ខេត្តតាកែវ ៖ វង់ល្បែងស៊ីសងដ៏ធំមួយកន្លែងស្ថិតនៅ ក្នុងភូមិត្បែង ឃុំក្រាំងធ្នង់ ស្រុកបាទី ខេត្តតាកែវ កំពុងប្រមូលផ្តុំគ្នាលេងយ៉ាងអនាធិបតេយ្យ គ្មានអាជ្ញាធរ ឬសមត្ថកិច្ចមូលដ្ឋានចាត់វិធានការទប់ស្កាត់ និងបង្ក្រាបទាល់តែសោះ ក្នុងបរិបទ កូវីដ-១៩(Delta)។
បន្ទាប់ពីទទួលបានដំណឹងពីប្រជាពលរដ្ឋភ្លាម នៅថ្ងៃទី១៦ ខែតុលា ឆ្នាំ២០២១នេះ ក្រុមការងារអ្នកសារព័ត៌មាន បានទៅដល់ទីតាំងខាងលើនេះដោយផ្ទាល់ ដោយឃើញថា ពិតជាមានការប្រមូលផ្តុំគ្នាលេងល្បែងស៊ីសងបញ្ជល់មាន់ពិតប្រាកដមែន មិនខ្លាចឆ្លងជំងឺកូវីដ១៩ ទីកាន់គ្រួសារ និងសហគមន៍ទាល់តែសោះ។
ប្រជាពលរដ្ឋមានចម្ងល់ថា តើអាជ្ញាធរមូលដ្ឋាននៃស្រុកបាទី ខេត្តតាកែវ ទទួលបានដំណឹងនេះទេ ឬលោកធ្វើមិនដឹង ដែលមានក្រុមអ្នកញៀននឹងល្បែង បានប្រមូលផ្តុំគ្នាយ៉ាងគគ្រឹកគគ្រេង នៅលើទឹកដីរបស់លោកជាអ្នកគ្រប់គ្រងយ៉ាងដូច្នេះហើយ បែជាលោកគ្មានវិធានការបង្ក្រាបឱ្យទាន់ពេលវេលា និងមានប្រសិទ្ធិភាព! ហេតុនេះហើយ ប្រជាពលរដ្ឋមានការសង្ស័យទៅលើអាជ្ញាធរមូលដ្ឋាននៃស្រុកបាទី ខេត្តតាកែវ ទទួលបានលាភសក្ការៈពីក្រុមអ្នកញៀនល្បែងទាំងអស់នេះមែនទេ ឃើញតែមានការបង្ហោះដុតសម្ភារៈរបស់អ្នកញៀនល្បែង ប៉ុន្តែល្បែងស៊ីសងទាំងអស់នោះ នៅតែកើតមានឡើងជាបន្តបន្ទាប់ ក្នុងទឹកដី ស្រុកបាទី ខេត្តតាកែវ។
