ផលិតកម្មកសិកម្មតាមកិច្ចសន្យា ជាស្ពានចម្លងរវាងអ្នកផលិតនិងអ្នកបញ្ជាទិញ ដើម្បីធ្វើការសម្របសម្រួលឱ្យភាគីទាំងពីរ ធ្វើការសហការរួមគ្នាផលិតផលិតផលកសិកម្ម តាមអ្វីដែលអ្នកបញ្ជាទិញចង់បាន

រាជធានីភ្នំពេញ ៖ រដ្ឋមន្រ្តីក្រសួងកសិកម្មបានអះអាងថា ផលិតកម្មកសិកម្មតាមកិច្ចសន្យា ជាស្ពានចម្លងរវាងអ្នកផលិតនិងអ្នកបញ្ជាទិញ ដើម្បីធ្វើការសម្របសម្រួលឱ្យភាគីទាំងពីរ ធ្វើការសហការរួមគ្នាផលិតផលិតផលកសិកម្ម តាមអ្វីដែលអ្នកបញ្ជាទិញចង់បាន ជាពិសេសភាគីបញ្ជាទិញអាចជួយឧបត្ថម្ភជាហិរញ្ញវត្ថុ ធាតុចូលកសិកម្ម និងការបណ្តុះបណ្តាលបច្ចេកទេសយោងតាមការចាំបាច់ និងតាមសំណើរបស់ភាគីផលិត ។

យោងតាមគេហទំព័រហ្វេស ប៊ុកផ្លូវការរបស់ ឯកឧត្តម វេង សាខុន រដ្ឋមន្ត្រីក្រសួងកសិ កម្ម រុក្ខាប្រមាញ់និងនេសាទ បានបញ្ជាក់ថា ផលិតកម្មកសិកម្មតាមកិច្ចសន្យា (Contract Farming) បានបង្កលក្ខណៈងាយស្រួលឱ្យភាគីទាំងពីរ កសាងរួមគ្នានូវសុខដុមនីយកម្ម តម្លាភាព យុត្តិធម៌ ការទទួលខុសត្រូវ និងជំនឿទុកចិត្ត ដែលកត្តាទាំងអស់នេះ បានកសាងរបាំងយុត្តិធម៌យ៉ាងរឹងមាំមួយ សម្រាប់ទប់ស្កាត់ លុបបំបាត់ និងដោះស្រាយនូវរាល់វិវាទ ដែលអាចកើតមានឡើងជាយថាហេតុក្នុងអំឡុងពេលអនុវត្តកិច្ចសន្យា ។ម្យ៉ាងទៀត នេះជាយន្តការយ៉ាងសំខាន់មួយ ក្នុងការជួយជំរុញផលិត ភាពផលិតកម្មកសិកម្មតាមរយ:ការរៀបចំផែនការផលិតច្បាស់លាស់ ការអនុវត្តបច្ចេកទេសកសិកម្មទំនើប ការប្រើប្រាស់ធាតុចូលកសិកម្មសមស្រប ការប្រកួតប្រជែង ការប្រែប្រួលអាកាស ធាតុ បរិយាប័ន្ននិងនវានុវត្តន៍ និងបង្កើតបរិយាកាសវិនិ យោគឱ្យកាន់តែល្អប្រសើរ ។

ឯកឧត្តមបន្តថា ដោយបានពិនិត្យឃើញពីភាពចាំបាច់ក្នុងកិច្ចដំណើរការពេញលេញនៃខ្សែច្រវ៉ាក់ផលិតកម្មកសិកម្ម និងក្នុងគោលបំណងដាក់ឱ្យអនុវត្តន៍អនុក្រឹត្យលេខ៣៦ អនក្រ.បក ឱ្យប្រព្រឹត្តទៅដោយរលូន ទូលំទូលាយ ល្អប្រសើរ និងទទួលបានជោគ ជ័យ ក្រសួងបានលើកសំណើទៅប្រមុខរាជរដ្ឋាភិបាល ដើម្បីបង្កើតគណៈកម្មាធិការសម្រប សម្រួលកិច្ចសន្យាផលិតកម្មកសិកម្ម ហើយត្រូវបាន សម្រេចចុះហត្ថលេខាដោយសម្តេចអគ្គមហាសេនាបតីតេជោ ហ៊ុន សែន កាលពីថ្ងៃទី០៦ ខែកញ្ញា ឆ្នាំ២០១៧ ដែលមានឯកឧត្តមរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទជាប្រធាន និងមាន១៨ក្រសួង ស្ថាប័នជា សមាជិក ។ តាមរយៈនៃការ បង្កើតយន្តការសម្របសម្រួលអន្តរក្រសួង បានធ្វើឱ្យអ្នកពាក់ព័ន្ធទទួលបាន និងយល់ ដឹងច្បាស់ពីអត្ថប្រយោជន៍នៃការអនុវត្តកិច្ចសន្យានេះ ធ្វើឱ្យការអនុវត្តកិច្ចសន្យា កាន់តែផុលផុស ទូលំទូលាយ និងមានការកើនឡើងជាបន្ត បន្ទាប់ ។

សូមបញ្ជាក់ថា កាលពីឆ្នាំ ២០២០ កម្ពុជាមានកិច្ចសន្យាចំនួន៩៣៦ ត្រូវបានអនុវត្តជាផ្លូវការ ក្នុងនោះ មានសហ គមន៍កសិកម្មចំនួន២៩៣ សហគមន៍ ដែលគ្របដណ្តប់ទៅលើប្រភេទផលិតផលកសិកម្មជាច្រើនមុខ ដូចជា៖ ស្រូវពូជ ស្រូវសរីរាង្គ ស្រូវក្រអូប ស្រូវចំណី ដំឡូងមីសរីរាង្គ ម្រេច ស្ករត្នោត បន្លែ ស្វាយចន្ទី ពោត សណ្តែកខៀវ សណ្តែកបាយ មាន់ស្រែ គោ ជ្រូក ដោយគ្រប់ដណ្តប់លើ ២២ខេត្ត ៕