រាជធានីភ្នំពេញ ៖ ឯកឧត្តម ហេង សុផាន់ណារិទ្ធ ប្រធាននាយកដ្ឋានសេវាអតិថិជន និងទំនាក់ទំនងសាធារណៈ នៃបេឡាជាតិសន្ដិសុខសង្គម(ប.ស.ស.) ក្រសួងការងារ និងបណ្ដុះបណ្ដាលវិជ្ជាជីវៈបានគូសបញ្ជាក់ថា សមាជិក ប.ស.ស. ដែលជាកម្មករ និយោជិតនៃវិស័យឯកជនទាំងអស់ នឹងទទួលបានប្រាក់សោធន (ប្រាក់រ៉ឺត្រែត) នៅពេលចូលនិវត្តន៍ដូចនឹងមន្រ្តីរាជការដែរ ខណៈពេលដែល ប.ស.ស. ដាក់ឱ្យអនុវត្តន៍របបសន្តិសុខសង្គមផ្នែកប្រាក់សោធននាពេលឆាប់ៗដ៏ខ្លីខាងមុខ។ ការគូសបញ្ជាក់នេះក្នុងឱកាសអញ្ជើញធ្វើបទបង្ហាញ និងពិភាក្សាលើប្រធានបទស្តីពីការលើកកម្ពស់ការយល់ដឹងអំពីការងារសមរម្យសម្រាប់កម្មករ និយោជិតជាស្រ្តី ដែលធ្វើការក្នុងវិស័យសេដ្ឋកិច្ចក្រៅប្រព័ន្ធ កាលពីថ្ងៃទី០៥ ខែសីហា ឆ្នាំ២០២១ តាមប្រព័ន្ធវីដេអូ ហ្ស៊ូម(Zoom)។ នេះបើយោងតាមផេកហ្វេសប៊ុកផ្លូវការរបស់បេឡាជាតិសន្ដិសុខសង្គម។
ឯកឧត្តម ហេង សុផាន់ណារិទ្ធ បានលើកឡើងអំពីវឌ្ឍនភាពនៃការអនុវត្តរបបសន្តិសុខសង្គម ដែលក្នុងនោះរួមមាន៖ ការអនុវត្តរបបសន្តិសុខសង្គមផ្នែកហានិភ័យការងារ និងផ្នែកថែទាំសុខភាព ដែលមានវិសាលភាពគ្របដណ្តប់លើវិស័យឯកជន និងវិស័យសាធារណៈ រួមទាំងអតីតមន្រ្តីរាជការ និងអតីតយុទ្ធជន ដូចមានចែងក្នុងច្បាប់ស្តីពីរបបសន្តិសុខសង្គម ជាពិសេសសម្រាប់ សមាជិក ប.ស.ស. ជាស្រ្តីសម្រាលកូន ទាំងក្នុង និងក្រៅប្រព័ន្ធទាំងអស់ក៏បាននិងកំពុងទទួលបានគោលរបបប្រាក់ឧបត្ថម្ភបន្ថែមពីរាជរដ្ឋាភិបាលកម្ពុជាផងដែរ។
ឯកឧត្ដមបានបន្ដថា នេះគឺជាការយកចិត្តទុកដាក់ខ្ពស់ ពីសំណាក់រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខដឹកនាំ ដែលសម្តេចតែងតែគិតគូរខ្ពស់បំផុតអំពីសុខុមាលភាព និងជីវភាពរស់នៅរបស់ប្រជាពលរដ្ឋ ពិសេសបងប្អូនកម្មករ និយោជិត។
បើតាមក្រសួងកិច្ចការនារីក៏បានឱ្យដឹងថា ជាលទ្ធផល ក្នុងវេទិកានេះដែរ ក៏ទទួលបានព័ត៌មានពាក់ព័ន្ធនឹងវិធានការ គោលនយោបាយ និងកម្មវិធីគាំទ្រនានា ពីក្របខ័ណ្ឌកិច្ចគាំពារសង្គម ដែលផ្តល់អត្ថប្រយោន៍ដល់ប្រជាជនដែលងាយរងគ្រោះ ជាពិសេសស្រ្តីអ្នកដែលធ្វើការក្នុងវិស័យសេដ្ឋកិច្ចក្រៅប្រព័ន្ធ និងកម្មវីធីគាំទ្រដល់ប្រជាជនដែលងាយរងគ្រោះក្នុងអំឡុងពេលកូវីដ-១៩ផងដែរ។ ក្រៅពីនេះ ភាគីពាក់ព័ន្ធក៏បានលើកឡើងអំពីតម្រូវការ ក៏ដូចជាកាលានុវត្តភាពនានា សម្រាប់គាំទ្រដល់ស្រ្តីដែលធ្វើការក្នុងវិស័យសេដ្ឋកិច្ចក្រៅប្រព័ន្ឋ ដោយឆ្លុះបញ្ចាំងជាមួយនឹងក្របខ័ណ្ឌជាតិគាំពារសង្គម និងវិធានការនានារបស់រាជរដ្ឋាភិបាល។
សូមបញ្ជាក់ថា កិច្ចប្រជុំខាងលើនេះ ត្រូវបានរៀបចំឡើងដោយ ក្រសួងកិច្ចការនារី តាមរយៈប្រព័ន្ធវីដេអូ (Zoom Meeting) ក្នុងគោលបំណងលើកកម្ពស់ការយល់ដឹងអំពីក្របខ័ណ្ឌ និងវិធានការផ្នែកគោលនយោបាយស្តីពីកិច្ចគាំពារសង្គម ដែលផ្តល់អត្ថប្រយោជន៍ដល់ស្ត្រី ជាពិសេសក្នុងវិស័យសេដ្ឋកិច្ចក្រៅប្រព័ន្ធ ដោយមានការញ្ជើញចូលរួមពីតំណាងអគ្គលេខាធិការដ្ឋានក្រុមប្រឹក្សាជាតិគាំពារសង្គម តំណាងមន្ទីរកិច្ចការនារីទាំង ២៥រាជធានី ខេត្ត តំណាងអង្គការ APHEDA, អង្គការ Oxfam និងតំណាងសហជីពនៃវិស័យសេដ្ឋកិច្ចក្រៅប្រព័ន្ធ សរុបប្រមាណជាង ១០០នាក់៕
