មេបញ្ជាការតំបន់ប្រតិបត្ដិការសឹករងព្រះវិហារ បានដឹកនាំក្រុមការងារចាក់វ៉ាក់សាំង AstraZeneca ដូសទី៣ ជាដូសជំរុញ ជូននាយទាហាន នាយទាហានរង និងពលទាហាន ដើម្បីបង្កើនប្រសិទ្ធភាពក្នុងការការពារជំងឺកូវីដ បំប្លែងថ្មី Delta
ខេត្តព្រះវិហារ៖ នាយទាហាន នាយទាហានរង និងពលទាហាន នៅក្នុងអង្គភាពតំបន់ប្រតិបត្តិការសឹករងព្រះវិហារ និងគ្រប់កងឯកភាពចំណុះសឹករងខេត្ត ទទួលបានការចាក់វ៉ាក់សាំង AstraZeneca ដូសទី៣ ជាដូសជំរុញ ទៅតាមគោលការណ៍រាជរដ្ឋាភិបាលកម្ពុជា នៅថ្ងៃទី១១សីហាឆ្នាំ២០២១ ។
មេបញ្ជាការតំបន់ប្រតិបត្តិការសឹងរងខេត្តព្រះវិហារ លោកឧត្តមសេនីយ៍ទោ ច័ន្ទ សុភ័ត្រ្តា បានមានប្រសាសន៍ បើកដំណើរការចាក់វ៉ាក់សាំង AstraZeneca ដូសទី៣ ជាដូសជំរុញ ជូននាយទាហាន នាយទាហានរង និងពលទាហាន នៅទូទាំង ៨ក្រុង-ស្រុក និង២វរៈសេនាតូច ចំណុះអង្គភាពតំបន់ប្រតិបត្តិការសឹករងព្រះវិហារ ដែលការចាក់វ៉ាក់សាំងដូសទី៣នេះ ដោយអនុវត្តទៅតាមគោលការណ៍ រាជរដ្ឋាភិបាលកម្ពុជា ,ក្រសួងការពារជាតិ និងអគ្គបញ្ជាការ នៃកងយោធពលខេមរភូមិន្ទ។
លោកឧត្តមសេនីយ៍ទោ ច័ន្ទ សុភ័ត្រ្តា មានប្រសាសន៍ថា ដំណើរការចាក់វ៉ាក់សាំង AstraZeneca ដូសទី៣ ជាដូសជំរុញ ជូនដល់កងទ័ពតំបន់សឹករងព្រះវិហារ ទាំងអស់នាពេលនេះ ធ្វើឡើងមានចំនួន២ទីតាំងផ្សេងគ្នា គឺ ១-នៅបញ្ជាការដ្ឋានតំបន់ប្រតិបត្តិការសឹករងព្រះវិហារ និង ២-នៅទីបញ្ជាការវរសេនាតូចលេខ១ ស្ថិតនៅក្នុងស្រុកជាំក្សាន្ត ខេត្តព្រះវិហារ។
លោកឧត្តមសេនីយ៍ទោ ច័ន្ទ សុភ័ត្រ្តា បានថ្លែងបញ្ជាក់ថា វ៉ាក់សាំងដែលចាក់ជូនបងប្អូនកងកម្លាំងជួរមុខ ដូសទី៣ នាពេលនេះ គឺជាការផ្តល់ជូនដ៏ពិសិទ្ធពីសំណាក់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលសម្តេច បានខិតខំគ្រប់បែបយ៉ាង ដើម្បីរកវ៉ាក់សាំងមក និងបានដាក់ចេញវិធានការ សម្រាប់ចាក់ជូនមន្ត្រីរាជការ និងកងកម្លាំងរបស់យើងឲ្យបានគ្រប់ៗគ្នា។
លោកឧត្តមសេនីយ៍មេបញ្ជាការ បានថ្លែងអំណរគុណយ៉ាងជ្រាលជ្រៅបំផុត ចំពោះសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលសម្តេចតែងបានយកហរទ័យគិតគូខ្ពស់បំផុត ចំពោះនាយទាហាន នាយទាហានរង និងពលទាហាន នៅទូទាំងប្រទេស ក្នុងនោះ ក៏មានកងកម្លាំងប្រដាប់អាវុធ គ្រូពេទ្យ មន្ត្រីរាជការ និងប្រជាពលរដ្ឋ នៅក្នុងខេត្តព្រះវិហារ ផងនោះដែរ។
លោកឧត្តមសេនីយ៍មេបញ្ជាការ បានថ្លែង ដាស់ស្មារតីកងទ័ព នៃអង្គភាពសឹករងខេត្តទាំងអស់ ត្រូវកត់ត្រា និងចងចាំទុកក្នុងចិត្តជានិច្ច នូវគុណបំណាច់ដ៏ថ្លៃថ្លា ក្នុងបេសកកម្មស្វះស្វែងរកវ៉ាក់សាំង មកចាក់ជូនមន្ត្រីជួរមុខ របស់សម្តេចតេជោ ហ៊ុន សែន ដើម្បីបង្កើនប្រសិទ្ធភាពក្នុងការការពារជំងឺកូវីដ បំប្លែងថ្មី Delta ដែលកំពុងបន្តឆ្លងរាលដាល ដ៏គួរឲ្យព្រួយបារម្ភនៅពេលនេះ។
មេបញ្ជាការតំបន់ប្រតិបត្តិការសឹងរងខេត្តព្រះវិហារ លោកឧត្តមសេនីយ៍ទោ ច័ន្ទ សុភ័ត្រ្តា បានបញ្ជាក់ទៀតថា ដោយមានការខិតខំប្រឹងប្រែងរបស់ក្រុមគ្រូពេទ្យ នាយទាហាន នាយទាហានរង និងពលទាហាន នៅគ្រប់កងឯកភាពចំណុះទាំងអស់ បានចាក់វ៉ាក់សាំង AstraZeneca ដូសទី៣ ជាដូសជំរុញ រួចរាល់ហើយនៅរយៈពេល ១ថ្ងៃពេញនេះ ហើយនៅថ្ងៃទី១២សីហាឆ្នាំ២០២១ ក្រុមគ្រូពេទ្យ នឹងបន្តចាវ៉ាក់សាំង ជូនគ្រួសារអតីតយុទ្ធជន ចំនួន២ ក្រុង-ស្រុក គឺក្រុងព្រះវិហារ និងស្រុកត្បែងមានជ័យ រីឯ ស្រុក ៦ទៀត នឹងចាក់ជូនជាបន្តបន្ទាប់ ទៅតាមគោលការណ៍ណែនាំ របស់ថ្នាក់ដឹកនាំ ផងដែរ៕
