មហាជនមានការងឿងឆ្ងល់យ៉ាងខ្លាំងចំពោះការសាងសង់របង ដ៏រឹងមាំនៅឆ្នេរអូរឈើទាលបានយ៉ាងរលូន ខណៈអាជ្ញាធរអះអាងថា មានច្បាប់ត្រឹមត្រូវ?.

មហាជនមានការងឿងឆ្ងល់យ៉ាងខ្លាំងចំពោះការសាងសង់របង ដ៏រឹងមាំនៅឆ្នេរអូរឈើទាលបានយ៉ាងរលូន ខណៈអាជ្ញាធរអះអាងថា មានច្បាប់ត្រឹមត្រូវ?.

ព្រះសីហនុ៖ សំណង់របងរឹងមាំស្កឹមស្កៃត្រូវបានសាងសង់នៅកណ្ដាលបណ្ដោយឆ្នេរអូរឈើទាលស្ថិតនៅក្នុងសង្កាត់លេខ ៤ ក្រុងព្រះសីហនុត្រូវបានមតិមហាជនក៏ដូចជាភ្ញៀវទេសចរដែលមកលេងខេត្តព្រះសីហនុបានលើកឡើងថា ហេតុអ្វី?

ហេតុអ្វីជាសំនួរដែលប្រជាពលរដ្ឋឆ្ងល់ថា របងរឹងមាំនេះសាងសង់បានយ៉ាងរលូននៅលើឆ្នេរដោយមិនមានការហាមឃាត់ពីអាជ្ញាធរមន្ត្រីជំនាញក៏ដូចជាគណៈកម្មការឆ្នេរនោះឡើយ។ខណៈដែលអាជ្ញាធរបានលើកឡើងនាពេលកន្លងមកថាឆ្នេរសាធារណៈទាំងអស់ត្រូវបានយកមកធ្វើជាកម្មសិទ្ធិសាធារណៈរបស់រដ្ឋមិនអនុញ្ញាតឱ្យបុគ្គលណាយកមកធ្វើជាកម្មសិទ្ធិផ្ទាល់ខ្លួននោះឡើយ គឺទុកជាឆ្នេរសាធារណៈសម្រាប់ប្រជាពលរដ្ឋភ្ញៀវទេសចរណ៍ជាតិអន្តរជាតិមកលេងកម្សាន្ត។

ប៉ុន្ដែផ្ទុយទៅវិញមកដល់ពេលនេះរបងត្រូវបានសាងសង់បានស្ទើរតែរួចរាល់ ១០០%ដោយទីតាំងរបងនៅតាមបណ្ដោយឆ្នេរអូរឈើទាលដែលភ្ញៀវទេសចរទាំងជាតិនិងអន្តរជាតិតែងតែពេញនិយមមកលេងកម្សាន្តហើយក៏មានការថតបង្ហោះនៅតាមបណ្ដាញសង្គមនិងការចែករំលែកតៗគ្នាទាក់ទងនឹងការសាងសង់របងនៅឆ្នេរអូរឈើទាលនេះផងដែរ។

ជុំវិញការលើកឡើងពីមតិមហាជនខាងលើនេះ លោក ឡុង ឌីម៉ង់ អភិបាលរងខេត្តនិងជាអ្នកនាំពាក្យរដ្ឋបាលខេត្តព្រះសីហនុបានបញ្ជាក់ឲ្យដឹងថា សម្រាប់ទីតាំងដីដែលប្អូនបានលើកឡើងស្ថិតនៅទីតាំងនៅលើឆ្នេរអូឈើទាលដែលជាដីមានទំហំប៉ុន្មានជាជាង ៨.៤០០ ម៉ែត្រការ៉េនេះគឺជាដីដែលអតីតរបស់អង្គភាពនគរបាលជើងទឹក ហើយបើតាមការពិនិត្យស្រាវជ្រាវឯកសារមើលទៅគឺដីនេះគឺជាដីដែលរដ្ឋបានធ្វើនីតិវិធីអនុប្រយោគ ហើយបានក្លាយទៅជាទ្រព្យសម្បត្តិឯកជនរបស់រដ្ឋពីសាធារណៈរបស់រដ្ឋមកជាឯកជនរបស់រដ្ឋហើយក៏បានប្រគល់ សម្បទានទៅឲ្យក្រុមហ៊ុនឯកជនមួយដែលជានីតិបុគ្គលហើយបន្ទាប់មកក៏បានចេញជាកម្មសិទ្ធិបន្តបន្ទាប់។លោកថាដូចនេះនីតិវិធីការកសាងប័ណ្ណកម្មសិទ្ធិ គឺត្រឹមត្រូវរួចអស់ហើយពីរាជរដ្ឋាភិបាលតាំងពីឆ្នាំ២០០៧និងចេញប័ណ្ណតាំងពីឆ្នាំ២០០៨ ចេញប័ណ្ណកម្មសិទ្ធិឯកជន។

ដោយឡែកលោក ថៃ គឹមស័រ ប្រធានភូមិបាលក្រុងព្រះសីហនុក៏បានបញ្ជាក់ឲ្យដឹងដែរថា ការសាងសង់របងខាងលើនេះគឺម្ចាស់ដីបានសាងសង់នៅលើដីដែលមានប្លង់កម្មសិទ្ធិរបស់គេតែប៉ុណ្ណោះ គឺមិនបានសាងសង់នៅលើឆ្នេរនោះទេ ហើយលោកក៏បានចុះទៅវាស់វែង ឃើញថារបងបានសាងសង់ចូលមកក្នុងដីកម្មសិទ្ធិប្រវែងពីតឹកទៀតផងគឺមិនរំលោភចូលឆ្នេរនោះទេ។

លោកថា ដូចនេះការសាងសង់របងនៅឆ្នេរអូរឈើទាលខាងលើគឺត្រឹមត្រូវទៅតាមច្បាប់មិនដូចមតិមហាជនបានលើកឡើងទេគឺម្ចាស់ដីបានសាងសង់ត្រឹមត្រូវទៅតាមប្លង់ប្រព័ន្ធតែប៉ុណ្ណោះ៕