រាជធានីភ្នំពេញ ៖ មន្រ្តីជាន់ខ្ពស់ក្រសួងសុខាភិបាល បន្តអំពាវនាវឱ្យប្រជាពលរដ្ឋជាពិសេស មនុស្សចាស់ត្រូវមកចាក់វ៉ាក់សាំងឱ្យបានគ្រប់ៗគ្នានិងទាន់ពេលវេលា ដើម្បីការពារការរីករាលដាលនៃជំងឺកូវីដ១៩ ។
ថ្លែងក្នុងកិច្ចសម្ភាសន៍ជាមួយអ្នកសារព័ត៌មាន នៅព្រឹកថ្ងៃទី០២ ខែ កក្កដា នៅសាលាបឋមសិក្សាចតុមុខ រាជធានីភ្នំពេញ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការនិងជាអ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស ហៅកាត់ថា គ.វ.ក-១៩ បានមានប្រសាសន៍ អំពាវនាវទៅដល់ប្រជាពលរដ្ឋទាំងអស់ សូមស្ម័គ្រចិត្តមកចាក់វ៉ាក់សាំងឱ្យបានគ្រប់គ្នា សម្រាប់បុគ្គលដែលមានអាយុចាប់ពី១៨ឆ្នាំឡើងទៅ ហើយកុំយល់ថាខ្លួនចាស់ហើយមិនបាច់ចាក់។
លោកជំទាវវេជ្ជបណ្ឌិត បន្តថា ក្រុមមនុស្សដែលប្រឈមហានិភ័យខ្ពស់ជាមួយនិងការវ៉ៃលុកពីវីរុសកូវីដ១៩នេះគឺ ក្រុមជនចាស់ជរាដែលមានវ័យចំណាស់នេះឯង ហើយក្រុមមួយចំនួនទៀតគឺជាក្រុមដែលមានជំងឺប្រចាំកាយ ដូច្នេះសូមឱ្យប្រជាពលរដ្ឋយល់ចំណុចនេះឱ្យច្បាស់ ហើយប្រសិនបើបងប្អូនលោកតា លោកយាយ ចំណាស់ដែលលើសពី៦០ឆ្នាំទៅនេះ សូមមេត្តាមកចាក់វ៉ាក់សាំងឱ្យបានគ្រប់ៗគ្នា ដើម្បីការពារអាយុជីវិត ។ លោកជំទាវវេជ្ជបណ្ឌិត បន្តទៀតថា ក្រុមគ្រួសារក៏ត្រូវតែជួយពន្យល់និងផ្តល់នូវភាពកក់ក្តៅ ដើម្បីឱ្យមនុស្សចាស់មានការសម្រេចចិត្តដ៏ត្រឹមត្រូវ នៅក្នុងការមកទទួលវ៉ាក់សាំងកូវីដ១៩ ដែលសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានខិតខំស្វះស្វែង ដើម្បីទិញវ៉ាក់សាំងយកមកចាក់ជូនបងប្អូនប្រជាពលរដ្ឋ ដោយមិនមានការបង់ប្រាក់អ្វីនោះទេ ។ សំឡេង « ខ្ញុំសូមអំពាវនាវហើយអំពាវនាវទៀត សូមបងប្អូនយើង មកចាក់ទៅតាមពេលវេលាដែលក្រុមគ្រូពេទ្យរបស់យើងជម្រាបជូន ជាពិសេសមានការផ្សព្វផ្សាយហើយអាជ្ញាធរមូលដ្ឋាន គាត់បានធ្វើការជម្រាបជូន ហើយសូមអញ្ជើញមកតាមពេលវេលា ដែលមានការចាត់ចែងដោយអាជ្ញាធរមូលដ្ឋាន » ។ សូមបញ្ជាក់ថា ចាប់ពីថ្ងៃទី១០ ខែកុម្ភៈ ដល់ថ្ងៃទី ០១ ខែកក្កដា ឆ្នាំ២០២១នេះ អ្នកដែលបានមកចាក់វ៉ាក់សាំងបង្ការជំងឺកូវីដ១៩ ទូទាំងប្រទេស មានចំនួន៤,៣៦៣,០០៩នាក់ ស្មើនឹង ៤៣.០៥ ភាគរយក្នុងគោល ដៅ១០លាននាក់ ហើយគិតត្រឹមថ្ងៃទី២៨ ខែមិថុនា ឆ្នាំ២០២១ កម្ពុជាទទួលបានវ៉ាក់សាំងប្រមាណជាង១១លានដូស រួចហើយសម្រាប់ចាក់ជូនប្រជាពលរដ្ឋ ៕
