នគរបាលខេត្តព្រៃវែង ចុះត្រួតពិនិត្យ និងពង្រឹងប្រសិទ្ធភាពការងារប៉ុស្តិ៍នគរបាលរដ្ឋបាល ក្នុងខេត្តព្រៃវែង

(ខេត្តព្រៃវែង)៖ នៅព្រឹកថ្ងៃពុធ ៣រោច ខែបឋមាសាឍ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី០៥ ខែកក្កដា ឆ្នាំ២០២៣ លោកវរសេនីយ៍ទោ អ៊ន រស់ ស្នងការរង នៃស្នងការដ្ឋាននគរបាលខេត្តព្រៃវែង បានដឹកនាំមន្ត្រីនគរបាលជំនាញ នៃការិយាល័យកិច្ចការប៉ុស្តិ៍ ចំណុះស្នងការដ្ឋាននគរបាលខេត្តព្រៃវែង ចុះត្រួតពិនិត្យតាមដាន ណែនាំ និងពង្រឹងប្រសិទ្ធភាពការងារប៉ុស្តិ៍នគរបាលរដ្ឋបាល ៣១ ប៉ុស្តិ៍ ក្នុងខេត្តព្រៃវែង។

គួរបញ្ជាក់ថា ការចុះត្រួតពិនិត្យ ណែនាំ ដើម្បីពង្រឹងប្រសិទ្ធភាពការងារដល់មន្ត្រីនគរបាល នៃប៉ុស្តិ៍នគរបាលរដ្ឋបាល ចំនួន ៣១ នគរបាលជំនាញ នៃស្នងការដ្ឋាននគរបាលខេត្តព្រៃវែង បានផ្ដោតសំខាន់ទៅលើការត្រួតពិនិត្យ និងពង្រឹងវិន័យកងកម្លាំងនគរបាលជាតិ, ពង្រឹងគោលនយោបាយ ភូមិ ឃុំ មានសុវត្ថិភាព ទាំង ៧ចំណុច, ពង្រឹងការងារនគរបាល និងសហគមន៍ផ្តោតទៅលើទម្រង់ទាំង ៤, ពង្រឹងលើវិន័យ ឯកសណ្ឋាន, បរិស្ថាន និងអនាម័យ, ដាក់ទិសដៅបន្តជូនប៉ុស្តិ៍នគរបាលរដ្ឋបាលយកទៅអនុវត្តន៍ និងធ្វើការណែនាំពីរបៀបរបបរាយការណ៍ចូលក្នុងក្រុមតេឡេក្រាម (Group Telegram) របស់នគរបាលខេត្តព្រៃវែង។

ក្រោយចុះពិនិត្យ និងពង្រឹងការងារ មន្ត្រីនគរបាលជំនាញ ក៏បានចាត់ចំណាត់ថ្នាក់ដល់ប៉ុស្តិ៍ចំណាត់ថ្នាក់លេខ ១ មានចំនួន ០១ប៉ុស្តិ៍ គឺប៉ុស្តិ៍នគរបាលរដ្ឋបាលព្រៃទទឹងចុះពិនិត្យ ប៉ុស្តិ៍រដ្ឋបាលចំណាត់ថ្នាក់លេខ ២ មានចំនួន ០២ប៉ុស្តិ៍ គឺប៉ុស្តិ៍នគរបាលរដ្ឋបាលជីផុច, ប៉ុស្តិ៍នគរបាលរដ្ឋបាលច្រេស នៃអធិការដ្ឋាននគរបាលស្រុកមេសាង។

ដោយឡែកប៉ុស្ដិ៍នគរបាលរដ្ឋបាល នៃអធិការដ្ឋាននគរបាលស្រុកពាមជរ ចំណាត់ថ្នាក់លេខ ១ មានចំនួន ០២ប៉ុស្តិ៍ គឺប៉ុស្តិ៍នគរបាលរដ្ឋបាលកំពង់ប្រាសាទ និងប៉ុស្តិ៍នគរបាលរដ្ឋបាលព្រែកសំបួរ, ចំណាត់ថ្នាក់លេខ ២ មានចំនួន ០២ប៉ុស្តិ៍ គឺប៉ុស្តិ៍នគរបាលរដ្ឋបាលឫស្សីស្រុក និងប៉ុស្តិ៍នគរបាលរដ្ឋបាលព្រែកក្របៅ។

រីឯប៉ុស្តិ៍នគរបាលរដ្ឋបាល ចំណុះអធិការដ្ឋាននគរបាលស្រុកពាមរក៍ ចំណាត់ថ្នាក់លេខ ១ មានចំនួន ០៦ប៉ុស្តិ៍ រួមមាន៖ ប៉ុស្តិ៍នគរបាលរដ្ឋបាលបន្លិចប្រាសាទ, ប៉ុស្តិ៍នគរបាលរដ្ឋបាលពាមរក៍, ប៉ុស្តិ៍នគរបាលរដ្ឋបាលព្រែកខ្សាយ “ក”, ប៉ុស្តិ៍នគរបាលរដ្ឋបាលអ្នកលឿង, ប៉ុស្តិ៍នគរបាលរដ្ឋបាលបាបោង, ប៉ុស្តិ៍នគរបាលរដ្ឋបាលព្រៃកណ្តៀង។ ចំពោះចំណាត់ថ្នាក់លេខ ២ មានចំនួន ០២ប៉ុស្តិ៍ គឺប៉ុស្តិ៍នគរបាលរដ្ឋបាលពាមមានជ័យ និងប៉ុស្តិ៍នគរបាលរដ្ឋបាលព្រែកខ្សាយ”ខ”៕