(ខេត្តកណ្តាល)៖ ដើម្បីបំពេញសេចក្ដីត្រូវការចាំបាច់របស់ប្រជាពលរដ្ឋក្នុងការធ្វើដំណើរទៅមកបានងាយស្រួលក្នុងជីវភាពប្រចាំថ្ងៃ ជូនប្រជាពលរដ្ឋរស់នៅក្នុងសង្កាត់ស្វារលំ នៅព្រឹកថ្ងៃទី១៦ ខែសីហា ឆ្នាំ២០២៣ ឯកឧត្ដម គង់ សោភ័ណ្ឌ អភិបាល នៃគណៈអភិបាលខេត្តកណ្ដាល បានអញ្ជើញបើកការដ្ឋានជួសជុលផ្លូវចាក់បេតុងអាមេ ប្រវែង២,៤៩៩ម៉ែត្រ និងដាក់លូ២ខ្សែប្រវែង៣,០៨៣ម៉ែត្រ នៅភូមិលេខ១ក និងភូមិលេខ២ សង្កាត់ស្វាយរលំ ក្រុងតាខ្មៅ ខេត្តកណ្ដាល។
មានប្រសាសន៍ក្នុងពិធីបើកការដ្ឋាននេះដែរ ឯកឧត្ដម គង់ សោភ័ណ្ឌ អភិបាល នៃគណៈអភិបាលខេត្តកណ្ដាល បានមានប្រសាសន៍ថា ៖ការសាងសង់ ជួសជុលផ្លូវ និងដាក់លូ គឺក្នុងគោលបំណងដើម្បី ឆ្លើយតបនូវដំរូវការចាំបាច់របស់ប្រជាពលរដ្ឋ និងដើម្បីកាត់បន្ថយការលំបាករបស់ប្រជាពលរដ្ឋក្នុងការធ្វើដំណើរ និងលើកនូវសោភ័ណភាពផ្លូវឱ្យបានសមរម្យផងដែរ។ ឯកឧត្តមបន្តថា ការបើកការដ្ឋានសាងសង់ផ្លូវបេតុង និងដាក់លូដោះទឹក នៅភូមិលេខ១ក និងភូមិ លេខ២ សង្កាត់ស្វាយរលំ ក្រុងតាខ្មៅ នាពេលនេះ គឺជាសមិទ្ធផលថ្មីមួយបន្ថែមទៀត ជាមួយនឹងសមិទ្ធផលនានាជាច្រើនទៀតរបស់ក្រុងតាខ្មៅ ក្នុងវិស័យសេដ្ឋកិច្ច-សង្គម ប្រកបដោយ សោភ័ណ្ឌភាព ផាសុខភាព សមធម៌ និងបរិយាប័ន្ន ស្របតាមគោលនយោបាយយុទ្ធសាស្ត្រចតុកោណរបស់រាជរដ្ឋាភិបាល ក្រោមការដឹកនាំដ៏ឈ្លាសវៃ និងប៉ិនប្រសប់ ប្រកបដោយគតិបណ្ឌិតរបស់ សម្តេចអគ្គមហាសនា បតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងជាអគ្គមហារដ្ឋបុរស បានដាក់ចេញនូវគោលនយោបាយយុទ្ធសាស្ត្រ នីតិកាលទី៦ នៃរដ្ឋសភាជាតិ នៅតែចាត់ទុកវិស័យទាំងបួន “មនុស្ស ផ្លូវ ទឹក ភ្លើង” ជាអាទិភាពដោយតម្កល់ “មនុស្ស” ជាអាទិភាពនៅលើគេ ដែលបានធ្វើឱ្យប្រទេសជាតិ មានការអភិវឌ្ឍន៍ រីកចំរើនលើគ្រប់វិស័យ តាមរយៈការកសាងនូវសមិទ្ធផលនានា មានដូចជា វត្តអារាម សាលារៀន មន្ទីរពេទ្យ ហេដ្ឋារចនាសម្ព័ន្ធផ្សេងៗទៀតជាច្រើននៅទូរទាំងប្រទេស នេះសបញ្ជាក់ឱ្យឃើញថា ប្រទេសជាតិកំពុងតែមានការរីកចំរើនយ៉ាងពិតប្រាកដ។
ឯកឧត្ដម គង់ សោភ័ណ្ឌ ក៏បានសំណូមពរ និងការអធ្យាស្រ័យចំពោះប្រជាពលរដ្ឋមានលំនៅដ្ឋាននៅតាមដងផ្លូវនេះនៅពេលការស្ថាបនាផ្លូវតែងមានការប៉ះពាល់ដល់ការរស់នៅរបស់បងប្អូន អំពីសុខភាព អនាម័យ ក៏ប៉ុន្តែនៅពេលផ្លូវនេះរួចរាល់ហើយនោះ ផ្លូវនេះនឹងជួយសម្រួល ក្នុងការធ្វើដំណើរ ក្នុងនោះដែរក្រុមហ៊ុនត្រូវយកចិត្តទុកដាក់ធ្វើការសាងសង់ផ្លូវចាក់បេតុង ឱ្យធានាបាននូវគុណភាពប្រើប្រាស់តាមស្តង់ដា ពិសេសត្រូវដាក់ប្រព័ន្ធលូបង្ហូរទឹកឱ្យបានត្រឹមត្រូវ ម៉្យាងទៀតសូមឱ្យអាជ្ញាធរ ត្រូវយកចិត្តទុកដាក់ថែទាំផ្លូវនេះអោយមានសោភ័ណភាព និងគុណភាពប្រើប្រាស់បានយូរអង្វែង។
ក្នុងឱកាសនោះដែល ឯកឧត្តម គង់ សោភ័ណ្ឌ អភិបាលខេត្តកណ្តាល បានក្រើនរំលឹកដល់បងប្អូនប្រជាពលរដ្ឋត្រូវចូលរួមគោរពច្បាប់ចរាចរណ៍អោយបានគ្រប់ៗគ្នា ជៀសអោយឆ្ងាយពីរគ្រឿងញៀន ល្បែងស៊ីសងគ្រប់ប្រភេទ អាជ្ញាធរមូលដ្ឋានត្រូវពង្រឹងការងារភូមិ ឃុំ សង្កាត់ មានសុវត្ថិភាព អោយបានល្អប្រសើរ ត្រូវបង្ក្រាបអោយបាននូវអំពើ លួច ឆក់ ប្លន់ ដើម្បីសុខសុវត្ថិភាពបងប្អូនប្រជាពលរដ្ឋក្នុងមូលដ្ឋានរបស់ខ្លួន៕
