ខេត្តកំពត៖សៃវៀនជល់មាន់ និងអាប៉ោងដ៏ធំមួយកន្លែង បាំងដោយរបងស័ង្គសី ក្បែប៉ុស្តិ៍រដ្ឋបាលត្នោតចុងស្រង់ ស្ថិតនៅក្នុងភូមិ/ឃុំត្នោតចុងស្រង់ ស្រុកបន្ទាយមាស ខេត្តកំពត កំពុងបើកឲ្យលេងយ៉ាងគក្រឹកគក្រេង មិនឃើញមានអាជ្ញាធរមូលដ្ឋានចុះណែនាំ និងបង្កាបនោះឡើយ ទោះបីជាអ្នកសារព័ត៌មានខលទូរសព្ទរាយការណ៍យ៉ាងណាក្តី។
បើតាមសេចក្តីរាយការណ៍បានឲ្យដឹងថា ទីតាំងខាងលើនេះមានម្ចាស់ ឈ្មោះ ណាង ហើយទើបតែសម្ភោធបើកឲ្យលេងនៅថ្ងៃទី៧ ខែមករា ឆ្នាំ២០២២នេះ ដោយមានក្រុមញៀនល្បែងសម្រុកចូលលេងពពាក់ពពួនដូចទឹកបាក់ទំនប់អញ្ជឹង ដោយភាគច្រើនមិនមានការពាក់ម៉ាសការពារជំងឺឆ្លងកូវីដនោះឡើយ ខណៈជំងឺនេះនូវមិនទាន់សាបរលាបនៅឡើយ ឯជំងឺឆ្លងប្រភេទថ្មីក៏កំពុងកើតមានឡើងដ៏គួរឲ្យព្រួយបារម្មពីថ្នាក់ដឹកនាំផងដែរនោះ។
ប្រភពពីប្រជាពលរដ្ឋបានឲ្យដឹងថា ម្ចាស់ទីតាំងខាងលើនេះទំនងមានខ្នងបង្អែកដ៏រឹងមាំហើយមើលទៅ បានជាហានបើកឲ្យលេង ដោយមិនខ្វល់ពីការរំខានដល់អ្នកជិតខាងឡើយ ហើយម្យ៉ាងវិញទៀតមុននឹងចាប់ផ្តើមបើកឲ្យលេងគឺមានរៀបចំធ្វើពីធីសម្ភោធ ដោយមានការផឹកស៊ីសប្បាយស្រេកហូរកញ្ជ្រៀវគងរំពងទៀតផង។
ពាក់ព័ន្ធបញ្ហាខាងលើនេះអ្នកសារព័ត៌មានយើង បានខលរាយការជូនលោកវរសេនីយ៍ទោ នាក់ ឌឹម អធិការនគរបាលស្រុកបន្ទាយមាស លោកឆ្លើយថា ចាំលោករាយការណ៍ជូនថ្នាក់លើសិន ដោយឡែកលោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត ខណៈខលចូលហើយក៏ស្រាប់ចុចបិតទៅវិញ។
ជុំវិញបញ្ហាខាងលើនេះប្រជាពលរដ្ឋបានសម្ដែងការព្រួយបារម្ភ និងភ័យខ្លាច កើតមានបទល្មើសផ្សេងៗដូចជា អំពើចោរកម្ម អំពើហិង្សាក្នុងគ្រួសារ និងបទល្មើសជួញដូរនិងប្រើប្រាស់គ្រឿងញៀន ព្រោះមានពលរដ្ឋខ្លះចាញ់ល្បែង លក់អស់ទ្រព្យសម្បត្តិដីធ្លី និងជំពាក់បំណុលគេ ជុំទិសបង្កជាបញ្ហាអសន្តិសុខសង្គមជាដើម ដែលកើតចេញពីល្បែងស៊ីសង ជាច្រើនប្រភេទទាំងនេះ។
សូមជំរាបផងដែរថា ពាក់ព័ន្ធការលេងល្បែងស៊ីសងគ្រប់ប្រភេទ ថ្នាក់ដឹកនាំកំពូលៗ ក៏បានចេញបទបញ្ជាយ៉ាងម៉ើងម៉ាត់ហើយដែរឲ្យមន្ត្រីថ្នាក់ក្រោមត្រូវទប់ស្កាត់ឲ្យខានតែបាន មិនត្រូវឲ្យកើតមានឡើង ដើម្បីឲ្យស្របតាមគោលនយោបាយភូមិ ឃុំ មានសុវត្ថិភាពរបស់ប្រមុខរាជរដ្ឋាភិបាលកម្ពុជា ដែលបានដាក់ចេញ បើសិនជាមាន ហើយគ្មានការទប់ស្កាត់ បើនៅមូលដ្ឋានណានោះមន្ត្រីមូលដ្ឋាននោះត្រូវទទូលខុសត្រូវ។ម្យ៉ាងវិញទៀតបើយោងតាមច្បាប់ស្តីពីការបង្ក្រាប់ល្បែងស៊ីសងជំពួក១ មាត្រា១ .ត្រូវហាមឃាត់ជាដាច់ខាតការលេងល្បែងស៊ីសងគ្រប់ប្រភេទ នៅគ្រប់ទីកន្លែងទូទាំងព្រះរាជាណាចក្រកម្ពុជា,ជំពូក៣ មាត្រា៤ . ជនណាលេងល្បែងស៊ីសងជននោះត្រូវផ្តន្ទាទោសពិន័យជាប្រាក់ ឬដាក់គុក។ក្នុងជំពូកដដែល មាត្រា១១.ជនណាដែលចេញមុខការពារវង់ល្បែងស៊ីសងឬបនល្បែងស៊ីសងគ្រប់ប្រភេទនៅទីណាក៏ដោយ ត្រូវផ្តន្ទាទោសដាក់គុកពី១ឆ្នាំ
នាំដល់៥ឆ្នាំទៀតផង៕
