ឯកឧត្តម គួច ចំរើន អភិបាលនៃគណៈអភិបាលខេត្តព្រះសីហនុ នៅព្រឹកថ្ងៃសៅរ៍ ២រោច ខែអស្សុជ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី២៣ខែតុលាឆ្នាំ២០២១នេះបានអញ្ជើញជាអធិបតីក្នុងពិធីបើកយុទ្ធនាការបិទប័ណ្ណព័ត៌មាន ផ្សព្វផ្សាយពេលវេលាបញ្ចេញ ប្រមូល ដឹកជញ្ជូនសំរាមនៅតាមដងផ្លូវចំនួន៤៧ខ្សែក្នុងក្រុងព្រះសីហនុ ដោយមានការចូលរួមពីលោកអភិបាលរងខេត្ត លោកអភិបាលក្រុង មន្ត្រីរាជការ កងកម្លាំងប្រដាប់អាវុធ និងអ្នកស្ម័គ្រចិត្តយ៉ាងច្រើនកុះករ នៅមហាវិថីសម្តេចតេជោ ស្ថិតនៅសង្កាត់ លេខ៤ ក្រុងព្រះសីហនុ ។
ឯកឧត្តម គួច ចំរើន អភិបាលខេត្តព្រះសីហនុ មានប្រសាសន៍បើកយុទ្ធនា ការបិទប័ណ្ណពត៌មាន ផ្សព្វផ្សាយពេលវេលាបញ្ចេញ ប្រមូល និងដឹកជញ្ជូនសំរាមនៅតាមខ្សែផ្លូវ ៤៧ខ្សែ ក្នុងក្រុងព្រះសីហនុ ដើម្បីបញ្ចប់សំរាមនៅក្នុងក្រុងព្រះសីហនុ ដោយសារកន្លងមកសំរាមមានការកកស្ទះនៅក្រុងព្រះ សីហនុ ដោយសារអ្នកបញ្ចេញសំរាមមានចំនួនច្រើន និងការប្រមូលមិនទាន់ទាន់ឆ្លើយតប។ បច្ចុប្បន្នការកកស្ទះសំរាមនៅសល់តែតំបន់ទំនប់រលក ដោយសារការបញ្ចេញសំរាមលើគោក និងសំរាមមកពីតំបន់កោះ ។
ឯកឧត្តម អភិបាលខេត្តបានបន្តថា រដ្ឋបាលក្រុងបានទទួលសិទ្ធិពីរាជរដ្ឋាភិបាល និងក្រសួងស្ថាប័នពាក់ព័ន្ធតាមអនុក្រឹត្យលេខ១១៣ ដោយរៀបចំកម្មវិធីប្រមូលសំរាម និងសកម្មភាពដឹកជញ្ជូនសំរាមចេញពីក្រុងព្រះសីហនុ។ រដ្ឋបាលក្រុងបានធ្វើការអប់រំ ផ្សព្វផ្សាយដល់ប្រជាពលរដ្ឋជាបន្តបន្ទាប់ ទន្ទឹមនោះក៏បានជំរុញឱ្យក្រុមហ៊ុនប្រមូលសំរាម ត្រូវជ្រើសរើសបុគ្គលិក បន្ថែមរថយន្តដឹកជញ្ជូនសំរាម និងឧបករណ៍បំពាក់បន្ថែមទៅតាមតម្រូវការចាំបាច់នានា ។
ឯកឧត្តម អភិបាលខេត្តបានបញ្ជាក់ថា ក្រុងព្រះសីហនុ បានទទួលពានរង្វាន់ជាទីក្រុងមានចីរភាពហើយពានរង្វាន់នេះ មិនអាចកាត់ផ្ដាច់ពីអស់លោក លោកស្រីដែលជាអ្នកបញ្ចេញសំរាមនោះទេ ហើយនេះក៏ជាមោទនភាពដែលយើងបានខិតខំប្រឹងប្រែងទាំងអស់គ្នា ថ្ងៃនេះយើងធ្វើ សកម្មភាពចុះបិទប័ណ្ណព័ត៌មាន ផ្សព្វផ្សាយពេលវេលាបញ្ចេញ ប្រមូល និងការដឹកជញ្ជូនសំរាមនៅតាមខ្នងផ្ទះប្រជាពលរដ្ឋនៅលើដងផ្លូវទាំង៤៧ខ្សែក្នុងក្រុងព្រះ សីហនុ ដើម្បីឱ្យអ្នកបង្កើតសំរាម បញ្ចេញសំរាមតាមពេលវេលាកំណត់ចាប់ពីម៉ោង ៧:០០យប់ ហើយក្រុមហ៊ុនធ្វើការប្រមូលសំរាមចាប់ពីម៉ោង៣ភ្លឺនឹងបញ្ចប់នៅម៉ោង ១០:០០ព្រឹក ។ យើងនឹងបន្តពិនិត្យមើលនិងកែប្រែប័ណ្ណព័ត៌មានបញ្ចេញសំរាមជំហានទី២ សម្រាប់ប្រជាពលរដ្ឋក្នុងក្រុងព្រះសីហនុបន្តទៀត ដោយតម្រូវឱ្យបញ្ចេញសំរាមពីម៉ោង៧ ដល់ ម៉ោង ១០យប់ ហើយក្រុមហ៊ុនចាប់ផ្ដើមប្រមូលពីម៉ោង ១២យប់ ដល់ម៉ោង ៦:០០ព្រឹក ដើម្បីភាពស្អាតទីក្រុងរបស់យើងក្នុងការទាក់ទាញភ្ញៀវទេសចរជាតិ និងបរទេស ។ យើងមិនចង់ធ្វើការផាកពិន័យនោះទេព្រោះការផាកពិន័យមានការអាក់អន់ចិត្តពីអ្នកបញ្ចេញសំរាមក្នុងក្រុងព្រះសីហនុផងដែរ។ឯកឧត្តម អភិបាលខេត្តបានបន្តទៀតថា សកម្មភាពយុទ្ធនាការថ្ងៃនេះនិង ឈានទៅធ្វើការផាកពិន័យ ប្រសិនបើបងប្អូនប្រជាពលរដ្ឋអ្នកបង្កើតសំរាម មិនបានចូលរួមសហការជាមួយរដ្ឋបាលក្រុងព្រះសីហនុ ទន្ទឹមនោះយើងក៏ត្រូវធ្វើការអប់រំផ្សព្វផ្សាយដល់អ្នកបង្កើតសំរាម ឱ្យបានទូលំទូលាយនៅព័ត៌មាន ខ្លឹមសារ ផាកពិន័យ ដើម្បីទីក្រុងរបស់យើងស្អាត មានបរិស្ថានល្អ ប្រកបដោយផាសុកភាព និងសុខុមាលភាព ព្រោះការគ្រប់គ្រងសំរាមបានល្អបង្កើតការងារបង្កើនសេដ្ឋកិច្ចគ្រួសារនិងសេដ្ឋកិច្ចសង្គម ។
ខេត្តព្រះសីហនុ ត្រូវបានរាជរដ្ឋាភិបាលកំណត់ជា “តំបន់សេដ្ឋកិច្ចពិសេសគំរូ ពហុបំណង” ដែលមានសក្តានុពលឆ្នេរខ្សាច់សស្អាត ជាតារារះនាទិស “និរតី” ហើយភាពស្អាតនេះ គឺជាការទាក់ទាញអ្នកទេសចរមកកាន់ខេត្តរបស់យើង និងផ្តល់ការងារជូនប្រជាពលរដ្ឋ បង្កើនជីវភាពកាន់តែល្អប្រសើរ ដូច្នេះយើងត្រូវតែធានាភាពស្អាតសម្រាប់ក្រុង ខេត្តរបស់យើងទាំងអស់គ្នា ៕
