ឯកឧត្តមទេសរដ្ឋមន្រ្តី គន់ គីម អញ្ជេីញចុះពិនិត្យស្ថានភាពការលិចលង់ផ្ទះសម្បែងប្រជាពលរដ្ឋដោយជំនន់ទឹកភ្លៀង ក្នុងក្រុងព្រះវិហារ
ឯកឧត្តមទេសរដ្ឋមន្ដ្រី គន់ គីម អនុប្រធានទី១ គណ:កម្មាធិការជាតិគ្រប់គ្រងគ្រោះមហន្ដរាយ នារសៀលថ្ងៃទី២៨ ខែសីហា ឆ្នាំ២០២២នេះ បានអញ្ជេីញចុះពិនិត្យពីស្ថានភាពជំនន់ទឹកភ្លៀងដែលកំពុងរងផលប៉ះពាល់ដល់ផ្ទះប្រជាពលរដ្ឋ ស្ដិតក្នុងសង្កាត់កំពង់ប្រណាក ក្រុងព្រះវិហារ ខេត្តព្រះវិហារ។ មានវត្តមានអញ្ជេីញចូលរួមអមដំណេីរនាឱកាសនោះ មានឯកឧត្តមគណ:ប្រតិភូអមដំណេីរ អភិបាលរងខេត្ត កងកម្លាំងទាំងបី ថ្នាក់ដឹកនាំមន្ទីរអង្គភាពជំនាញពាក់ព័ន្ធ និងមន្ដ្រីរាជការជាច្រេីនរូបទៀត។
ជាមួយនេះបេីយោងតាមរបាយការណ៍ពីរដ្ឋបាលក្រុងព្រះវិហារ ប្រជាពលរដ្ឋក្នុងសង្កាត់កំពង់ប្រណាកដែលរងការលិចលង់មានចំនួន៣ភូមិគឺភូមិសំរោង ភូមិថ្មី និងភូមិដំណាក់ សរុប ៤០គ្រួសារ ក្នុងនោះត្រូវបានជម្រ្លៀសមកទីទួលសុវត្ថិភាពចំនួន១៥គ្រួសារ ។
សូមបញ្ជាក់ជូនថាគិតត្រឹមថ្ងៃទី២៨ ខែសីហា ឆ្នាំ២០២២ នេះ ទឹកស្ទឹងសែនក្រុងព្រះវិហារ ខេត្តព្រះវិហារ មានកម្ពស់១១.៩៦ម៉ែត្របើធៀបទឹកពីម្សិលមិញហក់ឡើង០.៣៦ ខណ:ដែលកំពស់ដែលត្រូវប្រកាសអាសន្នគឺ ១១.៥០ម៉ែត្រ។
