តំណាងរាស្រ្តខេត្តត្បូងឃ្មុំ ប្រគល់ផ្ទះចំនួន ០១ ខ្នង ដល់ស្រ្តីសាសនិកខ្មែរឥស្លាមមេម៉ាយម្នាក់ ចិញ្ចឹមកូនចំនួន ០៦នាក់ និងបន្តនាំអំណោយផ្តល់ជូនសាសនិកខ្មែរឥស្លាមជាង ១០០គ្រួសារ ក្នុងឃុំរំចេក ស្រុកមេមត់

ខេត្តត្បូងឃ្មុំ ៖ ព្រឹកថ្ងៃទី ២២ ខែតុលា ឆ្នាំ ២០២១ ឯកឧត្តម ម៉ូត យូសុះ តំណាងរាស្ត្រខេត្តត្បូងឃ្មុំ និងជាអ៉ីម៊ាំខេត្ត បានអញ្ជើញជាអធិបតីភាព ពិធីប្រគល់ផ្ទះចំនួន០១ ខ្នង ជូនស្រ្តីសាសនិកខ្មែរឥស្លាមមេម៉ាយមានកូនក្នុងបន្ទុក ចំនួន ០៦ នាក់ និង បន្តនាំយកអំណោយ មានជាគ្រឿង ឧបភោគ-បរិភោគ ផ្តល់ជូនសាសនិកខ្មែរឥស្លាម ចំនួន ១០០ គ្រួសារ ស្ថិតនៅភូមិសុខសាន្ត ឃុំរំចេក ស្រុកមេមត់ ខេត្តត្បូងឃ្មុំ ។

ដោយមានការអញ្ជើញចូលរួមពីសំណាក់ ឯកឧត្តម ម៉ាត់ ហ្គោហ្វូត, លោកជំទាវ យ៉ា ករី សមាជិកក្រុមប្រឹក្សាខេត្តត្បូងឃ្មុំ អ៉ីម៉ាំស្រុក មេឃុំ លោកគ្រូ-អ្នកគ្រូ យុវជន ស.ស.យ.ក យុវជនសម្ព័ន្ធយុវជនមុស្លិមកម្ពុជាខេត្ត ព្រមទាំងប្រជាពលរដ្ឋសាសនិកខ្មែរឥស្លាម ជាង ១០០ គ្រួសារ ។

បន្ទាប់ពីបាន ប្រគល់ជូននៅផ្ទះចំនួន ០១ខ្នង មានបន្ទប់ទឹក ០១ ជូនដល់ស្ត្រីមេម៉ាយខ្មែរអ៉ីស្លាម ចិញ្ចឹមកូនប្រុស ស្រី ចំនួន ០៦ ក្នុងបន្ទុក នៅផ្ទះ ទំហំ ៥ ម គុណ ៦ ម តាមរយៈ លោក ម៉ាលិច អារ៉ាវ៉ីន ជាអំណោយសប្បុរសជនប្រទេសសឹង្ហបូរី រូម៉ាវាកាហ្វ RUMAH WAKAF រួចមក ។ ថ្លែងនាឱកាសនោះ ឯកឧត្តម ម៉ូត យូសុះ បានមានប្រសាសន៏លើកឡើងេះពីការយកចិត្តទុកដាក់ របស់រាជរដ្ឋាភិបាលកម្ពុជា ក្រោមការដឹកនាំរបស់ សម្ដេចអគ្គមហាសេនាបតីតេជោ ហ៊ុន សែន ជាប្រមុខដឹកនាំកម្ពុជា បានបង្កលក្ខណៈងាយស្រួលគ្រប់បែបដល់ បងប្អូនប្រជាពលរដ្ឋសាសនិកខ្មែរឥស្លាម ធ្វើឲ្យមានសុខដុមនីយកម្មសាសនា ដោយ មិនប្រកាន់ និងគ្មានរើសអើងគ្នាទៅវិញទៅមក ។

ឯកឧត្តម តំណាងរាស្រ្តខេត្តត្បូងឃ្មុំ ក៏បានសំណូមពរ ដល់ក្រុមការងារឃុំ ទាំងអស់ ត្រូវបន្តខិតខំយកចិត្តទុកដាក់ជំរុញដល់បងប្អូនប្រជាពលរដ្ឋដែលមិនទាន់បានចុះឈ្មោះក្នុបញ្ជីបោះឆ្នោត ដូចជាអ្នកទើបតែផ្លាស់ប្តូរទីលំនៅអ្នកទើបត្រឡប់ពីសំណាកស្រុក អ្នកគ្មានអត្តញ្ញាណប័ណ្ណ អ្នកទើបគ្រប់អាយុ ១៨ ឆ្នាំបានទៅចុះឈ្មោះបោះឆ្នោត អោយបានគ្រប់ៗគ្នា ក្នុងរយៈពេលនៃការរៀបចំបញ្ជីបោះឆ្នោតថ្មីឆ្នាំ២០២១ ចាប់ពីថ្ងៃទី១២ ខែតុលា ដល់ថ្ងៃទី៣០ ខែវិច្ឆិការ ឆ្នាំ២០២១ ដើម្បីបោះឆ្នោតជ្រើសរើសក្រុមប្រឹក្សាឃុំ/សង្កាត់ នាឆ្នាំ ២០២២ ខាងមុខនេះ។

តមក ឯកឧត្តម ម៉ូត យូសុះ ក៏បានផ្ដាំផ្ញើដល់ប្រជាពលរដ្ឋ និងសាសនិកខ្មែរឥស្លាម ទាំងអស់ ត្រូវចូលរួមអនុវត្តឲ្យបានខ្ជាប់ខ្ជួនតាមការណែនាំរាជរដ្ឋាភិបាល ក៏ដូចជាក្រសួងសុខាភិបាល និងរដ្ឋបាលខេត្តផ្ទាល់ នូវវិធាន ៣កុំ ៣ការពារ ទប់ស្កាត់បានការឆ្លងរីករាលដាលនៃជំងឺកូវីដ-១៩ ក្នុងសហគមន៏កម្ពុជាយើង។

សូមជម្រាបថា អំណោយ មានជាគ្រឿងឧបភោគ-បរិភោគ នាំយកមកប្រគល់ជូននាពេលនេះ តាមរយៈ លោក ម៉ាលិច អារ៉ាវ៉ីន អំណោយសប្បុរសជនប្រទេសសឹង្ហបូរី រូម៉ាវាកាហ្វ RUMAH WAKAF ដែលបានចូលរួមចំណែកជាមួយរាជរដ្ឋាភិបាល និងរដ្ឋបាលខេត្ត ក្នុងការអភិវឌ្ឍសហគមន៏ និងប្រទេសជាតិ ៕