ឯកឧត្តម គួច ចំរើន  ដឹកនាំមន្ត្រីជំនាញចុះប្រតិបត្តិការ ស្វែងរកជួយ សង្រ្គោះជ នរងគ្រោះករណីលង់ទឹកចំនួន០៥នាក់ (ស្លាប់០៤នាក់) នៅចំណុច ឆ្នេរជំទាវម៉ៅ

ខេត្តព្រះសីហនុ ៖ កាលពីរសៀលថ្ងៃព្រហស្បតិ៍ ១កើត ខែអស្សុជ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី០៧ ខែតុលា ឆ្នាំ២០២១ ឯកឧត្តម គួច ចំរើន អភិបាលនៃគណៈអភិបាល ខេត្តព្រះសីហនុ និងជាប្រធានគណៈបញ្ជាការឯកភាពខេត្ត ដឹកនាំមន្ត្រីជំនាញចុះប្រតិបត្តិការ ស្វែងរកជួយសង្រ្គោះជនរងគ្រោះករណីលង់ទឹកចំនួន០៥នាក់ (ស្លាប់០៤នាក់) នៅចំណុច ឆ្នេរជំទាវ ម៉ៅ ស្ថិតក្នុងភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ។

ករណីជួយសង្គ្រោះត្រូវបានបិទបញ្ចប់ បន្ទាប់ពីជនរងគ្រោះចុងក្រោយត្រូវ បានក្រុមជួយសង្រ្គោះបានរកឃើញនៅវេលាម៉ោង០១ និង០០នាទី រំលងអធ្រាត្រ ចូលថ្ងៃទី០៨ ខែតុលា ឆ្នាំ២០២១ ។ ជនរងគ្រោះចំនួន ០៥នាក់ រួមមាន៖ ១.ឈ្មោះ ឡេង ឌៀប ភេទស្រី អាយុ២៥ឆ្នាំ មុខរបរកម្មកររោងចក្រ មានទីលំនៅភូមិអូរឧកញ៉ាហេង ឃុំអូរឧកញ្ញាហេង ស្រុកព្រៃនប់ ខេត្តព្រះសីហនុ (ស្លាប់)។ ២.ឈ្មោះ ឡេង សុខជា ភេទប្រុស អាយុ១០ឆ្នាំ មុខរបរសិស្ស មានទីលំនៅភូមិស្មាច់ដែង ឃុំរាម ស្រុកព្រៃនប់ ខេត្តព្រះសីហនុ (សង្គ្រោះបាន)។ ៣.ឈ្មោះ ឡេង ជ្រូក ភេទប្រុស អាយុ២០ឆ្នាំ មុខរបរកម្មកររោងចក្រ មានទីលំនៅភូមិអូរឧកញ៉ាហេង ឃុំអូរឧកញ្ញ៉ាហេង ស្រុកព្រៃនប់ ខេត្តព្រះសីហនុ (ស្លាប់)។ ៤.ឈ្មោះ ឡេង ដាវ ភេទប្រុស អាយុ១២ឆ្នាំ មុខរបរសិស្ស មានទីលំនៅភូមិអូរឧកញ៉ាហេង ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ (ស្លាប់) និង៥.ឈ្មោះឡេង សុជាតា ភេទស្រី អាយុ១៦ឆ្នាំ មុខរបរកម្មករ មានទីលំនៅភូមិអូរឧកញ៉ាហេង ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ (ស្លាប់)។

ឯកឧត្តម គួច ចំរើន បានដាក់បទបញ្ជាឱ្យក្រុមជួយសង្រ្គោះប្រើប្រាស់គ្រប់មធ្យោបាយ ដើម្បីបន្តស្វែងរកជនរងគ្រោះដែលបានបាត់ខ្លួន។

សូមបញ្ជាក់ថា នៅតាមរមណីយដ្ឋាននានា ជាពិសេសនៅតាមបណ្តោយឆ្នេរ គឺយើងមានមន្ត្រីនគរបាលទេសចរណ៍ និងឆ្មាំសមុទ្រចុះល្បាត និងត្រៀមជួយសង្គ្រោះ ព្រមទាំងអប់រំ ផ្សព្វផ្សាយបិទស្លាកសញ្ញា និងណែនាំជូនភ្ញៀវទេសចរដែលមកលេងកម្សាន្ត អំពីវិធានការសុវត្ថិ ភាព និងត្រូវបង្កើនការប្រុងប្រយ័ត្នជាប់ជាប្រចាំ។

ជាមួយគ្នានោះ រដ្ឋបាលខេត្ត សូមអំពាវនាវដល់បងប្អូនប្រជាពលរដ្ឋ ភ្ញៀវទេសចរជាតិ និងអន្តរជាតិ ដែលមកលេងកម្សាន្តនៅតាមរមណីយដ្ឋាននានានៅខេត្តព្រះសីហនុ ជាពិសេស នៅតាមតំបន់ឆ្នេរសមុទ្រ ត្រូវអនុវត្តន៍តាមការណែនាំ និងវិធានការសុវត្ថិភាព។ មន្ត្រី ទេសចរណ៍ និងមន្ត្រីនគរបាលទេសចរណ៍ត្រូវបង្កើនការចុះផ្សព្វផ្សាយជូនប្រជាពលរដ្ឋ និងភ្ញៀវទេសចរ ត្រូវប្រុងប្រយ័ត្ន ជាពិសេសមិនត្រូវបណ្តោយកូនតូចៗចុះលេងទឹកជ្រៅ ឬក្នុងស្ថានភាពដែលមានរលកធំៗ បោក បក់នោះទេ ដើម្បីបញ្ចៀសបាននូវគ្រោះថ្នាក់ ដែលអាចកើតឡើងជាយថាហេតុ។

សូមរម្លឹកថា កាលពីថ្ងៃទី០៥ ខែតុលា ឆ្នាំ២០២១កន្លងមក ក៏មានករណីក្មេងស្រីអាយុ ១១ឆ្នាំម្នាក់ ចុះលេងទឹកសមុទ្រហើយបានលង់ទឹក ត្រូវបានក្រុមឆ្មាំសមុទ្រជួយសង្រ្គោះទាន់ ពេលវេលា ៕