាតូចចង្អៀត ឬមានលំនៅឋានប្រជាពលរដ្ឋនៅក្បែរច្រើន តែដោយសារមានការគិតគូរពីមន្ត្រីរបស់ខេត្ដ ពិសេសមន្ទីរធម្មការ និងសាសនាខេត្ត បានជ្រើសរើសឈាបន ដ្ឋានវត្តសមាធិនេះ ដែលមានលក្ខខណ្ឌ សមស្រប អាចធ្វើការបូជាសពអ្នកស្លាប់ដោយជំងឺកូវីដ-១៩បាន។
ឯកឧត្តមអភិបាលខេត្តបានបន្តទៀតថា ឯកឧត្តមបានដឹកនាំប្រតិភូចុះពិនិត្យទីតាំងឈាបនដ្ឋាននៅក្នុងបរិវេណវត្តសមាធិ និងបានស្នើសុំព្រះចៅអធិការវត្តដើម្បីបូជាសពជនរួមជាតិរបស់យើង ដែលស្លាប់ដោយជំងឺកូវីដ-១៩ ហើយទឹកព្រះទ័យរបស់លោកគ្រូព្រះចៅអធិការបានសន្តោសចូលរួមជាមួយរដ្ឋបាលខេត្ត ដែលធ្វើឱ្យរដ្ឋបាលខេត្ដនៅចងចាំជានិច្ចនូវអ្វីដែលព្រះសង្ឃបានចូលរួមធ្វើឱ្យស្ថានភាពលំបាករបស់រដ្ឋបាលខេត្តនាពេលនោះត្រូវបានដោះស្រាយ។
ឯកឧត្តមអភិបាលខេត្ត ក៏សូមថ្វាយប្រគេនការថ្លែងអំណរគុណព្រះគ្រូចៅអធិការវត្ត គណៈកម្មាធិការវត្តសមាធិ ក្នុងរយៈពេលកន្លងមកបានចូលរួមយ៉ាងសកម្មជាមួយរដ្ឋបាលខេត្ត ដើម្បីដោះស្រាយកិច្ចការបានទាន់ពេលវេលា ដោយបានយកឈាបនដ្ឋាននៅទីនេះ សម្រាប់បូជាសពជនរួមជាតិរបស់យើងដែលបានទទួលមរណភាពដោយសារជំងឺកូវីដ-១៩។
ជាមួយគ្នានេះដែរ ក្នុងរយៈពេលប៉ុន្មានខែកន្លងមក ព្រះគ្រូចៅអធិការវត្ត បានលើកឡើងចង់ធ្វើបុណ្យផ្កាប្រាក់រស្មីសាមគ្គី ដើម្បីប្រមូលបច្ច័យបង្ហើយសាលាវិបស្សនាធុរៈនៅទីនេះ ហើយឯកឧត្តមក៏បានឆ្លើយតបថានៅពេលស្ថានភាពកូវីដធូរស្បើយ នឹងកៀរគរសប្បុរសជន ដើម្បីចូលរួមក្នុងការកសាងបង្ហើយ។ ជាក់ស្តែងថ្ងៃនេះ សប្បុរសជន និងពាណិជ្ជករចិន បានចូលរួមជួយកសាងដំបូលព្រះវិហារ និងក្រាលការ៉ូ។
ឯកឧត្តមអភិបាលខេត្តលើកឡើងថា ឯកឧត្តមនឹងចូលរួមកសាងបង្ហើយទាំងដំបូល និងក្រាលការ៉ូនៅទីនេះ ដើម្បីជាការតបស្នងចំពោះទឹកព្រះទ័យដ៏ល្អរបស់ព្រះតេជគុណព្រះចៅអធិការ។ ម្យ៉ាងទៀត នេះគឺជាការចូលរួមជាមួយការលះបង់របស់លោកយាយ លោកតាចំណុះជើងវត្ត ក្នុងរយៈពេលកន្លងមក នៅពេលជំងឺកូវីដគំរាមកំហែងរដ្ឋបាលខេត្ត បានយកកន្លែងនេះសម្រាប់បូជាសពអ្នកទទួលមរណភាពដោយសារជំងឺកូវីដ ដែលបញ្ហានេះ យើងមានកាតព្វកិច្ចរួមគ្នាត្រូវធ្វើការដោះស្រាយ ។ សូមជម្រាបជូនថា ក្នុងពិធីបុណ្យផ្កាសាមគ្គីនេះ បច្ច័យដែលប្រមូលបានពីសប្បុរសជន គឺបានជាង ៤៣ ០០០ ដុល្លារអាម៉េរិក ៕
