ប្រជាពលរដ្ឋតំណាងពលរដ្ឋ៣៥គ្រួសារ អតីត១៦គ្រួសារ រងភាពអយុត្តិធម៌ ទៅដល់ផ្ទះថ្នាក់ដឹកនាំគណបក្សប្រឆាំង ដើម្បីសុំអោយ សម្តេចជោ ជួយអន្តរាគមន៍ដល់ពួកគាត់។
នៅព្រឹកថ្ងៃទី១៣ ខែសីហា ឆ្នាំ២០២២នេះ ប្រជាពលរដ្ឋតំណាងពលរដ្ឋ៣៥គ្រួសារ អតីត១៦គ្រួសារ ស្ថិតនៅភូមិ៤ ឃុំអូរត្រេះ ស្រុកស្ទឹងហាវ ខេត្តព្រះសីហនុ បាននាំគ្នាទៅដល់ផ្ទះឯកឧត្តម ជា រិទ្ធី អគ្គលេខាធិការ គណបក្សខ្មែរអភិវឌ្ឍន៍សេដ្ឋកិច្ច និងជាមន្ត្រីលេខាធិការប្រតិភូបក្សខ្មែរអភិវឌ្ឍន៍សេដ្ឋកិច្ច នៃសមាជិកឧត្តមក្រុមប្រឹក្សាពិគ្រោះ និងផ្តល់យោបល់ ដើម្បីសុំអោយប្រតិភូបក្សនេះ អន្តរាគមន៍ស្នើសុំទៅសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ដើម្បីជួយអន្តរាគមន៍ជួយពួកគាត់បន្ទាប់ពីពួកគាត់បានទទួលលិខិតក្រើនរំលឹករបស់តុលាការខេត្តព្រះសីហនុ ដែលផ្ទុយពីការស្នើសុំរបស់ប្រជាពលរដ្ឋទៅសាលាខេត្តព្រះសីហនុ និងតុលាការខេត្តព្រះសីហនុ ដើម្បីសុំបង្កើតគណ:កម្មការចំរុះចុះវាស់វាងជាក់ស្តែង ដែលមានការចូលរួមពីប្រជាពលរដ្ឋនិងគូរភាគីពាក់ព័ន្ធនិងស្ថាប័នពាក់ព័ន្ធផ្សេងទៀតនិងសាលាខេត្តព្រះសីហនុ ដើម្បីអោយពួកគាត់បានចាកចេញដោយស្ម័គ្រចិត្ត។
នៅក្នុងនោះឯកឧត្តមអភិបាលខេត្តព្រះសីហនុក៏បានធ្វើលិខិតជម្រាបជូនតុលាការខេត្តព្រះសីហនុអំពីមូលហេតុប្រជាពលរដ្ឋសុំអោយបង្កើតគណ:កម្មការចុះវាស់វាងរកទីតាំងទំនាស់ជាក់ស្តែង ក៏ប៉ុន្តែតុលាការបែរជាបដិសេធទៅវិញដោយសំអាងថា គណ:កម្មការវាស់វែងច្រើនដងហើយ។
ប្រជាពលរដ្ឋបានលើកឡើងថា កន្លងទៅគណ:កម្មការដែលចុះវាស់វាង ពលរដ្ឋមិនដែលបានចូលរួមនោះទេ ដូច្នេះការវាស់វែងនាពេលកន្លងទៅប្រជាពលរដ្ឋមិនទទួលស្គាល់ទេ ទើបប្រជាពលរដ្ឋស្នើអោយមានគណ:កម្មការចុះវាស់វែងជាក់ស្តែង រកទីតាំងទំនាស់ ព្រោះប្រជាពលរដ្ឋយល់ថា ទីតាំងទំនាស់មិនស្ថិតនៅលើទីតាំងពួកគាត់រស់នៅទេ។
នៅក្នុងជំនួបឯកឧត្តម ហួន រដ្ឋា អនុប្រធានប្រតិភូ គណបក្សខ្មែរអភិវឌ្ឍន៍សេដ្ឋកិច្ច និងឯកឧត្តម ជា រិទ្ធីអគ្គលេខាធិការគណបក្សខ្មែរអភិវឌ្ឍន៍សេដ្ឋកិច្ច នៅគេហដ្ឋានរបស់ឯកឧត្តម ជា រិទ្ធី ប្រជាពលរដ្ឋបានលើកឡើងថា ពួកគាត់អយុត្តិធម៌ណាស់ រស់នៅតាំងពីឆ្នាំ១៩៩២ រហូតមក មិនដែលមានឮថា មានទំនាស់ឬមានបុគ្គលថាជាម្ចាស់ដីទេ ទៀតសោតរហូតដល់ឆ្នាំ២០០៨ ដីមានតម្លៃស្រាប់លេចចេញលោក ប៉ុន សារឿន អតីតចៅសង្កាត់រងសង្កាត់លេខ១ បានទិញដីពីឈ្មោះ គឹម ចាន់នី ឆ្នាំ២០០៨ ដែលកំពុងស្ថិតនៅក្រោមអនុក្រិត្យនិរាករណ៍ប័ណ្ណកម្មសិទ្ធិចោលនៅឆ្នាំ១៩៩៧ និងស្ថិតនៅក្រោមគម្របព្រៃឆ្នាំ២០០២ និងកំពុងស្ថិតនៅក្នុងនីតិវិធីស្នើសុំទៅរាជរដ្ឋាភិបាលដើម្បីកាត់ឆ្វៀលដីរបស់ប្រជាពលរដ្ឋ១៦គ្រួសារ។
ឈ្មោះ គឹម ចាន់នី អះអាងថា បានទិញពីឈ្មោះ ឡុញ តាយ និងប្រពន្ធឈ្មោះ ឌៀវ សារ៉ុន ដែលជាការភូតកុហក់ និងក្លែងឯកសារទាំងស្រុង ព្រោះឈ្មោះ ឡុញ តាយ គឺមានប្រពន្ធ អេង វ៉ាន់ ដែលមានអាជ្ញាធរទទួលស្គាល់ថែមទៀត មិនមែនឈ្មោះ ឌៀវ សារ៉ុនទេ ហើយមិនដឹងថា គឹម ចាន់នី ទិញដីពីបុគ្គលនៅឯណាផង គ្រាន់មានឈ្មោះដូចប្តីគាត់ហេតុអ្វីបានជាមករំលោភយកដីគាត់ ។
ការទិញលក់មិនអោយមេភូមិមេឃុំដឹងឮផង ហេតុអ្វីបានជាតុលាការទទួលយកជាផ្លូវការអញ្ចឹង។
ការទិញលក់ទ្រព្យសម្បត្តិប្តីប្រពន្ធរួម ច្បាប់ភូមិបាលបានកំណត់ច្បាស់ណាស់ថា ទាល់តែមានការឯកភាពទាំងប្តីនិងប្រពន្ធទើបអាចធ្វើការផ្ទេរផ្ទូរបាន ចុះហេតុអ្វីតុលាការសម្រេចប្រគល់អោយអ្នកទិញដែលច្បាប់មិនអនុញ្ញាតិ។
ក្នុងរណីនេះដោយសារ ឈ្មោះ ឡុញ តាយ បានស្លាប់តាំងពីថ្ងៃទី០៣ ខែ០៤ ឆ្នាំ១៩៩៤ មកម្លេះ ដូចនេះការប្តឹងផ្តល់គ្នាតុលាការមិនអាចហៅខ្មោចមកសួរបានទេ អញ្ចឹងហើយបានជាតុលាការមិនបានពិនិត្យមើលច្បាប់ស្តីពីទ្រព្យសម្បត្តីប្តីប្រពន្ធជាពិសេសបញ្ហាដីធ្លី។
ឯកឧត្តម ហួន រដ្ឋា បានលើកឡើងថា នៅក្នុងចំណុចនេះខ្ញុំគិតថា ដើម្បីបញ្ចប់បញ្ហាទំនាស់ដីធ្លីជាច្រើនឆ្នាំនេះ តុលាការគួរតែបង្កើតគណ:កម្មការចំរុះអោយធ្វើការវាស់វាងតាមការស្នើសុំរបស់ប្រជាពលរដ្ឋ ព្រោះក្នុងនោះឯកឧត្តមអភិបាលខេត្តព្រះសីហនុ ក៏បានធ្វើលិខិតជម្រាបអំពីការស្នើរបស់ពលរដ្ឋទៅតុលាការផងដែរ ដើម្បីបញ្ចប់បញ្ហាទំនាស់ដោយសុក្រិតភាព និងអស់ចិត្តពីប្រជាពលរដ្ឋ ហើយក្នុងករណីឯកសារគូរភាគីទាំងពីរមានស្ថានទម្ងន់ផ្លូវច្បាប់ដូចគ្នាស្ថាប័នពាក់ព័ន្ធ និងតុលាការគួរផ្តល់ភាពយុត្តិធម៌អោយស្នើភាពគ្នា តាមភាពជាក់ស្តែង ព្រោះបច្ចុប្បន្នរាជរដ្ឋាភិបាលក៏មានស្ថានប័នគណ:កម្មការជាតិដោះស្រាយក្រៅប្រព័ន្ធទៀតផង។
ក្នុងនាមជា គណកប្សខ្មែរអភិវឌ្ឍន៍សេដ្ឋកិច្ច ជាសមាជិកឧត្តមក្រុមប្រឹក្សាពិគ្រោះ នឹងផ្តល់យោបល់ សង្ឃឹមថា បញ្ហាទំនាស់ដីធ្លីប្រជាពលរដ្ឋនិងអាចបញ្ចប់នៅឆ្នាំ២០២២ មុនបោះឆ្នោតសភាជាតិឆ្នាំ២០២៣។
សំណូមពរតុលាការខេត្តព្រះសីហនុមេត្តាពន្យាពេលការអនុវត្តន៍លើកទី២ និងសំណូមពរកិច្ចអន្តរាគមន៍ពីក្រសួងយុត្តិធម៌ទៅតុលាការ ខេត្តព្រះសីហនុផ្អាកការចុះអនុវត្តន៍លើកទី២ និងស្នើសុំអោយមានការបង្កើតគណ:កម្មការចំរុះអោយមានការវាស់វែងទីតាំងទំនាស់ដើម្បីបញ្ចប់បញ្ហាទំនាស់នេះអោយសុក្រិតភាពនិងអស់ចិត្តប្រជាពលរដ្ឋ៕
